రెమ్యునరేషన్ విషయంలో మైత్రీ సంచలన నిర్ణయం.. ఆ హీరోలు కూడా మారతారా?
టాలీవుడ్ చిత్ర పరిశ్రమ ప్రస్తుతం ఎన్నడూ లేని విధంగా గడ్డు పరిస్థితులను ఎదుర్కొంటోంది. థియేటర్లకు ప్రేక్షకుల రాక తగ్గడం, భారీ బడ్జెట్ సినిమాలు సైతం బాక్సాఫీస్ వద్ద బోల్తా కొట్టడం ఇండస్ట్రీ వర్గాలను ఆందోళనకు గురిచేస్తోంది. ప్రతి వారం పదుల సంఖ్యలో సినిమాలు విడుదలవుతున్నప్పటికీ, అందులో విజయం సాధించేవి ఒకటి రెండు మాత్రమే ఉండటం గమనార్హం. ఈ నేపథ్యంలోనే నిర్మాణ వ్యయాన్ని తగ్గించి, నష్టాల నుంచి గట్టెక్కడానికి అగ్ర నిర్మాణ సంస్థ మైత్రీ మూవీ మేకర్స్ ఒక సంచలన నిర్ణయం తీసుకున్నట్లు ఫిలిం నగర్ సమాచారం.
సాధారణంగా స్టార్ హీరోలు తమ సినిమాల కోసం భారీ స్థాయిలో పారితోషికాన్ని డిమాండ్ చేస్తుంటారు. సినిమా ఫలితంతో సంబంధం లేకుండా వారు తీసుకునే ఈ రెమ్యునరేషన్ వల్ల నిర్మాతలు తీవ్ర ఆర్థిక భారానికి లోనవుతున్నారు. ఈ సమస్యను అధిగమించడానికి మైత్రీ సంస్థ ఇకపై 'ప్రాఫిట్ షేరింగ్' (లాభాల్లో వాటా) పద్ధతిని అమలు చేయాలని భావిస్తోంది. ఇప్పటికే చిరంజీవి వంటి పెద్ద హీరోలతో ఈ పద్ధతిలో చర్చలు జరిపిన ఈ సంస్థ, ఇప్పుడు మాస్ మహారాజా రవితేజ విషయంలోనూ ఇదే బాటలో నడుస్తున్నట్లు తెలుస్తోంది.
శివ నిర్వాణ దర్శకత్వంలో రవితేజ హీరోగా మైత్రీ మూవీ మేకర్స్ త్వరలో ఒక భారీ చిత్రాన్ని పట్టాలెక్కిస్తోంది. ఈ సినిమా కోసం రవితేజకు నేరుగా ఇచ్చే రెమ్యునరేషన్ తగ్గించి, దానికి బదులుగా లాభాల్లో వాటా ఇచ్చేలా ఒప్పందం కుదిరినట్లు టాక్ వినిపిస్తోంది. తాజా సమాచారం ప్రకారం, రవితేజ ఈ సినిమా కోసం సుమారు 8 కోట్ల రూపాయల నగదుతో పాటు, సినిమా విడుదలయ్యాక వచ్చే లాభాల్లో కొంత శాతం వాటా తీసుకోనున్నారు. ఒకవేళ సినిమా పెద్ద హిట్ అయి భారీ వసూళ్లు రాబడితే హీరోకి కూడా ఆ స్థాయిలో ఆదాయం అందుతుంది, అదే సమయంలో సినిమా ఆశించిన స్థాయిలో ఆడకపోయినా నిర్మాతకు పెట్టిన పెట్టుబడికి ముప్పు ఉండదు. టాలీవుడ్లో ఇలాంటి కొత్త ట్రెండ్ రావడం వల్ల భవిష్యత్తులో నిర్మాణ వ్యయం అదుపులోకి వచ్చే అవకాశం ఉంది.
ఈ ప్రాఫిట్ షేరింగ్ మోడల్ వల్ల అటు నిర్మాతలు సేఫ్ జోన్లో ఉండటమే కాకుండా, హీరోలు కూడా సినిమా విజయంపై మరింత బాధ్యతగా పనిచేసే అవకాశం ఉందని విశ్లేషకులు భావిస్తున్నారు. టాలీవుడ్లోని ఇతర అగ్ర హీరోలు కూడా ఇదే బాటలో పయనిస్తారో లేదో చూడాలి.