బర్రెలక్క ఎన్నికల అఫిడవిట్, మేనిఫెస్టో వివరాలు వైరల్?
ఇక ఈసారి తెలంగాణ అసెంబ్లీ ఎన్నికల్లో సోషల్ మీడియాలో బాగా బలంగా వినిపిస్తున్న పేరు.. బర్రెలక్క! డిగ్రీ చదివినా కూడా ఆమెకు ఉద్యోగం రావడం లేదని, అందుకే గేదెలు కాస్తూ బతుకుతున్నానంటూ గతంలో వీడియోలు తీసి సోషల్ మీడియాలో పోస్టు చేసి బాగా వైరల్ అయ్యి గుర్తింపు తెచ్చుకున్న ఈ 26 ఏళ్ల యువతి అసలు పేరు కర్నె శిరీష. అయితే నాడు ఆమె పెట్టిన ఆ పోస్టు ప్రభుత్వానికి వ్యతిరేకంగా ఉందంటూ పెద్దకొత్తపల్లి పోలీసులు ఆమెపై కేసు నమోదు చేశారు.ఇక ఆమెను ప్రస్తుతం యూట్యూబ్ లో 1.66 లక్షల మంది, ఇన్ స్టాగ్రామ్ లో 5.97 లక్షల మంది, ఫేస్ బుక్ లో 1.12 లక్షల మంది ఫాలో అవుతున్నారు. ప్రస్తుత ఎన్నికల్లో ఆమె నాగర్ కర్నూల్ జిల్లా కొల్లాపూర్ నుంచి ఇండిపెండెంట్ అభ్యర్థిగా నామినేషన్ వేసి అందరి దృష్టినీ ఎంతగానో ఆకర్షించారు. శిరీష అంబేడ్కర్ ఓపెన్ యూనివర్సిటీ ద్వారా బీకాంని పూర్తి చేశారు. నిరుద్యోగ సమస్యపై పోరాటం చేయడానికి అసెంబ్లీకి పోటీ చేస్తున్నట్లు ఆమె చెబుతున్నారు.ఇక ఇందులో భాగంగా ఇప్పటికే మ్యానిఫెస్టోని కూడా విడుదల చేశారు.
ఉద్యోగ నోటిఫికేషన్ల విడుదలకు పోరాటం చేస్తానని ఆమె ప్రచారం చేస్తున్నారు.ఈ బర్రెలక్క ఎన్నికల మేనిఫెస్టోలో ప్రధానంగా నిరుద్యోగ సమస్యనే ప్రచార అస్త్రంగా మార్చుకున్నారు. తనని కనుక గెలిపిస్తే, నిరుద్యోగుల తరపున అసెంబ్లీలో ప్రభుత్వాన్ని ప్రశ్నిస్తానని మేనిఫెస్టో లో ఆమె పేర్కొనడం జరిగింది.ఇంకా ఇదే సమయంలో... పేదల ఇళ్ల నిర్మాణానికి కృషి, నిరుద్యోగులందరికీ భృతి ఇప్పించేందుకు కృషి, ప్రతి గ్రామానికి రోడ్లు నిర్మాణం, ఉచిత విద్య, వైద్యం ఇంకా నిరుద్యోగులకు ప్రత్యేక కోర్సులు... అనేవి ఆమె మేనిఫెస్టోలోని ప్రధాన అంశాలుగా ఉన్నాయి.ఇక అసెంబ్లీ ఎన్నికల్లో పోటీ చేస్తున్న బర్రెలక్క ఎన్నికల కమిషన్ కు సమర్పించిన అఫిడవిట్ వివరాల మేరకు.. ఆమె ఆస్తులు, అప్పుల వివరాలను ఈసీ వెబ్ సైట్ లో పేర్కొంది.ప్రస్తుతం బర్రెలక్క చేతిలో ఉన్న సొమ్ము మొత్తం రూ.5000 కాగా.. బ్యాంకు బాలన్స్ వచ్చేసి రూ.1500. ఇక తల్లితండ్రులు ఇచ్చిన ఆస్తి రేకుల షెడ్ కాగా.. బీకాం చదివి ఆమె నిరుద్యోగిగా ఉంటుంది. ఆమె వృత్తి.. కేవలం బర్రెల పెంపకం. వాహనాలు, అప్పులూ ఏమీ లేవు. ఇంకా ఇదే సమయంలో... సోషల్ మీడియాలో పోస్ట్ చేసిన వీడియోకు సంబంధించి తనపై ఒక కేసు (ఐపీసీ 505 (2)) కోర్టులో ఉన్నట్లుగా కూడా ఆమె ప్రస్తావించారు.