మహారాష్ట్ర నుంచి కేసీఆర్ పోటీ.. నిజమేనా?
ముఖ్యంగా మహారాష్ట్రలో స్వయంగా సీఎం కేసీఆరే ఎంపీగా పోటీ చేస్తారని మహారాష్ట్ర మీడియా, నేషనల్ మీడియాలో వార్తలు వస్తున్నాయి. 2023 అసెంబ్లీ ఎన్నికలు అయిపోగానే ఇక్కడ పార్టీ అధికారంలోకి వస్తుందని నమ్మకంతో కేసీఆర్ ఉన్నారు. అధికార బలాన్ని ఉపయోగించి ఎంపీ ఎలక్షన్లకు పోవాలని కృత నిశ్చయంతో ఉన్నారు. తెలంగాణలో పార్టీని అధికారాన్ని కొడుకు కేటీఆర్ కు అప్పగించి మహారాష్ట్ర నుంచి ఎంపీగా పోటీ చేయడంతో అక్కడ బీఆర్ఎస్ పార్టీని విస్తరించాలని అనుకుంటున్నారు.
దీంతో పాటు అక్కడ గెలిస్తే మంచి ఊపు వస్తుంది. కేంద్రంలో కూడా బీఆర్ఎస్ కు జాతీయ పార్టీలైన కాంగ్రెస్, బీజేపీలకు అవసరమొస్తే కేసీఆర్ దగ్గరకు వచ్చే అవకాశం ఉంటుంది. కేంద్రంలో చక్రం తిప్పవచ్చనే ఆలోచనతో కేసీఆర్ ఉన్నట్లు తెలుస్తోంది. సీఎం కేసీఆర్ మహారాష్ట్ర పర్యటనలు చేయడం అక్కడి నాయకులను పార్టీలో చేర్చుకోవడం అక్కడ బలా బలాలను తెలుసుకోవడం.. పార్టీకి ఎలా ఊపు తీసుకురావాలో, తెలంగాణలో అమలవుతున్న పథకాలు మహారాష్ట్రలో కూడా అమలు చేస్తామని చెప్పడం.. దేశ వ్యాప్తంగా రైతు బంధు తీసుకొస్తామని చెప్పడం తదితర అంశాలతో అక్కడి ప్రజలను ఆకట్టుకోవడానికి ప్రయత్నాలు చేస్తున్నారు.
తెలంగాణకు మహారాష్ట్ర సరిహద్దు ప్రాంతం కావడం.. హైదరాబాద్ నుంచి కూడా పెద్దగా దూరం లేకపోవడంతో సీఎం కేసీఆర్ ముందుగా మహారాష్ట్రలో పాగా వేయాలని ప్లాన్ చేస్తున్నారు. తెలంగాణలో కేటీఆర్, మహారాష్ట్రలో కేసీఆర్ రాజకీయాలను రక్తి కట్టించేందుకు పక్కా ప్రణాళికతో ముందుకు సాగుతున్నారు.