విడుదలకు ముందే నవ్విస్తున్న ఆర్ఆర్ఆర్...!
తెలుగు, తమిళం, కన్నడ, మళయాళం, హిందీ భాషల్లో ఆర్ఆర్ఆర్ రిలీజ్ కానుంది. అయితే ఇప్పటికే ఈ సినిమా గతేడాది జూన్ నెల నుంచి వాయిదాలు పడుతూనే ఉంది. జనవరి 7న పక్కా అని ప్రకటించిన నిర్మాతలు... అటు హిందీ, తమిళం, కన్నడ భాషల్లో ప్రీ రిలీజ్ ఈవెంట్ కూడా ఘనంగానే నిర్వహించారు. ఇక ఓవర్సీస్ బిజినెస్ కూడా భారీగానే జరిగింది. అంతా ఓకే... షాట్ రెడీ అనుకున్న సమయంలో యాక్షన్ బదులుగా బ్రేక్ చెప్పారు డైరెక్టర్ రాజమౌళి. దీంతో ఇప్పుడు సోషల్ మీడియాలో ఆర్ఆర్ఆర్ సినిమా గురించి తెగ జోకులు పేలుతున్నాయి. అసలు సినిమా రిలీజ్ చేస్తారా అని కొందరు అడుగుతుంటే... ఈ గోల ఎందుకు ఓటీటీలో విడుదల చేయండి... సరిపోతుంది కదా అని కొందరు సలహా ఇస్తున్నారు. మరి కొందరైతే... సినిమా విడుదలయ్యే సమయానికి తారక్, చెర్రీ ఇలా మారిపోతారేమో అంటూ మార్ఫింగ్ ఫోటోలతో సోషల్ మీడియాలో ట్రోల్ మొదలు పెట్టారు. ఇప్పటికే దాదాపు ఐదేళ్ల పాటు తారక్, చెర్రీ డేట్లు నాశనం చేశావు... ఇంకేంత కాలం పాడు చేస్తావు అంటూ రాజమౌళిపై వారి అభిమానులు దుమ్మెత్తి పోస్తున్నారు. ఏది ఏమైనా... జక్కన్న తన సినిమాను త్వరగా రిలీజ్ చేయకపోతే... మరెన్నో మాటలు పడాల్సి వస్తుంది మరి.