కాంగ్రెస్ సంచలన నిర్ణయం.. రాహుల్ కాదంటే ఆ సీఎంకు అధ్యక్ష పీఠం!
ఇప్పటికే మంత్రి మండలి విస్తరణలో అశోక్ గెహ్లోత్ తలమునకలవుతున్నాడు. ఇలాంటి సందర్భంలో కాంగ్రెస్ అధిష్ఠానం అతడిని ఢిల్లీకి పిలిపించి, పార్టీ బాధ్యతలు అప్పగించాలని చూస్తున్నట్లు తెలుస్తోంది. ఇప్పటి వరకూ కాంగ్రెస్ అధ్యక్ష బాధ్యతలు చేపట్టే విషయంలో రాహుల్ గాంధీ నుంచి స్పష్టమైన హామీ ఏమీ అందలేదు. దీంతో గాంధీ కుటుంబానికి దగ్గరి వ్యక్తి అయిన అశోక్ గెహ్లోత్కు ఈ బాధ్యతలు అప్పగించేందుకు కాంగ్రెస్ అధిష్టానం సిద్ధమవుతోందట.
రాహుల్ అధ్యక్ష బాధ్యతలు చేపట్టకపోతే ఆ పదవిలో సీనియర్ నాయకుడిని ఎవరినైనా ఎన్నుకోవాలని పార్టీ కీలక నేతలు అభిప్రాయపడుతున్నారు. ఈ నేపథ్యంలోనే అశోక్ గెహ్లోత్ పేరు తెరమీదకొచ్చింది. సీనియర్ నేతలతో పాటు యువ నేతలతో కూడా గెహ్లోత్కు మంచి సంబంధాలున్నాయని, ఆయనయితే ఇరు తరాలకూ పటిష్ఠమైన వారథిగా వ్యవహరిస్తారని పార్టీ శ్రేణులు అభిప్రాయపడుతున్నట్లు సమాచారం. అయితే గతంలో ఇదే ప్రస్తావన వచ్చినప్పుడు గెహ్లాత్ నిరాకరించారు. తాను సీఎం పదవిని వదులుకునేందుకు సిద్ధంగా లేనని చెప్పారు. కాగా ఇప్పటి పరిస్థితుల్లో రాజస్థాన్ను విడిచిపెట్టి ఢిల్లీ వెళ్లేందుకు గెహ్లోత్ అంగీకరాస్తారో లేదో వేచి చూడాలి.