ప్రభాస్ ఫ్యాన్స్ కు శుభవార్త.. కల్కి2 మూవీ షాకింగ్, క్రేజీ అప్ డేట్స్ ఇవే!
పాన్ ఇండియా స్టార్ ప్రభాస్ ప్రస్తుతం వరుస భారీ ప్రాజెక్టులతో బాక్సాఫీస్ వద్ద తన సత్తా చాటేందుకు సిద్ధమవుతున్నారు. ఈ ఏడాది సంక్రాంతి కానుకగా విడుదలైన 'ది రాజాసాబ్' చిత్రం భారీ అంచనాల మధ్య వచ్చినప్పటికీ, ఆశించిన స్థాయిలో ప్రేక్షకులను మెప్పించలేకపోయింది. దీంతో ప్రభాస్ అభిమానులందరూ ఇప్పుడు ఆయన తదుపరి రాబోయే భారీ సీక్వెల్ 'కల్కి 2' పైనే పూర్తి ఆశలు పెట్టుకున్నారు.
దర్శకుడు నాగ్ అశ్విన్ తెరకెక్కించిన 'కల్కి 2898 AD' మొదటి భాగం ప్రపంచవ్యాప్తంగా వెయ్యి కోట్లకు పైగా వసూళ్లు సాధించి సరికొత్త రికార్డులు సృష్టించింది. ఈ క్రమంలోనే సీక్వెల్కు సంబంధించిన పనులు వేగవంతం అయ్యాయి. తాజా సమాచారం ప్రకారం, 'కల్కి 2' రెగ్యులర్ షూటింగ్ ఫిబ్రవరి 2 నుంచి ప్రారంభం కానుంది. ఈ భారీ సైన్స్ ఫిక్షన్ డ్రామా కోసం చిత్ర యూనిట్ ఇప్పటికే అన్ని ఏర్పాట్లు పూర్తి చేసింది.
ముందుగా ఫిబ్రవరి మొదటి వారంలో కమల్ హాసన్ (యాస్కిన్) కి సంబంధించిన కీలక ఘట్టాలను చిత్రీకరించాలని దర్శకుడు ప్లాన్ చేశారు. ప్రభాస్ మాత్రం ఫిబ్రవరి రెండో వారం నుండి లేదా మార్చి తర్వాతే పూర్తిస్థాయిలో సెట్స్లో అడుగుపెట్టే అవకాశం ఉంది. పురాణాలు మరియు ఫ్యూచరిస్టిక్ టెక్నాలజీ నేపథ్యంలో సాగే ఈ సినిమాలో ప్రభాస్ (భైరవ/కర్ణ), అమితాబ్ బచ్చన్ (అశ్వత్థామ), కమల్ హాసన్ మధ్య సాగే పోరాట సన్నివేశాలు ప్రధాన ఆకర్షణగా నిలవనున్నాయి.
ప్రస్తుతం ప్రభాస్ సందీప్ రెడ్డి వంగా దర్శకత్వంలో 'స్పిరిట్' మరియు హను రాఘవపూడి దర్శకత్వంలో 'ఫౌజీ' చిత్రాల షూటింగ్స్లో బిజీగా ఉన్నారు. ఈ రెండు చిత్రాలతో పాటు 'కల్కి 2' షూటింగ్ను కూడా సమాంతరంగా పూర్తి చేయాలని ఆయన భావిస్తున్నారు. ఈ సీక్వెల్ చిత్రం 2028లో విడుదలయ్యే అవకాశం ఉందని సినీ వర్గాలు చెబుతున్నాయి. విజువల్ వండర్గా రాబోతున్న ఈ సినిమా కోసం అభిమానులు కళ్లు కాయలు కాచేలా ఎదురుచూస్తున్నారు.