“ఫోన్ లేక, ఫీడ్బ్యాక్ లేదు – జగన్ రియాలిటీ చెక్ ఎప్పుడంటే?”
వైసీపీ అధినేత, మాజీ ముఖ్యమంత్రి జగన్మోహన్ రెడ్డి పత్రికా సమావేశాలు, ప్రసంగాలు వింటుంటే, ఆయన ప్రజలకు బిర్యానీ పెడితే, ప్రస్తుత కూటమి ప్రభుత్వం పస్తులు ఉంచుతోందన్న భ్రమలో ఉన్నట్లు స్పష్టమవుతోంది. తన పాలన స్వర్ణయుగం అని, కూటమి హయాంలో ప్రజలకు ఏమీ అందడం లేదని ఆయన ఎంత సీరియస్గా చెబుతున్నారంటే... ఆయన ఏదో లోకంలో బతుకుతున్నారని ఎవరికైనా అర్థమైపోతుంది. జగన్మోహన్ రెడ్డికి ఎవరో రాసిచ్చిన విషయాలే నిజమని నమ్ముతున్నట్లు కనిపిస్తోంది. తన హయాంలో జరిగిన వాస్తవాలు, వైఫల్యాలు ఆయనకు తెలియవన్నట్లుగా వ్యవహరిస్తున్నారు. పథకాలు అద్భుతంగా అమలయ్యాయని ఆయన ఎంత కాన్ఫిడెంట్గా చెబుతున్నారంటే, 2024 ఎన్నికల్లో తమ పార్టీకి కేవలం పదకొండు సీట్లే వచ్చాయన్న విషయం కూడా ఆయనకు గుర్తు లేనట్లుగా అనిపిస్తుంది.
నిన్నటి ప్రెస్ మీట్లో ఆయన పంటల బీమా గురించి ప్రస్తావించారు. కానీ, తన పాలనలో మూడేళ్ల పాటు పంటల బీమాను జగన్ రెడ్డి ఎగ్గొట్టారు. ఈ విషయాన్ని పార్లమెంట్లో స్వయంగా కేంద్ర మంత్రి చెప్పారు. అసెంబ్లీలో కూడా జగన్ ఈ విషయాన్ని అంగీకరించి, ప్రభుత్వం తరఫున సొంత ఇన్సూరెన్స్ కంపెనీ పెడతామని ప్రకటించారు. ఇలాంటి కీలకమైన వాస్తవాలు ఆయనకు గుర్తు లేవు, లేదా గుర్తు లేనట్లు నటిస్తున్నారు. పంటల మద్దతు ధర దగ్గర నుంచి ప్రతి విషయంలోనూ జగన్ వైఖరి ఇంతే. తన పాలనలో ప్రజలందరూ సుఖ సంతోషాలతో ఉన్నారని ఆయన గట్టిగా నమ్ముతున్నారు. అయితే, ఇప్పుడెందుకు కూటమి పాలనలో ప్రజలు కష్టాలు పడుతున్నారని ఆయన భావిస్తున్నారనే ప్రశ్న తలెత్తుతుంది. దీనికి ప్రధాన కారణం: ఆయనకు సరైన ఫీడ్బ్యాక్ అందడం లేదు. జగన్ రెడ్డి తనకు సొంతంగా ఫోన్ లేదని చెబుతూ ఉంటారు. అంటే, ఆయనకు రెగ్యులర్ అప్డేట్స్ రావు.
సజ్జల లేదా సాక్షి పత్రిక నుంచి వచ్చే రిపోర్టులే ఆయనకు బైబిల్ వాక్యాలు. వాటినే నమ్ముతారు. కనీసం ఒక ఫోన్ ఉండి, అందులో సోషల్ మీడియాను స్క్రోల్ చేస్తూ ఉంటే... ఆయనకు కొన్ని పచ్చి నిజాలు తెలిసే అవకాశం ఉంది. కానీ, అలాంటి ప్రయత్నం ఆయన చేయడం లేదు. పరిష్కారం: నిజాయితీని ఆహ్వానించాలి .. జగన్మోహన్ రెడ్డి ఇప్పటికైనా సజ్జల లాంటి వారినో, సాక్షి పత్రిక నుంచి వచ్చే రిపోర్టుల్నో కాకుండా... తనకు నిజాయితీగా పరిస్థితుల్ని విశ్లేషించి చెప్పే మార్గాన్ని ఎంపిక చేసుకోవాలి. చేదు వార్తలు చెప్పినా, వాటిని పాజిటివ్గా తీసుకుని మార్చుకునే మైండ్సెట్ తెచ్చుకుంటే, చాలా మంది నిజాలు చెప్పడానికి ముందుకు వస్తారు. అప్పుడు తమ లోపాలను సరిదిద్దుకోవచ్చు. అలాంటిదేమీ లేకుండా ఇలా... 'వేరే లోకంలో' ఉంటూ, వాస్తవాలకు దూరంగా మాట్లాడుతూ పోతే, ప్రజలు పట్టించుకోవడం మానేస్తారు. ఇప్పటికే సగం మంది ప్రజలు ఆయనకు డిటాచ్ అయిపోయారు. మిగతా వారు కూడా అలాగే అయిపోతారు. అప్పుడు నిజాలు తెలుసుకున్నా ప్రయోజనం ఉండదు. రాజకీయాల్లో వాస్తవాల అంచనా (Ground Reality) ఎంత ముఖ్యమో 2024 ఎన్నికల ఫలితం స్పష్టంగా నిరూపించింది.