'చంద్రముఖి 2' కోసం లారెన్స్ రెమ్యునరేషన్ ఎన్ని కోట్లో తెలుసా?
కోలీవుడ్ స్టార్ హీరో రాఘవ లారెన్స్ గురించి ప్రత్యేకంగా చెప్పనవసరం లేదు. లారెన్స్ తాజాగా నటించిన సినిమా చంద్రముఖి 2. ఇందులో బాలీవుడ్ బ్యూటీ కంగనా రనౌత్ హీరోయిన్ గా నటిస్తోంది. అప్పట్లో సూపర్ స్టార్ రజినీకాంత్ హీరోగా నటించిన చంద్రముఖి సినిమాకి ఇది సీక్వెల్ గా వస్తుంది.
పి. వాసు దర్శకత్వం వహించిన ఈ చిత్రాన్ని భారీ బడ్జెట్ తో ప్రముఖ తమిళ నిర్మాణ సంస్థ లైకా ప్రొడక్షన్స్ నిర్మించింది. సెప్టెంబర్ 28న థియేటర్స్ లో విడుదలైన ఈ చిత్రం ఆడియన్స్ నుండి మిక్స్డ్ టాక్ ను సొంతం చేసుకుంది. హారర్ జానర్ లో వచ్చిన 'చంద్రముఖి' అప్పట్లో సౌత్ లోనే ఇండస్ట్రీ హిట్ గా నిలిచింది. కానీ దానికి సీక్వల్ గా వచ్చిన 'చంద్రముఖి 2' మాత్రం అనుకున్నంత స్థాయిలో
లేదని ఆడియన్స్ నుంచి టాక్ వినిపించింది. ఈ విషయం కాస్త పక్కన పెడితే.. విడుదలకు ముందే ఈ చిత్రానికి మంచి లాభాలు వచ్చినట్లు తెలుస్తోంది. ఇక తాజాగా సినిమాలో హీరోగా నటించిన రాఘవ లారెన్స్ రికార్డ్ స్థాయిలో రెమ్యూనరేషన్ అందుకున్నారట. చంద్రముఖి సినిమాకి సీక్వెల్ కావడంతో ఈ మూవీకి ఫ్రీ రిలీజ్ బిజినెస్ భారీగానే జరిగింది. నాన్ థియేట్రికల్, థియేట్రికల్ రైట్స్ భారీ ధరకు అమ్ముడుపోయినట్లు ట్రేడ్ వర్గాల నుండి సమాచారం. ఇక ఇప్పుడు ఈ సినిమాకి రాఘవ లారెన్స్ తీసుకున్న రెమ్యూనరేషన్ వివరాలు బయటకు వచ్చాయి. లారెన్స్ దాదాపు రూ.25 కోట్ల వరకు రెమ్యునరేషన్ అందుకున్నారని తమిళ మీడియాలో జోరుగా ప్రచారం సాగుతోంది.
ఓ సినిమాకి లారెన్స్ ఈ రేంజ్ లో రెమ్యునరేషన్ అందుకోవడం బహుశా ఇదే మొదటిసారి. అందుకే ప్రస్తుతం ఈ న్యూస్ సోషల్ మీడియాలో హాట్ టాపిక్ గా మారింది. లారెన్స్ నటించిన గత చిత్రాలకి ఈ రేంజ్ లో రెమ్యూనరేషన్ అందుకోలేదు. కానీ 'చంద్రముఖి 2' కోసం రూ.25 కోట్లు తీసుకోవడం గమనార్హం. సినిమా హిట్ అయినా కాకపోయినా 'చంద్రముఖి 2' తో లారెన్స్ కి మాత్రం మంచి లాభమే వచ్చిందని ఈ న్యూస్ తెలిసిన పలువురు కామెంట్స్ చేస్తున్నారు. ఇక 'చంద్రముఖి 2' విషయానికి వస్తే.. వడివేలు రావు రమేష్, లక్ష్మీ మీనన్, మహిమ నంబిహార్, రాధిక శరత్ కుమార్ తదితరులు కీలక పాత్రలు పోషించిన ఈ చిత్రానికి ఆస్కార్ అవార్డు గ్రహీత ఎమ్. ఎమ్ కీరవాణి సంగీతం అందించారు.