ఇటు కుబేర అటు కూలీ.. నాగార్జున కొత్త పోస్టర్..!
నిన్న ( గురువారం) కింగ్ అక్కినేని నాగార్జున పుట్టినరోజు కావడంతో సోషల్ మీడియాలో శుభాకాంక్షలు వెల్లువెత్తుతున్నాయి. సెలబ్రెటీలతో పాటు అక్కినేని ఫ్యాన్స్ నాగార్జునకి బర్త్ డే విషెస్ తెలియజేస్తున్నారు. మరోవైపు నాగార్జున పుట్టినరోజు సందర్భంగా మాస్ సినిమాను రీరిలీజ్ చేసిన సంగతి తెలిసిందే. థియేటర్లో నాగ్ పుట్టినరోజును వేడుకగా చేసుకుంటున్నారు ఫ్యాన్స్. కొత్త సినిమా కంటే రెట్టింపు ఉత్సాహంతో మాస్‌ను సెలబ్రేట్ చేస్తున్నారు. థియేటర్లో కేక్ కటింగ్‌లు, కేకలు, అరుపులు, క్రాకర్స్‌తో రచ్చరచ్చ చేస్తున్నారు. అంతేకాకుండా ఆయన పుట్టినరోజు సందర్భంగా నాగార్జున నటిస్తున్న చిత్రాల నుంచి కొత్త లుక్స్‌ను రిలీజ్ చేస్తూ
విషెస్‌ను తెలియజేశారు మేకర్స్. ధనుష్‌తో కలిసి నాగార్జున నటిస్తున్న సినిమా 'కుబేర'. ఈ చిత్రంనుంచి ఇప్పటికే నాగ్ ఫస్ట్ లుక్‌ను రిలీజ్ చేయగా, ఆయన బర్త్‌డే సందర్భంగా మరో కొత్త పోస్టర్ను రిలీజ్ చేశారు. ఇందులో స్టైలిష్‌ గెటప్‌లో ఉన్న నాగార్జున.. ఎదురుగా ఉన్నవారిని ఆప్యాయంగా పలకరిస్తూ చిరునవ్వులు చిందిస్తూ కనిపించారు. రష్మిక హీరోయిన్‌గా నటిస్తున్న ఈ చిత్రంలో జిమ్ సర్భ్ కీలక పాత్ర పోషిస్తున్నాడు. సునీల్ నారంగ్, పుస్కుర్ రామ్ మోహన్ రావు నిర్మిస్తున్నారు. ఇదిలా ఉంటే.. కోలీవుడ్ క్రేజీ ప్రాజెక్టులో నాగార్జున భాగమైనట్టు గురువారం ప్రకటించారు.
రజినీకాంత్ హీరోగా లోకేష్ కనగరాజ్ దర్శకత్వంలో రూపొందుతోన్న 'కూలీ' చిత్రంలో ఆయన ఇంపార్టెంట్ రోల్ చేస్తున్నట్టు రివీల్ చేశారు. ఈ సందర్భంగా ఫస్ట్ లుక్‌తో పాటు ఆయన పాత్రను కూడా పరిచయం చేశారు. వింటేజ్ లుక్‌లో గ్యాంగ్‌స్టర్‌గా కనిపిస్తున్న నాగార్జున ఇందులో 'సైమన్' పాత్రలో కనిపించనున్నట్టు ప్రకటించారు. నాగార్జునకు బర్తడే విషెస్ చెబుతూ ఈ పోస్టర్ను రిలీజ్ చేశారు .ఈ పోస్టర్లో నాగార్జున స్టైల్ గా కళ్ళజోడు పెట్టుకొని కుర్చీలో కూర్చొని ,చేతికి వాచ్ ధరించిన పోస్టర్ వైరల్ అవుతోంది. ఈ లుక్ లో నాగ్ చాలా సరికొత్తగా ఆకర్షణీయంగా కనిపిస్తున్నారు. సన్ పిక్చర్స్ సంస్థ నిర్మిస్తున్న ఈ చిత్రానికి అనిరుధ్ సంగీతం అందిస్తున్నాడు. ఒకప్పుడు హీరోగా చేసిన నాగ్ ఇప్పుడు కీలక పాత్రలో కనిపించబోతున్నాడు..!!