టాప్ సీక్రెట్ : గంజాయితో ఏమి చేస్తున్నారో తెలిస్తే షాక్ అవ్వాల్సిందే..!

N ANJANEYULU
గంజాయిని విక్ర‌యించిన‌ట్ట‌యితే క‌ఠిన చ‌ర్య‌లుంటాయ‌ని ఇటీవ‌లే తెలంగాణ, ఆంధ్ర‌ప్ర‌దేశ్ ప్ర‌భుత్వాలు హెచ్చ‌రించి విశాఖ ఏరియాలో పెంచుతున్న‌టువంటి గంజాయి మొక్క‌ల‌ను నాశ‌నం చేసిన విష‌యం విధిత‌మే. అయితే తాజాగా హైద‌రాబాద్‌లో షాకింగ్ విష‌యాలు వెలుగులోకి వ‌చ్చాయి.  నూత‌న సంవ‌త్స‌రం స‌మీపిస్తున్న త‌రుణంలో యువ‌తకు ఎక్కువ‌గా నిషా ఎక్కేందుకు కొత్త ప్లాన్‌లు వేస్తున్నారు. ముఖ్యంగా గంజాయితో హాష్ ఆయిల్‌ను త‌యారు చేసి.. భారీగా నిలువ చేసి డిసెంబ‌ర్ 31, నూత‌న సంవ‌త్స‌ర వేడుక‌ల‌కు విక్ర‌యించ‌డానికి ప్ర‌ణాళిక‌లు సిద్ధం చేసారు.

 కానీ ప్ర‌ణాళిక‌లను ప‌సిగ‌ట్టి.. గంజాయి నుంచి హాష్ ఆయిల్ తీసి విక్ర‌యిస్తున్న ముఠాను హైద‌రాబాద్ పోలీసులు అరెస్టు చేసారు. వీరి నుంచి రూ.25ల‌క్ష‌ల విలువైన 3.5 లీట‌ర్ల ప్యాకెట్ల గంజాయి నూనె స్వాధీనం చేసుకున్న‌ట్టు హైద‌రాబాద్‌ సీపీ అంజ‌నీకుమార్ మీడియాకు వివ‌రాల‌ను వెల్ల‌డించారు. ముఖ్యంగా నిందితులు సంప‌తి కిర‌ణ్‌కుమార్‌, షేక్ క‌మ‌ల్‌, మ‌హ్మ‌ద్ ఇర్పాన్‌లు ఆంధ్ర‌ప్ర‌దేశ్‌లోని విశాఖ జిల్లా పాడేరు నుంచి వేర్వేరుగా న‌గ‌రానికి గంజాయి, హాష్ ఆయిల్‌ను తీసుకువ‌చ్చిన‌ట్టు తెలిపారు.

జ‌హ‌నుమాలో నివ‌సించే మ‌హ్మ‌ద్ ఇర్పాన్ హ‌మాలీగా, యాప్రాల్ నివాసి షేక్ క‌మ‌ల్ ఫుడ్ డెలివ‌రీ బాయ్‌గా ప‌ని చేస్తుంటారు. అయితే మూడు నెల‌ల క్రితం క‌మ‌ల్‌కు ఇర్ఫాన్ ప‌రిచ‌మ‌య్యాడు. నూత‌న సంవ‌త్స‌రం వేడుక‌ల‌లో గంజాయి గిరాకి బాగుంటుంద‌ని, ముఖ్యంగా విద్యార్థులు, యువ‌త‌కు చేర‌వేద్దామ‌ని ప్లాన్ వేసారు. వీరిద్ద‌రూ క‌లిసి గ‌త నెల న‌వంబ‌ర్‌లో పాడేరు వ‌ద్ద‌కు వెళ్లారు. గంజాయి స‌ర‌ఫ‌రా దారుడు గౌత‌మ్‌ను ప‌రిచ‌యం చేసుకుని.. సుమారు 2 లీట‌ర్ల హాష్ ఆయిల్‌ను తీసుకొచ్చారు. కొద్ది రోజుల క్రితం ఒక్కొక్క సంచిని రూ1000కి విక్ర‌యించేందుకు ప్ర‌య‌త్నించారు. ఈ త‌రుణంలోనే సౌత్ జోన్ పోలీసులు ఫ‌ల‌క్‌నుమా వ‌ద్ద ఇర్ఫాన్‌, క‌మ‌ల్‌ల‌ను అదుపులోకి తీసుకున్నారు.

విశాఖ‌ప‌ట్ట‌ణం జిల్లా పాయ‌క‌రావుపేట‌కు చెందిన కిర‌ణ్‌కుమార్ ఐటీఐ చ‌దివిన త‌రువాత అక్క‌డ‌క్క‌డ‌ చిన్న చిన్న ఉద్యోగాలు చేసాడు.  గంజాయి విక్ర‌యిస్తూ ఓ సారి జైలుకు కూడా వెళ్లాడు. అత‌నికి మోహ‌న్ అనే యువ‌కుడు ప‌రిచ‌మై.. హైద‌రాబాద్ న‌గ‌రంలో హాష్ ఆయిల్‌కు భారీగా డిమాండ్ ఉంటుంద‌ని తెలుసుకుని మ‌ణికొండ‌లో ఓ రూమ్‌ను అద్దెకు తీసుకున్నాడు. నూత‌న సంవ‌త్స‌ర వేడుక‌ల కోసం పాడేరుకు వెళ్లి.. అక్క‌డ డీల‌ర్ల సాయంతో 1.5 లీట‌ర్లు హాష్ ఆయిల్ కొని నాలుగు రోజుల క్రితం మ‌ణికొండ‌కు వ‌చ్చాడు. ఈ త‌రుణంలోనే పోలీసులు స‌మాచారం తెలుసుకుని అదుపులోకి తీసుకుని 1.5 లీట‌ర్ల గంజాయి నూనెను స్వాధీనం చేసుకున్నారు. ముఖ్యంగా పిల్ల‌ల ప్ర‌వ‌ర్త‌న‌పై త‌ల్లిదండ్రులు ఎప్ప‌టిక‌ప్పుడూ నిఘా పెట్టాల‌ని సీపీ అంజ‌నీకుమార్ సూచించారు.





మరింత సమాచారం తెలుసుకోండి:

సంబంధిత వార్తలు: