అమ్మకు ప్రేమతో మహేష్
సూపర్ స్టార్ మహేష్ బాబు, తండ్రి సూపర్ స్టార్ బిరుదుని అందుకుని ఇప్పటికీ దాన్ని నిలబెడుతూ తనదైన శైలిలో సినిమాలు చేస్తూ ముందుకు వెళ్తున్నారు. నాలుగు పదుల వయసు దాటినా సరే ఆయన అందం ఇప్పటికీ చెక్కుచెదరలేదు.. తండ్రి అందంతో పాటు నటనా వారసత్వం, మంచి గుణాలు అందిపుచ్చుకున్న మహేష్ ఇప్పటికీ ఎంతోమంది ఆడపిల్లల కలల రాకుమారుడు. అయితే అలాంటి మహేష్ బాబుకు తన తల్లి అంటే ఎంతో ప్రేమ. ఈ విషయాన్ని ఆయన సందర్భం వచ్చినప్పుడల్లా బయట పెట్టుకుంటూ ఉంటారు. ఈ రోజు వరల్డ్ మదర్స్ డే సందర్భంగా మహేష్ ఆయన తల్లి మధ్య ఉన్న ప్రేమ విషయాలను తెలుసుకుందాం.
సూపర్ స్టార్ కృష్ణ తాను సినిమాల్లోకి రాకముందే తన సొంత మరదలిని అంటే మహేష్ తల్లి ఇందిరను వివాహం చేసుకున్నారు. ఇందిర ద్వారా కృష్ణకు ఐదుగురు సంతానం. మహేష్ సోదరుడు రమేష్ బాబు, మహేష్ సోదరీమణులు మంజుల, ప్రియదర్శిని, పద్మావతి. ఇక సినిమాలలో తనకు పరిచయమైన విజయ నిర్మలను కృష్ణ రెండో వివాహం చేసుకున్నారు. తన భర్త నిర్ణయాన్ని తప్పు పట్టని ఇందిరాదేవి ఎప్పుడైతే కృష్ణ రెండో వివాహం చేసుకున్నారో అప్పటి నుంచి పూర్తిగా మీడియా కంట పడడం మానేశారు.
అంతకుముందు అడపాదడపా కృష్ణ సినిమా ఫంక్షన్స్ కు హాజరు అయ్యే ఆవిడ ఆ తర్వాత ఎలాంటి సినిమా ఫంక్షన్స్ కు హాజరు కాలేదు. మహేష్ బాబుకి తల్లి ఇందిర అంటే చాలా ఇష్టం. మహేష్ కూతురు సితార కూడా ఇందిర పోలికలను కలిగి ఉంటుంది, బహుశా మహేష్ అందుకే ఈ ఇద్దరి మీద అత్యంత ప్రేమ కనబరుస్తూ ఉంటారు. మహేష్ ఇప్పటికి కూడా చిన్నపిల్లాడిలా వాళ్ళ అమ్మను అసలు వదిలిపెట్టడు. అయోతే మహేష్ ఇందిరమీద ఎంత ప్రేమ కనబరిచేవాడో చిన్నమ్మ విజయనిర్మలను అంతే అభిమానించేవాడు. ఆమెను కూడా ఎంతో గౌరవంగా చూసేవారు మహేష్. పెద్దగా రాలేదు కానీ, ఒక వేళ ఏదన్నా మహేష్బాబు సినిమా ఫంక్షన్ కు ఇందిరాదేవి కనుక వస్తే మహేషే దగ్గరుండి మరీ ఆమె చేయి పట్టుకుని చాలా జాగ్రత్తగా తీసుకువచ్చి ఎంతో ఆప్యాయంగా చూసుకుంటారు.