ಗೆದ್ದು ಬೀಗಿದ ಕರ್ನಾಟಕ, ಎಂಟರ ಘಟ್ಟಕ್ಕೆ ಎಂಟ್ರಿ
ಬೆಂಗಳೂರು: ನಿರ್ಣಾಯಕ ಹಣಾಹಣಿಯಲ್ಲಿ ಬರೋಡ ತಂಡವನ್ನು ಮಣಿಸಿದ 8 ಬಾರಿಯ ಚಾಂಪಿಯನ್ ಕರ್ನಾಟಕ ತಂಡ 86ನೇ ಆವೃತ್ತಿಯ ರಣಜಿ ಟ್ರೋಫಿ ದೇಶೀಯ ಕ್ರಿಕೆಟ್ ಟೂರ್ನಿಯಲ್ಲಿ ಎಂಟರ ಘಟ್ಟಕ್ಕೆ ಪ್ರವೇಶ ಪಡೆಯಿತು. ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ 9ನೇ ಹಾಗೂ ಅಂತಿಮ ಸುತ್ತಿನ ಪಂದ್ಯದಲ್ಲಿ ಕರುಣ್ ನಾಯರ್ ಪಡೆ 8 ವಿಕೆಟ್ಗಳಿಂದ ಪ್ರವಾಸಿ ಬರೋಡ ತಂಡವನ್ನು ಸೋಲಿಸಿತು. ಕ್ವಾರ್ಟರ್ಫೈನಲ್ಗೇರಲು ಕನಿಷ್ಠ ಇನಿಂಗ್ಸ್ ಮುನ್ನಡೆ ಗಳಿಸುವ ಒತ್ತಡವನ್ನು ಸಮರ್ಥವಾಗಿ ನಿಭಾಯಿಸಿದ ಕರ್ನಾಟಕ, ಸರ್ವಾಂಗೀಣ ನಿರ್ವಹಣೆಯೊಂದಿಗೆ 3ನೇ ದಿನದಾಟದಲ್ಲೇ ಗೆಲುವು ಒಲಿಸಿಕೊಂಡಿತು. ಹೌದುಮ ಈ ಮೂಲಕ ದಾಖಲೆಯನ್ನು ಬರೆದಿದೆ.
ಬರೋಡ ನೀಡಿದ 149 ರನ್ ಗೆಲುವಿನ ಗುರಿ ಬೆನ್ನಟ್ಟಿದ ಕರ್ನಾಟಕ ತಂಡ, ನಾಯಕ ಕರುಣ್ ನಾಯರ್ (71*ರನ್, 126 ಎಸೆತ, 7 ಬೌಂಡರಿ) ಅರ್ಧಶತಕದಾಸರೆ ಹಾಗೂ ಕೆವಿ ಸಿದ್ದಾರ್ಥ್ (29*ರನ್, 68 ಎಸೆತ, 3 ಬೌಂಡರಿ, 1 ಸಿಕ್ಸರ್) ಜತೆಗೂಡಿ ಮುರಿಯದ 3ನೇ ವಿಕೆಟ್ಗೆ ಸೇರಿಸಿದ 91 ರನ್ ಜತೆಯಾಟದ ನೆರವಿನಿಂದ 44.4 ಓವರ್ಗಳಲ್ಲಿ 2 ವಿಕೆಟ್ ನಷ್ಟದಲ್ಲಿ ಜಯದ ನಗೆ ಬೀರಿತು. ಇದಕ್ಕೂ ಮೊದಲು 5 ವಿಕೆಟ್ಗೆ 208 ರನ್ಗಳಿಂದ ದಿನದಾಟ ಆರಂಭಿಸಿದ ಬರೋಡ ತಂಡ, ಪ್ರಸಿದ್ಧ ಕೃಷ್ಣ (45ಕ್ಕೆ 4), ರೋನಿತ್ ಮೋರೆ (68ಕ್ಕೆ 3) ಜೋಡಿಯ ಮಾರಕ ದಾಳಿಗೆ ನಲುಗಿ 296 ರನ್ಗಳಿಗೆ ಸರ್ವಪತನ ಕಂಡಿತು. ಬರೋಡ ಮೊದಲ ಇನಿಂಗ್ಸ್ನಲ್ಲಿ 85 ರನ್ ಗಳಿಸಿದ್ದರೆ, ಕರ್ನಾಟಕ 233 ರನ್ ಗಳಿಸಿ 148 ರನ್ ಮುನ್ನಡೆ ಸಾಧಿಸಿತ್ತು.
ನಿರಾಸೆ ಮೂಡಿಸಿದ ಪಡಿಕಲ್: ಸಾಧಾರಣ ಮೊತ್ತ ಬೆನ್ನಟ್ಟಿದ ಕರ್ನಾಟಕ ತಂಡ ಆರಂಭದಲ್ಲೇ ದೇವದತ್ ಪಡಿಕಲ್ (6) ವಿಕೆಟ್ ಕಳೆದುಕೊಂಡಿತ್ತು. ಒಟ್ಟಾರೆ ಕರ್ನಾಟಕ ಎಂಟರ ಘಟಕ್ಕೆ ಎಂಟ್ರಿ ಕೊಟ್ಟಿದ್ದು ಕಪ್ ಎತ್ತಿ ಹಿಡಿಯೋದು ಒಂದೇ ಬಾಕಿ. ಈಗಾಗಲೇ 8 ಬಾರಿ ಚಾಂಪಿಯನ್ ಆಗಿರುವ ಕರ್ನಾಟಕ ಇದೀಗ ಮತ್ತೊಮ್ಮೆ ಚಾಂಪಿಯನ್ ಆಗಿ ಮೆರೆಯಲು ಭರ್ಜರಿಯಾಗಿ ಸಿದ್ಧವಾಗಿದೆ.