“రోజుకు ఒక ఆపిల్ తింటే డాక్టర్ అవసరం ఉండదు” అనే మాట మనం చాలా సార్లు వింటుంటాం. కానీ నిజానికి ఆ మాట వెనుక ఉన్న ఆరోగ్య రహస్యాలు ఎంతమందికి తెలుసు? సాధారణంగా ఆపిల్  పండును చాలా మంది ఇష్టంగా తింటారు. ఇంకా చాలామంది డాక్టర్లు కూడా రోగులకు రోజూ ఒక ఆపిల్ అయినా తినాలని సలహా ఇస్తుంటారు. కానీ ఈ చిన్న పండు మన ఆరోగ్యంపై చూపే ప్రభావం ఎంత గొప్పదో చాలామందికి పూర్తిగా తెలియదు.ఆపిల్ అనేది కేవలం రుచికరమైన పండే కాదు, పోషకాల నిధి కూడా. దీనిలో శరీరానికి అవసరమైన అనేక రకాల విటమిన్లు, ఖనిజాలు, ఫైబర్ సమృద్ధిగా ఉంటాయి. ముఖ్యంగా ఆపిల్‌లో ఉండే విటమిన్ సి శరీరంలోని రోగనిరోధక శక్తిని పెంచడంలో కీలక పాత్ర పోషిస్తుంది. ఇది ఒక శక్తివంతమైన యాంటీ ఆక్సిడెంట్‌లా పని చేసి, శరీరంలో హానికరమైన ఫ్రీ రాడికల్స్‌ను తగ్గిస్తుంది. ఫలితంగా వృద్ధాప్య లక్షణాలు ఆలస్యంగా కనిపిస్తాయి, చర్మం ఆరోగ్యంగా ఉంటుంది.అలాగే ఆపిల్‌లో ఉన్న బి-కాంప్లెక్స్ విటమిన్లు ఎర్ర రక్త కణాల ఉత్పత్తికి సహాయపడతాయి. ఇవి నాడీ వ్యవస్థను బలపరిచి మెదడు పనితీరును మెరుగుపరుస్తాయి. తరచూ అలసటగా అనిపించే వారు, మానసిక ఒత్తిడితో బాధపడేవారు ఆపిల్‌ను తమ రోజువారీ ఆహారంలో చేర్చుకుంటే మంచి ఫలితాలు కనిపిస్తాయి.

ఇంత మంచిగా ఉన్న ఆపిల్‌ని ఎప్పుడు తింటే పూర్తి ప్రయోజనం పొందవచ్చు? అన్న ప్రశ్న చాలామందిలో ఉంటుంది. ఈ విషయంపై నిపుణులు, శాస్త్రవేత్తలు చెబుతున్న మాట ఏమిటంటే…ఆపిల్‌ను పగటిపూట తినడం అత్యంత మంచిది. ఆపిల్‌లో పెక్టిన్ అనే ద్రవీభవించే ఫైబర్, అలాగే ఇతర పీచుపదార్థాలు ఎక్కువగా ఉంటాయి. ఇవి జీర్ణక్రియకు చాలా ఉపయోగపడతాయి. కానీ రాత్రి సమయాల్లో ఆపిల్ తింటే ఈ ఫైబర్ త్వరగా జీర్ణం కాకపోవచ్చు. దాంతో గ్యాస్, కడుపు ఉబ్బరం, అసౌకర్యం వంటి జీర్ణ సమస్యలు వచ్చే అవకాశం ఉంటుంది. ముఖ్యంగా బలహీనమైన జీర్ణవ్యవస్థ ఉన్నవారికి రాత్రిపూట ఆపిల్ తినడం ఇబ్బందికరంగా మారవచ్చు.అదే పగటిపూట ఆపిల్ తింటే మనం కదలికల్లో ఉంటాం, పనులు చేస్తుంటాం కాబట్టి జీర్ణక్రియ వేగంగా జరుగుతుంది. ఫలితంగా ఆపిల్‌లోని పోషకాలు శరీరానికి పూర్తిగా అందుతాయి. అందుకే వైద్యులు, పోషక నిపుణులు కూడా ఉదయం లేదా మధ్యాహ్నం సమయాల్లో ఆపిల్ తినాలని సూచిస్తున్నారు.

ఆపిల్‌లో ఫైబర్ అధికంగా ఉండటం వల్ల మలబద్ధకం సమస్య తగ్గుతుంది. పేగులు శుభ్రంగా ఉండటానికి ఇది చాలా సహాయపడుతుంది. అంతేకాకుండా, రోజూ ఆపిల్ తినేవారిలో గుండె సంబంధిత వ్యాధులు వచ్చే ప్రమాదం కూడా తక్కువగా ఉంటుందని కొన్ని అధ్యయనాలు చెబుతున్నాయి.పోషక విలువల విషయానికి వస్తే ..ఒక మీడియం సైజ్ ఆపిల్‌లో సుమారు 95 కేలరీలు మాత్రమే ఉంటాయి. 100 గ్రాముల ఆపిల్‌లో కార్బోహైడ్రేట్స్, ఫైబర్, విటమిన్లు సమతుల్యంగా ఉంటాయి. అందుకే ఇది అన్ని వయసుల వారికి అనుకూలమైన పండు.ఆపిల్ రక్తంలో హిమోగ్లోబిన్ స్థాయిని పెంచడంలో కూడా సహాయపడుతుంది. ముఖ్యంగా రక్తహీనత ఉన్నవారు, మహిళలు, పిల్లలు ఆపిల్‌ను తరచూ తీసుకోవడం మంచిది.

ఇంకో ముఖ్యమైన విషయం ఏమిటంటే ..ఆహారం తీసుకునే ముందు ఆపిల్ తింటే కడుపు నిండిన భావన కలుగుతుంది. దాంతో భోజనంలో అవసరానికి మించి తినకుండా నియంత్రణలో ఉంటుంది. ఆపిల్‌లో కేలరీలు తక్కువగా ఉండటం, ఫైబర్ ఎక్కువగా ఉండటం వల్ల బరువు తగ్గాలనుకునేవారికి ఇది అద్భుతమైన పండు. డైట్ ఫాలో అయ్యేవాళ్లకు ఆపిల్ ఒక మంచి ఎంపిక అని చెప్పొచ్చు.మొత్తానికి చెప్పాలంటే, ఆపిల్ చిన్న పండే అయినా దాని ఆరోగ్య ప్రయోజనాలు చాలా పెద్దవి. సరైన సమయంలో, సరైన మోతాదులో ఆపిల్ తింటే శరీరం ఆరోగ్యంగా ఉంటుంది, వ్యాధులు దూరంగా ఉంటాయి. అందుకే రోజూ ఒక ఆపిల్ తినడం మన ఆరోగ్యానికి ఎంతో మేలు చేస్తుంది.