ఏపీ బీజేపీ: మోదీ చరిష్మాయే దిక్కా?
ఇప్పటి వరకు పోరుబాట, పల్లెనిద్ర వంటి కార్యక్రమాలు చేపట్టి ప్రజల్లోకి వెళ్లింది. ఎప్పుడు అయితే చంద్రబాబు దిల్లీ వెళ్లి అమిత్ షాతో భేటీ అయ్యారో ఒక్కసారిగా క్యాడర్ లో అయోమయం నెలకొంది. పొత్తు ఉంటుందా.. ఉండదా.. ఉంటే తమకు కేటాయించే స్థానాలు ఎన్ని. అందులో తమకు సీటు వస్తుందా రాదా అనే సందేహాలు స్థానిక నాయకుల్లో సందేహాలు నెలకొన్నాయి. దీంతో పార్టీ కార్యక్రమాలపై దృష్టి సారించడం లేదు.
కాకపోతే ఈ అంశాలను పార్టీ అధిష్ఠానం చూసుకుంటుంది కాబట్టి ముందుగా స్థానిక నాయకులు ప్రజలను కలిసి ఈ రాష్ట్రానికి, దేశానికి బీజేపీ ఏం చేసింది. గత కాంగ్రెస్ పాలనకు, బీజేపీ ప్రభుత్వానికి మధ్య వ్యత్యాసం చూపుతూ క్షేత్రస్థాయి ప్రాచారానికి వెళ్లాలని రాజకీయ విశ్లేషకులు చెబుతున్నారు. మరోవైపు వికసిత్ సంకల్ప్ పేరిట తెలంగాణలో బీజేపీ పార్టీ కార్యక్రమాలు చురుగ్గానే చేపడుతున్నా ఏపీలో మాత్రం అంతంతమాత్రంగానే పార్టీ కార్యక్రమాలు కొనసాగుతున్నాయి.
గతంలో ఇంటింటికీ వెళ్లి ప్రచారం చేసే పార్టీలుగా కమ్యూనిస్టులు, బీజేపీ నాయకులకు గుర్తింపు ఉంది. కానీ ప్రస్తుత పరిస్థితులు మారిపోయాయి. నాయకుల వెంట కార్యకర్తలు తిరగడం ప్రారంభించాక.. కార్యకర్తలకు ప్రజలతో సంబంధాలు తగ్గిపోయాయి. ప్రస్తుతం పొత్తు ఉంటే గెలుస్తారు అనే నమ్మకం ఉన్నప్పుడు పొత్తు లేకపోయినా గౌరవ ప్రదమైన ఓటు బ్యాంకు కలిగి ఉండేలా ప్రణాళికలు రచించాలని విశ్లేషకులు కాషాయ నేతలకు సూచిస్తున్నారు. ఇంకెంత కాలం మోదీ చరిష్మా అడ్డు పెట్టుకొని ప్రచారం చేస్తారని ప్రశ్నిస్తున్నారు.