తిరుమల శ్రీవారి భక్తులకు శుభవార్త..!
అలిపిరి మార్గం పూర్తిగా ఆధునీకరించేందుకు టీటీడీ భారీ ప్రణాళిక రూపొందించింది. భక్తులకు ఎలాంటి ఇబ్బందులు లేకుండా మరింత సౌకర్య వంతంగా మెట్లు నిర్మించేందుకు టీటీడీ ప్లాన్ చేసింది. ఇందుకోసం మొత్తం 25 కోట్ల రూపాయలు ఖర్చు చేస్తోంది. ఈ మొత్తం కూడా రిలయన్స్ గ్రూప్ ఆఫ్ ఇండస్ట్రీస్ అధినేత ముఖేష్ అంబానీ ఖర్చు చేస్తున్నారు. గతేడాదే పనులు ప్రారంభమైనప్పటికీ... కొవిడ్ కారణంగా మరమ్మతు పనులు ముందుకు సాగలేదు. నాటి నుంచి కూడా అలిపిరి మెట్లు మార్గాన్ని తిరుమల తిరుపతి దేవస్థానం అధికారులు మూసివేశారు. దీంతో ప్రస్తుతం భక్తులు శ్రీవారి మెట్టు మార్గం ద్వారానే కొండపైకి నడుచుకుంటూ వెళ్తున్నారు. గతేడాది ఆగస్టు నాటికే పూర్తి కావాల్సిన పనులు... ఆలస్యమయ్యాయి. ఇప్పుడు ఆధునీకీకరణ పనులు తుది దశకు చేరుకున్నాయి. ప్రస్తుతం లైటింగ్, పెయింటింగ్ పనులు శర వేగంతో పూర్తి చేస్తున్నారు అధికారులు. ఈ ఏడాది దసరా నవరాత్రుల సమయానికి అన్ని పూర్తి చేయాలని ముందుగా టార్గెట్ పెట్టుకున్నారు. అయితే అనుకున్న సమయాని కంటే ముందుగానే అక్టోబర్ ఒకటి నుంచి అలిపిరి నడక మార్గంలో భక్తులను అనుమతిస్తున్నట్లు టీటీడీ అధికారులు వెల్లడించారు. భక్తులకు ఎలాంటి ఇబ్బందులు లేకుండా.... పూర్తి సౌకర్య వంతంగా మెట్లు నిర్మించామన్నారు. అలాగే.. భక్తుల భద్రతను కూడా దృష్టిలో పెట్టుకున్నట్లు టీటీడీ అధికారులు వెల్లడించారు.