ఏపీ: పిఠాపురంలో పవన్ కళ్యాణ్ కొత్త ఇల్లు... ఇళ్ళలగ్గానే సంబరమా?
పిఠాపురం ఎమ్మెల్యేగా గెలిచిన తర్వాత కూడా స్ధానికంగా ఉంటూ మధ్యలో హైదరాబాద్ వెళ్లి వచ్చేలా పవన్ కళ్యాణ్ ప్రణాళికలు సిద్దం చేసుకుంటున్నట్టు కనబడుతోంది. ఈ క్రమంలోనే నియోజకవర్గం పరిధిలోకి వచ్చే గొల్లప్రోలు మండలంలోని చేబ్రోలు గ్రామంలో కొత్తగా నిర్మిస్తున్న నాలుగు అంతస్ధుల ఇల్లు తీసుకోవడం జరిగింది. ఓదూరి నాగేశ్వరరావు అనే వ్యక్తి నిర్మిస్తున్న ఈ ఇంటిని పవన్ కొనుగోలు చేశారా లేక లీజుకు తీసుకున్నారో మాత్రం ఇంకా అధికారికంగా తెలియాల్సి వుంది. కానీ ఏది ఏమైనా చేబ్రోలు గ్రామంలో మాత్రం పవన్ ఇల్లు తీసుకున్నట్లు అయితే నిర్దారణ అయింది. త్వరలో ఈ ఇంట్లో పవన్ గృహప్రవేశం చేయబోతున్నట్లు కూడా జనసేన వర్గాలు చెబుతున్నాయి.
అయితే, ఈ విషయాలు తెలిసిన అధికార వైసీపీ వర్గం మాత్రం ఇళ్ళలగ్గానే సంబరాలు చేసుకోవడమా? చాలా చోద్యంగా వుంది అంటూ కామెంట్స్ చేస్తున్నారు. ఎందుకంటే ఇంకా ఎన్నికలే కాలేదు. గెలవడం తరువాత సంగతి.. ముందు ఓడిపోకుండా ఉండడానికి కృషి చేయాలి కదా అన్నట్టు పవన్ పై కౌటర్లు వేస్తున్నారు. వాస్తవానికి పవన్ పిఠాపురంలో ఎంట్రీ ఇవ్వగానే తొలిరోజే తాను స్ధానికంగా ఉండాలనుకుంటున్నట్లు చెప్పడం జరిగింది. అందుకోసం ఏదో ఒక గ్రామంలో ఇల్లు కొనుక్కునేందుుకు వెతుకుతున్నట్లు కూడా బాహాటంగానే తెలిపారు. అన్నట్లుగానే ఇప్పుడు చేబ్రోలులో పవన్ ఇల్లు తీసుకున్నారు. ఇంకా ఉగాదికి పవన్ ఈ ఇంట్లోకి మారే అవకాశం ఉందని కూడా జనసేన వర్గాలు చెబుతున్నాయి.