ఆసక్తికరంగా మారిన పిఠాపురం ఎమ్మెల్యే పవన్ జీతం?
ఆంధ్ర ప్రదేశ్ లో ఈమధ్యనే జరిగిన సార్వత్రిక ఎన్నికలు వార్ వన్ సైడ్ అన్న సంగతి తెలిసిందే. 175 స్థానాల్లో కూటమి అభ్యర్థులు ఏకంగా 164 స్థానాల్లో గెలిచి సరికొత్త రికార్డ్ సృష్టించడం జరిగింది.దీంతో 11 స్థానాలకు పరిమితమైన వైసీపీకి ప్రధాన ప్రతిపక్ష హోదా కూడా రాని పరిస్థితి నేడు వచ్చింది. చాలా దారుణాతి దారుణంగా ఓడిపోయింది. అయితే కూటమి ఈ స్థాయిలో విజయం సాధించడంలో జనసేన అధినేత పవర్ స్టార్ పవన్ కల్యాణ్ కీలక పాత్ర పోషించారనేది నిర్వివాదాంశం అనే చెప్పుకోవాలి. ప్రధానంగా స్కిల్ డెవలప్మెంట్ కేసులో చంద్రబాబు నాయుడు జైల్లో ఉన్నప్పుడు.. రాజమండ్రి సెంట్రల్ జైల్ బయట పవన్ కళ్యాణ్ చేసిన వ్యాఖ్యలు... ఆంధ్రప్రదేశ్ లో ఒక్కసారిగా రాజకీయ వాతావరణాన్ని మార్చేశాయనే చెప్పాలి. ఆ కామెంట్స్ జనాల్లోకి బాగా వెళ్లాయి.ఇక గతంలో పోటీ చేసిన రెండు చోట్ల కూడా ఓడిపోయినా.. ఏమాత్రం వెనక్కి తగ్గకుండా పూర్తిస్థాయిలో పోరాటపటిమ చూపించారు పవర్ స్టార్ పవన్ కళ్యాణ్.
ఈ క్రమంలో ఈసారి పిఠాపురం నియోజకవర్గాన్ని ఆయన ఎంచుకున్నారు. అక్కడ నుంచి పోటీ చేసి 70,279 ఓట్ల మెజారిటీతో విజయం సాధించారు.ఇది నిజంగా ఒక చరిత్ర అనే చెప్పాలని అంటున్నారు జనసేన ఫ్యాన్స్.ఇలా పిఠాపురం నియోజకవర్గ ఎమ్మెల్యేగా ఎన్నికైన పవన్ కల్యాణ్ తీసుకోబోయే వేతనం ఎంత అనే విషయంపై సోషల్ మీడియాలో ఆసక్తికర చర్చ నడుస్తుంది. తాజాగా ఈ విషయం తెరపైకి వచ్చింది. అందుకు ఒక బలమైన కారణం కూడా ఉంది. ఇందులో భాగంగా... తాను ఎమ్మెల్యేగా గెలిచిన తర్వాత పూర్తి జీతం తీసుకుంటానని పవన్ కళ్యాణ్ తెలిపారు. దీంతో ఆయన జీతం ఎంతనేది ఇప్పుడు ఆసక్తిగా మారింది.అయితే... పిఠాపురం ఎమ్మెల్యేగా జనసేన అధినేత పవన్ కల్యాణ్ 3.35 లక్షల రూపాయలు జీతం తీసుకోనున్నారు. ఆంధ్రప్రదేశ్ లో ఒక్కో ఎమ్మెల్యేకు నియోజకవర్గ ఇతర అలవెన్సులను అన్నీ కలిపి రూ.3.365 లక్షల జీతం ఇస్తారు. దీంతో... పవన్ కల్యాణ్ జూలై నుంచి ఈ జీతం తీసుకోనున్నారు. కాగా... దేశంలో అత్యధికంగా తెలంగాణ రాష్ట్రంలో ఎమ్మెల్యేలు రూ. 4 లక్షల జీతం తీసుకుంటున్నారు.