విజయం మీదే : ఈ లక్షణాలను కలిగి ఉంటే సులువుగా విజయం మీ సొంతం
ఎవరైతే గతంలో వృథా చేసిన కాలం గురించి ఆలోచించకుండా శ్రమిస్తారో వాళ్లు సులభంగా విజయం పొందగలరు. గతాన్ని తలుచుకుని బాధ పడటం వల్ల మన కెరీర్ కు, భవిష్యత్తుకు నష్టమే తప్ప ఎలాంటి ప్రయోజనం ఉండదు. గత వైఫల్యాలలోని పొరపాట్లను సరిదిద్దుకుని సక్సెస్ కోసం శ్రమిస్తే ఆశజనకమైన ఫలితాలు వస్తాయి. మనం డబ్బును ఎప్పుడూ సరైన మార్గంలోనే సంపాదించడానికి ప్రయత్నించాలి.
మోసం చేయడం ద్వారా సంపాదించిన డబ్బు వల్ల ఏదో ఒకరోజు సమస్యలు తప్పవు. ఏ పని చేసేముందైనా 'ఏదైనా చేయటానికి నాకు ఏమి అవసరం? దీనివలన ఏం ఫలితం ఉంటుంది? దీని విలువ ఏమిటి?' అనే ప్రశ్నలు వేసుకుంటే మనం ఎలాంటి సందర్భంలోనైనా సరైన నిర్ణయాలు తీసుకోగలుగుతాం. భవిష్యత్తుకు సంబంధించి నిర్ణయాలు తీసుకునే ముందు మనం చేసే ప్రతి చర్యను పూర్తిగా ఆలోచించాలి.
మనకు ఎన్ని సమస్యలు ఉన్నా, ఇబ్బందులు ఉన్నా అవతలి వ్యక్తులతో ఎప్పుడూ ఒకే విధంగా ఉండాలి. సందర్భాన్ని బట్టి ఒక్కో సందర్భంలో ఒక్కోలా ప్రవర్తిస్తే చులకన భావం ఏర్పడే అవకాశం ఉంటుంది. మనం విజయం సాధించినా, ఉన్నత శిఖరాలను అధిరోహించినా ఇతరుల నుంచి ప్రశంసలను ఆశించకూడదు. మనతో పాటు ఏ పనిలోనైనా పోటీ పడే వ్యక్తులను తక్కువగా అంచనా వేయకూడదు. ఈ విధంగా శ్రమిస్తే జీవితంలో ఉన్నత శిఖరాలను అధిరోహించగలుగుతాం.