చిరు ధాన్యాలకు పెరిగిన ఆదరణ!
మధుమేహం, ఉబకాయం సమస్యలు ఉన్నోళ్లు తప్పనిసరిగా చిరుధాన్యాలను ఆహారంగా తీసుకునేందుకు ప్రాధాన్యత ఇవ్వాలని వైద్యులు కూడా సూచించడంతో జనాలు మిల్లెట్స్పై ఆసక్తి కనబరుస్తున్నారు. అయితే ఈ చిరుధాన్యాల వినియోగం ఎక్కువగా పట్టణాలకే పరిమితమవుతోంది. ఇక్రిసాట్ అనే సంస్థ వివిధ రాష్ట్రాల్లో సుమారు 15,500 మందిపై అధ్యయనం నిర్వహించింది. అందులో 58 శాతం మంది ఆరోగ్యంగా ఉండేందుకు, మరో 15 శాతం మంది బరువును తగ్గేందుకు తీసుకుంటున్నట్లు వెల్లడైంది. 38 శాతం మంది మారుతున్న జీవన విధానంతో పాటు ఆహారపు అలవాట్లను మార్చుకునేందుకు మిల్లెట్స్ వైపు మొగ్గు చూపుతున్నారని తేలింది.
ట్రెండ్ కు తగ్గట్టుగా జనాల ఇష్టాన్ని గమనించిన కొందరు హోటళ్ల నిర్వాహకులు సరికొత్త థీమ్స్తో రెస్టారెంట్లను ప్రారంభిస్తున్నారు. తక్కువ ధరలోనే పసందైన మిల్లెట్స్ ఆహారాన్ని అందిస్తున్నారు. వినియోగదారులు కూడా చిరుధాన్యాలతో చేసిన టిఫిన్స్ తినేందుకు ఆసక్తి చూపుతున్నారు. జొన్నలు, సజ్జలు, రాగులు, కొర్రలు, ఊదలు, సామలు, అరికెలు, వరిగల్ వంటి చిరుధాన్యాలతో చేసిన ఇడ్లీ, దోశ, వడ, ఉప్మా, పొంగల్ వంటి టిఫిన్స్కు డిమాండ్ పెరుగుతోంది. రోగ నిరోధక శక్తిని పెంచుకోవడానికి ఇదే సరైన మార్గమని వారు భావిస్తున్నారు. యువత సైతం జంక్ ఫుడ్కు దూరంగా ఉంటూ.. మిల్లెట్స్ ఆహారానికి దగ్గరవుతున్నారు.