విజయం మీదే : మిమ్మల్ని మీరు నమ్మితే విజయం మీ సొంతం
జీవితంలో ఏ పనిని మొదలుపెట్టినా ఆ పనిలో తప్పనిసరిగా విజయం సాధించాలని ప్రతిఒక్కరూ కోరుకుంటారు. కానీ చాలా సందర్భాలలో మొదలుపెట్టిన పనుల్లో సమస్యలు, ఇబ్బందులు, ఆటంకాలు ఏర్పడతాయి. అలాంటి సమయంలో చాలామంది నిరాశానిస్పృహలకు లోనవుతారు. తమపై తామే అపనమ్మకం పెంచుకుంటారు. కానీ జీవితంలో ఏ పనిలోనైనా విజయం సాధించాలంటే మొదట మనల్ని మనం నమ్మాలి.
మీ ఆలోచనలపై మీకున్న నమ్మకాన్ని ఎల్లప్పుడూ విశ్వసించాలి. మిమ్మల్ని మీరే నమ్మకపోతే అనవసరమైన భయాలు పెరిగి ఆందోళన పడతారు. నమ్మకం ఉంటే ఎలాంటి అసాధ్యాన్నైనా సుసాధ్యం చేసుకోవచ్చని గుర్తుంచుకోవాలి. మీరు ఎదుగుతున్న క్రమంలో మీ ఎదుగుదలను తట్టుకోలేక కొందరు ఆటంకాలను కలిగించే అవకాశం ఉంది. అలాంటి సమయాల్లో కూడా నమ్మకంతో చేపట్టిన పనుల్లో ముందడుగు వేస్తే విజయం మీ సొంతమవుతుంది.
పిరికితనంతో, అపనమ్మకంతో ప్రయత్నాలు చేస్తే ఫలితాలు కూడా అదే విధంగా ఉంటాయని గుర్తుంచుకోవాలి. మన నమ్మకమే జీవితంలో ఎలాంటి పరిస్థితులలోనైనా మనల్ని విజయతీరాలకు చేరుస్తుంది. ఓటమి ఎదురైనా నమ్మకం ఉంటే ఆలస్యంగానైనా విజయం సొంతమవుతుంది. ఆ నమ్మకమే మనల్ని జీవితంలో ఉన్నత శిఖరాలకు చేరుస్తుంది. కష్టపడితే ఫలితం ఉంటుందని నమ్మితే ఎంత నమ్మకానికి అంత బలం తోడై విజయం సొంతమవుతుంది.