అత్యధిక లాభాలు తెచ్చిన ఇండియన్ మూవీ ఇదే?
ఇండియాలో అత్యధిక వసూళ్లు సాధించిన సినిమా ఏది అంటే ఏమాత్రం ఆలోచించకుండా ఖచ్చితంగా అందరూ ఆమిర్ ఖాన్ నటించిన దంగల్ పేరు చెబుతారు.ఆ తరువాత బాహుబలి, kgf 2, rrr అని చెబుతారు. కానీ వీటికంటే ఎన్నో రెట్లు అత్యధిక లాభాలు ఆర్జించిన సినిమా ఒకటి ఉంది. అదే సీక్రెట్ సూపర్ స్టార్.దంగల్, బాహుబలి, ఆర్ఆర్ఆర్, kgf 2, జవాన్, పఠాన్ లాంటి సినిమాలు రూ.1000 కోట్లకుపైనే వసూలు చేశాయి. కానీ వాటి బడ్జెట్ తో పోలిస్తే ఈ సినిమాలన్నీ మహా అయితే ఒక ఐదారు రెట్లు ఎక్కువ వసూలు చేశాయి. కానీ 2017లో వచ్చిన సీక్రెట్ సూపర్ స్టార్ అనే మూవీని కేవలం రూ.15 కోట్ల బడ్జెట్ తో తెరకెక్కించగా.. అది ప్రపంచవ్యాప్తంగా ఏకంగా రూ.900 కోట్లు పైగా వసూలు చేసింది.అంటే ఈ సినిమాకి పెట్టిన బడ్జెట్ కంటే 60 రెట్లు ఎక్కువ వసూళ్లు రావడం విశేషం. ఆ రకంగా ఇండియన్ సినిమాలో అత్యధిక లాభాలు పొందిన సినిమాగా ఈ సీక్రెట్ సూపర్స్టార్ నిలిచింది. బాలీవుడ్ సీనియర్ స్టార్ హీరో ఆమిర్ ఖాన్ కు చెందిన ఆమిర్ ఖాన్ ప్రొడక్షన్.. జైరా వసీం అనే నటితో తీసిన సినిమా ఇది. ఈ మూవీలో పెద్ద స్టార్లు ఎవరూ లేరు. భారీ బడ్జెట్ తో తీసిన యాక్షన్ సీన్స్, గ్రాఫిక్స్ కూడా అసలు లేనే లేవు.అయినా ఈ సినిమా ప్రపంచవ్యాప్తంగా సినిమా ప్రేక్షకులను బాగా బాగా ఆకర్షించింది.
15 కోట్ల బడ్జెట్ తో ఏకంగా రూ.900 కోట్లు వసూలు చేయడం అంటే మాటలు కాదు. దంగల్ మూవీలాగే ఈ సినిమాకు కూడా ఎక్కువ భాగం చైనా దేశం నుంచే వసూళ్లు వచ్చాయి. సీక్రెట్ సూపర్స్టార్ సినిమా వసూళ్లలో 90 శాతం ఒక్క చైనా నుంచే రావడం విశేషం. ఓ ఫిమేల్ లీడ్ సినిమాకు వచ్చిన అత్యధిక వసూళ్లు కూడా ఇవే.సీక్రెట్ సూపర్ స్టార్ సినిమాలో ఆమిర్ ఖాన్ అతిథి పాత్రలో నటించాడు. అప్పటికి 15 ఏళ్ల వయసున్న జైరా వసీం చుట్టూనే ఈ సినిమా కథ తిరుగుతుంది. ఇండియాలో ఈ సినిమా రిలీజై మొత్తం రూ.90 కోట్ల గ్రాస్ కలెక్షన్లు రాబట్టింది. ఇక అందులో రూ.64 కోట్ల నెట్ వసూళ్లు ఉన్నాయి. ఇక ఓవర్సీస్ నుంచి ఈ సినిమాకి మరో రూ.65 కోట్లు వచ్చాయి. ఆ లెక్కన మొదటిసారి రిలీజైనప్పుడు ఈ సినిమాకి ప్రపంచవ్యాప్తంగా రూ.155 కోట్ల గ్రాస్ వసూళ్లు వచ్చాయి.మరుసటి ఏడాది అంటే 2018లో ఇదే మూవీని చైనాలో రిలీజ్ చేశారు. ఆ దేశంలో ఏకంగా 10 కోట్ల డాలర్లకు పైనే ఈ మూవీ వసూలు చేసింది. దీంతో మొత్తంగా ప్రపంచవ్యాప్తంగా ఏకంగా రూ.905 కోట్ల వసూళ్లు సాధించి అత్యధిక లాభాలు సాధించిన ఇండియన్ మూవీగా నిలిచింది.