మంత్రి హత్యకు కుట్ర కేసు.. ఆ బీజేపీ మహిళా నేత మెడకు?
అయితే.. నిందితులు ఢిల్లీలోని బీజేపీ నేత, మాజీ ఎంపీ జితేందర్ రెడ్డి ఇంట్లో ఆశ్రయం పొందడంతో ఇప్పుడు ఈ కుట్ర కేసులో ఆయన పాత్రపై అనుమానాలు వ్యక్తం అవుతున్నాయి. మంత్రి శ్రీనివాస్ గౌడ్ ను హత్య చేస్తే రూ.15కోట్లు ఇస్తామని మధుసూదన్రాజు, అమరేంద్రరాజు సుపారీ గ్యాంగ్కు ఆఫర్ చేశారని పోలీసులు చెబుతున్నారు.
అంతే కాదు.. ఈ హత్యకు కుట్రలో జితేందర్రెడ్డి పాత్రపై కూడా ఎంక్వయిరీ చేస్తామన్నారు. అంతే కాదు.. ఈ హత్య కేసులో మాజీ మంత్రి డీకే అరుణ అనుచరులపైనా అనుమానాలు ఉన్నాయంటున్నారు పోలీసులు.. సాంకేతిక ఆధారాల ఆధారంగా ఈ కేసు దర్యాప్తు చేస్తున్నామని పోలీసులు చెబుతున్నారు. ఈ కేసులో ప్రధాన నిందితుడైన నాగరాజు.. ఉత్తర్ప్రదేశ్ నుంచి ఆయుధాలు కొనుగోలు చేసినట్టు తమ విచారణలో తేలిందని పోలీసులు చెబుతున్నారు. ఈ కేసుకు సంబంధించి ఇప్పటి వరకు మొత్తం 8 మందిని పోలీసులు అరెస్టు చేశామని చెబుతున్నారు.
మంత్రి శ్రీనివాస్ గౌడ్ హత్యకు కుట్ర కేసు నిందితులను కస్టడీలోకి తీసుకుంటామంటున్నారు పోలీసులు.. వారిని కస్టడీలోకి తీసుకుని విచారిస్తేనే వాస్తవాలు వెలుగులోకి వస్తాయని.. ఆ తర్వాత పూర్తి వివరాలు వెల్లడిస్తామని సైబరాబాద్ సీపీ స్టీఫెన్ రవీంద్ర మీడియాకు తెలిపారు. తెలంగాణలో అసలే బీజేపీ, టీఆర్ఎస్ మధ్య సంబంధాలు భగ్గు మంటున్న సమయంలో ఈ హత్య కేసు విచారణ మరింత సంచలనాత్మకంగా మారింది. ఈ కేసు విచారణను రాజకీయంగానూ ఉపయోగించుకునే అవకాశాలు కనిపిస్తున్నాయి. మరి ఈ కేసు ఎన్ని మలుపులు తిరుగుతుందో చూడాలి.