బాలయ్యా..! ఎప్పుడొస్తాడయ్య చిన్నబాలయ్య..!
బాలయ్య స్టేట్ మెంట్ ఇచ్చి చాలా రోజులే అవుతోంది. కానీ ఆ మాటలు ఇంకా కెమెరా ముందుకు రాలేదు. దీంతో బాలయ్య ఫ్యాన్స్ డిసప్పాయింట్ అవుతున్నారు. బాలకృష్ణ దర్శకత్వంలో మోక్షజ్ఞ లాంచ్ అవుతాడనే స్టేట్ మెంట్ వచ్చినప్పటి నుంచి నందమూరి అభిమానులు ఈ ప్రాజెక్ట్ కోసం చాలా ఆసక్తిగా ఎదురు చూస్తున్నారు. 'ఆదిత్య 369' సినిమా 25 ఏళ్లు పూర్తి చేసుకున్న సందర్భంగా కొడుకు ఎంట్రి గురించి మాట్లాడాడు బాలయ్య. 'ఆదిత్య 999'తో మోక్షజ్ఞని లాంచ్ చేస్తానని, కథ కూడా సిద్ధమైందని చెప్పాడు.
'ఆదిత్య369' సీక్వెల్గా 'ఆదిత్య 999' సినిమా రాబోతోంది. ఈమూవీకి బాలకృష్ణే స్వయంగా స్టోరీ లైన్ ఇచ్చానని చెప్పాడు. అలాగే ఈ సీక్వెల్ని అయితే సింగీతం శ్రీనివాసరావు, లేకపోతే తానే డైరెక్ట్ చేస్తానని ప్రకటించాడు. ఈ ఒక్క సినిమాతో మోక్షజ్ఞని ఫుల్ గా ట్రైన్ చేస్తానని చెప్పాడు. దీంతో తండ్రీకొడుకులు కలిసి నటిస్తే చూడాలని బాలకృష్ణ అభిమానులు ఆసక్తిగా ఎదురు చూస్తున్నారు.
బాలకృష్ణ ఇప్పుడు వరుస సినిమాలతో బిజీగా ఉన్నాడు. 'అఖండ' పూర్తవ్వగానే గోపీచంద్ మలినేని సినిమాలో జాయిన్ అవుతున్నాడు. ఈ మూవీస్తో పాటు మరికొన్ని ప్రాజెక్టులు కూడా పైప్లైన్లో ఉన్నాయనే టాక్ వస్తోంది. అంటే మోక్షజ్ఞ ఈ ఏడాది కూడా కెమెరాముందుకు రావడం కష్టమనే కామెంట్స్ వస్తున్నాయి. మరి 27 ఏళ్ల మోక్షజ్ఞ వచ్చే ఏడాదైనా సినిమాల్లోకి వస్తాడా అనేది చూడాలి. మరి బాలయ్య అభిమానుల కోరిక ఎప్పుడు నెరవేరుతుందో చూడాలి.