ఏపీ: రచ్చలేపుతున్న వాలంటీర్లు... విజయవాడలో గుంపుగా తీర్మానం?
నిన్న విజయవాడలో జరిగిన వాలంటీర్ల సంఘం సమావేశంలో ఈ అనుకోని నిర్ణయం తీసుకున్నట్టు విశ్వసనీయ వర్గాల సమాచారం. ఇప్పటి వరకూ వైసీపీకి అండగా ఉంటున్న వాలంటీర్లు ఇకపై టీడీపీకి మద్దతివ్వాలని మూకుమ్మడిగా ఓ నిర్ణయానికి వచ్చారు. విషయం ఏమిటంటే, వాలంటీర్ల వ్యవస్థను కొనసాగించడంతోపాటు నెలకు 50 వేలు ఆదాయం వచ్చేలా చూస్తానని చంద్రబాబు నాయుడు భరోసా ఇవ్వడంతో వాలంటీర్ల సంఘ ప్రతినిధులంతా టీడీపీ వైపు మొగ్గు చూపుతున్నట్టు భోగట్టా.
ఈ సందర్భంగా కొంతమంది వాలంటీర్లు మీడియా సమావేశంలో మాట్లాడుతూ... గడిచిన ఐదు సంవత్సరాలలో పనికిరాని సంక్షేమ పధకాలు తప్పితే ఎక్కడా అభివృద్ధిని నోచుకున్న పాపాన లేదని అన్నారు. అదే చంద్ర బాబు నాయుడు సీఎం అయితే పరిశ్రమలు వస్తాయని, తమ కుటుంబాల్లోని యువతకు ఉద్యోగాలు వస్తాయని, తద్వారా రాష్ట్రం అభివృద్ధి చెందుతుందని వారు భావిస్తున్నట్టు చెప్పుకొచ్చారు. అందుకనే టీడీపీ వెంటే వెళ్లాలని విజయవాడ వాలంటీర్లు ఈ సందర్భంగా జరిగిన సమావేశంలో తీర్మానించడం జరిగింది. ఇన్నాళ్లూ వైసీపీ కోసం పనిచేస్తే దక్కింది ఐదు వేలేనని, టీడీపీ అధికారంలోకి వస్తే తమతోపాటు కుటుంబాలు, రాష్ట్రం బాగుపడుతుందనే కారణాలతో వాలంటీర్లంతా ఈ నిర్ణయం తీసుకున్నట్లు తెలుస్తోంది. కాగా ఈ విషయం ఇపుడు అధికార పార్టీలో గుబులు పుట్టించింది.