హైకోర్టును ఆశ్రయించిన ఎన్టీఆర్.. ఆ పోస్టులు చేసేవాళ్లకు భారీ షాక్ తప్పదా?
యంగ్ టైగర్ జూనియర్ ఎన్టీఆర్కు సోషల్ మీడియాలో, ప్రజల్లో ఊహించని స్థాయిలో క్రేజ్, ఫ్యాన్ ఫాలోయింగ్, పాపులారిటీ ఉన్న సంగతి తెలిసిందే. అయితే, కొందరు వ్యక్తులు ఈ క్రేజ్ను అడ్డం పెట్టుకుని ఆయన పర్సనాలిటీ రైట్స్ను దుర్వినియోగం చేస్తున్నారనే ఆరోపణలు వినిపిస్తున్నాయి. ఈ నేపథ్యంలో, తన పర్సనాలిటీ రైట్స్ (వ్యక్తిత్వ హక్కులు)ను సోషల్ మీడియా, ఈ-కామర్స్ ప్లాట్ఫామ్లలో కాపాడాలని కోరుతూ జూనియర్ ఎన్టీఆర్ ఢిల్లీ హైకోర్టులో పిటిషన్ దాఖలు చేశారు.
ఈ పిటిషన్పై విచారణ జరిపిన ఢిల్లీ హైకోర్టు కీలక ఆదేశాలు జారీ చేసింది. 2021 ఐటీ రూల్స్ ప్రకారం నిందితులపై తగిన చర్యలు తీసుకోవాలని సదరు సోషల్ మీడియా ప్లాట్ఫామ్లను న్యాయస్థానం ఆదేశించింది. ఎన్టీఆర్ అనుమతి లేకుండా ఆయన పేరు, ఫోటోలు, వాయిస్ లేదా ఇతర వ్యక్తిగత గుర్తింపు చిహ్నాలను ఉపయోగించకుండా చూడాలని కోరింది. గతంలో కూడా పలువురు సినీ ప్రముఖులు సోషల్ మీడియాలో ట్రోలింగ్, వ్యక్తిగత హక్కుల ఉల్లంఘన గురించి హైకోర్టును ఆశ్రయించిన సందర్భాలు ఉన్నాయి.
ఈ కేసు విచారణను డిసెంబర్ 22వ తేదీకి వాయిదా వేసిన ఢిల్లీ హైకోర్టు, ఆ రోజున ఈ ఆదేశాలకు సంబంధించి మరింత సవివరమైన ఉత్తర్వులు జారీ చేస్తామని స్పష్టం చేసింది. ఈ పరిణామం సినీ ప్రముఖులు తమ పర్సనాలిటీ రైట్స్ను కాపాడుకోవడానికి, సోషల్ మీడియాలో దుర్వినియోగాన్ని అరికట్టడానికి ఒక ముఖ్యమైన ముందడుగుగా పరిగణించవచ్చు
తారక్కు ఉన్న అపారమైన ప్రజాదరణ దృష్ట్యా, ఆయన ఇమేజ్ను అక్రమంగా ఉపయోగించుకోవడం ద్వారా నకిలీ ఖాతాలు, వ్యాపార ప్రకటనలు సృష్టించే వారిపై ఈ చర్యలు ప్రభావం చూపుతాయని భావిస్తున్నారు. ఈ మధ్యకాలంలో సెలబ్రిటీల వ్యక్తిగత హక్కుల ఉల్లంఘన కేసులు పెరుగుతున్న నేపథ్యంలో, ఈ ఆదేశాలు సోషల్ మీడియా వినియోగదారులకు, ప్లాట్ఫామ్లకు ఒక హెచ్చరికగా నిలుస్తాయి. జూనియర్ ఎన్టీఆర్ హైకోర్టును ఆశ్రయించిన నేపథ్యంలో ఇకపై తారక్ గురించి ఇష్టానుసారం పోస్టులు పెట్టేవాళ్లకు షాక్ తప్పదని చెప్పవచ్చు.