कोरोनाच्या पार्श्वभूमिवर पंतप्रधान मोदी करणार देशाला संबोधित
नवी दिल्ली : जगभरात थैमान घालणाऱ्या कोरोना व्हायरसने भारतात पाऊल ठेवण्यास सुरूवात केली आहे. आतापर्यंत कोरोनाची लागण होऊन भारतात तीन जणांचा मृत्यू झाला आहे. तर 170 नागरिक या व्हायरसमुळे बाधित झाले आहे. कोरोना व्हायरसमुळे भारतातील नागरिक धास्तावले आहेत. सगळीकडे कोरोना व्हायरसने हाहाकार घातला आहे. कोरोनाच्या पार्श्वभूमीवर भारतातील प्रशासकीय यंत्रणा सतर्क झाल्या आहेत. याच पार्श्वभूमीवर पंतप्रधान नरेंद्र मोदी आज भारतीय नागरिकांना संबोधित करणार आहे.
कोरोना विषयी मोदींची मोठी बैठक, आज देशाला संबोधित करणार
बुधवारी संध्याकाळी पंतप्रधान नरेंद्र मोदींनी कोरोना व्हायरस संदर्भात मोठी बैठक घेतली. या बैठकीस वरिष्ठ अधिकारी उपस्थित होते, या दरम्यान देशातील रुग्णालये, कोरोना अहवाल तपासणी केंद्रे आणि सर्व प्रवाशांची व्यवस्था यावर चर्चा झाली. यानंतर पंतप्रधान आज रात्री 8 वाजता देशाला संबोधित करणार आहे. अशी माहिती पंतप्रधान कार्यालयाकडून सांगण्यात आली आहे. आपणास कल्पना असेल की यापूर्वी पंतप्रधान नरेंद्र मोदींनी नोटाबंदीच्या वेळी तसेच अवकाश क्षेपणास्त्र प्रक्षेपित करताना देशाला संबोधित केले होते.
लॉकडाऊन होणार नाही...
पंतप्रधान कार्यालयाने कोरोना व्हायरसमुळे देशात लॉकडाऊन होणार नाही हे अगोदरच स्पष्ट केलं आहे. सूत्रांकडून मिळालेल्या माहितीनुसार पंतप्रधान कार्यालयाने म्हटले आहे की पंतप्रधान नरेंद्र मोदी आज रात्री 8 वाजता आपल्या अभिभाषणात लॉकआउट सारखी कोणतीही घोषणा करणार नाहीत. नागरिकांनी अशा अफवांवर विश्वास ठेऊ नये देशावर लॉकडाऊन सारखी परिस्थिती अजून ओढवली नाहीये.
देशात कोरोना व्हायरची प्रकरणे समोर येऊ लागली आहेत तज्ञांपासून ते सरकारपर्यंत नागरिकांना आपल्या घरात राहण्याचा सल्ला दिला जात आहे. सर्दी खोकला असलेल्या रुग्णांपासून दूर रहा, गर्दीच्या ठिकाणी जाऊ नका. असे प्रशासनाकडून सांगण्यात येत आहे. कोरोनाचा परिणाम अनेक राज्यात दिसून येत आहे. याची खबरदारी म्हणून अनेक राज्यातील शाळा, महाविद्यालय, मॉल, सिनेमा हॉल बंद करण्यात आले आहे.
पंतप्रधान अमेरिकेसारखा निर्णय घेतील का?
अमेरिकेतही कोरोना विषाणूमुळे 8000 हून अधिक पॉझिटिव्ह रुग्ण आढळले आहेत, तर 100 पेक्षा जास्त लोकांचा मृत्यू झाला आहे. यानंतर अमेरिकेचे राष्ट्राध्यक्ष डोनाल्ड ट्रम्प यांनी कोरोना विषाणूची स्थिती राष्ट्रीय आणीबाणी म्हणून जाहीर केली आणि लोकांमधून बाहेर पडू नये असे आवाहन केले - एका ठिकाणी 10 पेक्षा जास्त लोक एकत्र आले नाहीत. एवढेच नव्हे तर अमेरिकेने आपल्या सीमांवर शिक्कामोर्तब केले, युरोपमधून (ब्रिटन वगळता) येणार्‍या लोकांना बंदी घातली. अशा परिस्थितीत कोरोना विषाणूचा धोका लक्षात घेता असे काही उपाय भारतातही करता येतील, हे पंतप्रधानांच्या भाषणानंतरच स्पष्ट होईल.
आतापर्यंत भारतात कोण कोणते निर्णय घेतले गेले आहेत?
देशात कोरोना विषाणूची 170 प्रकरणे नोंदली गेली आहेत. या प्रकरणात तीन नागरिकांचा मृत्यू झाला आहे. विदेशातून येणाऱ्या सर्व नागरिकांची स्क्रीनिंग करणे, 15 एप्रिलपर्यंत नवीन व्हिसावर बंदी घालणे, कोरोनाचा प्रसार रोखण्यासाठी काही ओळखल्या गेलेल्या देशांच्या नागरिकांच्या प्रवेशावर बंदी आणणे यासारखे निर्णय केंद्र सरकारने घेतले आहेत.
याशिवाय उत्तर प्रदेश, दिल्ली, महाराष्ट्र, मध्य प्रदेश, राजस्थान, बिहार, तेलंगणा, कर्नाटक, केरळ, बंगाल, आसाम, अरुणाचल प्रदेश यासह डझनहून अधिक राज्यांनी येथे आपली शाळा-महाविद्यालये बंद केली आहेत. काही राज्यांत मॉल, सिनेमा हॉल, सार्वजनिक सभा, मेळावे, राजकीय कार्यक्रमांनाही बंदी घालण्यात आली आहे.