జనసేన సంచలన అడుగులు.. ఇకపై లెక్కలు మారే ఛాన్స్ ఉందా?
జనసేన పార్టీని క్షేత్రస్థాయి నుంచి మరింత బలోపేతం చేసే దిశగా పార్టీ అధినేత పవన్ కళ్యాణ్ కీలక నిర్ణయాలు తీసుకున్నట్లు సమాచారం అందుతోంది. పార్టీలో నూతన ఉత్తేజాన్ని నింపడానికి పాత కమిటీలన్నింటినీ రద్దు చేసి, వాటి స్థానంలో కొత్త కమిటీలను నియమించాలని అధిష్టానం నిర్ణయించింది. ఈ సంస్థాగత మార్పులకు సంబంధించిన పూర్తి బాధ్యతలను జనసేన ప్రధాన కార్యదర్శి రామ్ తాళ్లూరి పర్యవేక్షిస్తున్నారు.
పార్టీలో విభేదాలకు తావులేకుండా, క్రమశిక్షణతో కూడిన వ్యవస్థను నిర్మించడమే లక్ష్యంగా ఈ కసరత్తు జరుగుతోంది. ముఖ్యంగా ఇతర పార్టీల నుంచి జనసేనలోకి చేరిన వారిని కూడా సొంత మనుషులుగానే పరిగణించాలని, పార్టీలో చేరిన క్షణం నుంచి అందరూ జనసైనికులేనని నాయకత్వం స్పష్టం చేస్తోంది. ఇందులో పాత వారు, కొత్త వారు అనే తేడాలు ఉండవని, ప్రతి ఒక్కరికీ వారి సామర్థ్యం మేరకు సముచిత స్థానం మరియు బాధ్యతలు కల్పిస్తామని పార్టీ వర్గాలు వెల్లడించాయి.
పార్టీ అభివృద్ధిలో కార్యకర్తలందరినీ భాగస్వాములను చేస్తూ, బాధ్యతాయుతమైన నాయకత్వాన్ని అందించడమే ఈ మార్పుల వెనుక ఉన్న ప్రధాన ఉద్దేశం. ఈ నియామక ప్రక్రియను అత్యంత పారదర్శకగా, ప్రజాస్వామ్యబద్ధంగా నిర్వహించాలని పార్టీ భావిస్తోంది. అందులో భాగంగానే గ్రామ మరియు వార్డు స్థాయి ఇన్ ఛార్జ్ ల ఎంపికను నేరుగా క్షేత్రస్థాయి పరిశీలన ద్వారా చేపట్టనున్నారు. ఈ ప్రతిష్టాత్మకమైన సంస్థాగత మార్పుల కార్యక్రమం పవన్ కళ్యాణ్ ప్రాతినిధ్యం వహిస్తున్న పిఠాపురం నియోజకవర్గం నుంచే ప్రారంభం కానుండటం విశేషం. పిఠాపురంలో విజయవంతంగా ఈ ప్రక్రియను పూర్తి చేసిన తర్వాత, రాష్ట్రవ్యాప్తంగా అన్ని నియోజకవర్గాల్లో ఇదే పద్ధతిని అమలు చేసి పార్టీని గ్రామస్థాయి నుంచి పటిష్టం చేయాలని జనసేన నాయకత్వం ప్రణాళికలు సిద్ధం చేసింది.
ఈ వాట్సాప్ నెంబర్కు మీ జిల్లాలో రాజకీయ, సామాజిక సమస్యలు వివరాలు పంపండి..
ఏపీ, తెలంగాణలో వివిధ నియోజకవర్గాల్లో నెలకొన్న ప్రజల సమస్యలు, రాజకీయ పరమైన అంశాలను మా దృష్టికి తీసుకు రావాలనుకుంటున్నారా ? మీ సమస్య లేదా మీరు చెప్పే విషయం ఏదైనా క్లుప్తంగా 9490520108 నెంబరుకు వాట్సాప్ ద్వారా తెలియజేయండి.
నోట్ : వ్యక్తిగత సమస్యలు వద్దు