విజయం మీదే : ఈ విధంగా శ్రమిస్తే సులభంగా విజయం సాధించడం సాధ్యమే
అనంతరం లక్ష్యం కోసం అవసరమైన వాటిని సమకూర్చుకోవాలి. అప్పటికే ఆ రంగంలో విజయం సాధించిన వారి నుంచి మనం సక్సెస్ సాధించడానికి కావాల్సిన సహాయసహకారాలు తీసుకోవాలి. లక్ష్యం గురించి పరిపూర్ణ అవగాహన ఏర్పరచుకోవడంతో పాటు లక్ష్యాన్ని సాధించడానికి సరైన ప్రణాళికను రూపొందించుకోవాలి. ఆ ప్రణాళికను క్రమం తప్పకుండా పాటించేలా ఏర్పాట్లు చేసుకోవాలి. లక్ష్యాన్ని సాధించే వరకు అనవసరమైన వ్యాపకాలకు, సోషల్ మీడియాకు దూరంగా ఉంటే మరీ మంచిది.
లక్ష్య సాధనలో నిర్దేశించుకున్న ప్రణాళికను అనుకున్న ప్రకారం పూర్తి చేయడం చాలా ముఖ్యం. కొన్ని సందర్భాల్లో వివిధ కారణాల వల్ల ప్రణాళికను అనుకున్న ప్రకారం పూర్తి చేయడం సాధ్యం కాదు. అలాంటి సందర్భాల్లో ప్రత్యేక ప్రణాళిక ద్వారా సిలబస్ ను పూర్తి చేయాలి. వారానికి ఒకసారి క్రమం తప్పకుండా మనం చదివిన సిలబస్ ను రివిజన్ చేసుకోవాలి. అప్పుడే మనం చదివింది ఎంతవరకు గుర్తుందో తెలుస్తుంది
పోటీ పరీక్షలకు ప్రిపేర్ అవుతున్న సమయంలో ఎప్పటికప్పుడు మాక్ టెస్టుల ద్వారా మనం ఎలాంటి ప్రశ్నలకు సరైన సమాధానాలు ఇవ్వగలుగుతున్నామో ఎలాంటి ప్రశ్నలకు ఇవ్వలేక పోతున్నామో గుర్తించాలి. మన బలాలను, బలహీనతలను మనం గుర్తించగలిగితే ఏ పనిలోనైనా విజయం సాధించడం సాధ్యమే. లక్ష్యానికి మనల్ని దూరం చేసే పొరపాట్లను సరిదిద్దుకుంటూ పోటీ పరీక్షల్లో సక్సెస్ కోసం ప్రయత్నిస్తే సులభంగా విజయం సాధించగలుగుతాం.