ബിഗ് ബില്യൺ ഡെയ്സ് എത്തുന്നു; ഐഫോൺ 12 വില്പനക്കെത്തുക 50,000 രൂപയ്ക്കോ?
ബിഗ് ബില്യൺ ഡെയ്സ് എത്തുന്നു; ഐഫോൺ 12 വില്പനക്കെത്തുക 50,000 രൂപയ്ക്കോ? ഐഫോൺ 13, ഐഫോൺ 13 മിനി, ഐഫോൺ 13 പ്രോ, ഐഫോൺ 13 പ്രോ മാക്സ് എന്നിങ്ങനെ നാല് ഫോണുകൾ ഉൾകൊള്ളുന്ന ഐഫോൺ 13 ശ്രേണിയ്ക്ക് ഇന്ത്യയിൽ 69,900 രൂപ മുതൽ 1.80 ലക്ഷം വരെയാണ് വില. ഐഫോൺ 13 വന്നതിന് പിന്നാലെ കഴിഞ്ഞ വർഷമെത്തിയ ഐഫോൺ 12 മോഡലുകളുടെ വില ആപ്പിൾ കുറച്ചിരുന്നു. ഈ മാസം പതിനാലിനാണ് അമേരിക്കൻ ടെക് ഭീമന്മാരായ ആപ്പിൾ ഐഫോൺ 13 അവതരിപ്പിച്ചത്. ഏകദേശം 14,000 രൂപയോളമാണ് ആപ്പിൾ കുറച്ചത്. 2020 ഒക്ടോബറിൽ ഐഫോൺ 12 അവതരിപ്പിച്ചപ്പോൾ 64 ജിബി സ്റ്റോറേജ് ഓപ്ഷന് 79,900 രൂപയും, 128 ജിബി സ്റ്റോറേജ് വേരിയന്റിന് 84,900 രൂപയും, 256 ജിബി സ്റ്റോറേജ് മോഡലിന് 94,900 രൂപയുമായിരുന്നു വില.
ഐഫോൺ 12ന്റെ 64 ജിബി സ്റ്റോറേജ് ഓപ്ഷന് 65,900 രൂപയാണ് പുതിയ വില. 128 ജിബി പതിപ്പിന്റെ വില അതെ സമയം 70,900 രൂപയായും 256 ജിബി സ്റ്റോറേജ് വേരിയന്റിന്റെ വില 80,900 രൂപയായും കുറഞ്ഞിട്ടുണ്ട്.എന്നാൽ ഇതിലും വിലക്കുറവിൽ ഐഫോൺ 12 വാങ്ങണം എന്നാഗ്രഹമുണ്ടോ? എങ്കിൽ ഒക്ടോബർ മൂന്നിന് ആരംഭിക്കുന്ന ഫ്ലിപ്കാർട്ട് ബിഗ് ബില്യൺ ഡേയ്സ് സെയ്ൽ 2021 മികച്ച ഒരവസരമാണ്. മെഗാ ഡിസ്കൗണ്ട് മേളയ്ക്ക് മുൻപായി ഫ്ലിപ്കാർട്ട് പുറത്ത് വിട്ട ടീസർ അനുസരിച്ച് ഐഫോൺ 12 ബിഗ് ബില്യൺ ഡെയ്സ് സെയ്ലിൽ വിൽക്കുക 49,999 രൂപ മുതലാണ്. അതായത് ഇപ്പോഴത്തെ വിലയേക്കാൾ 15,901 രൂപ ഡിസ്കൗണ്ടിൽ ഐഫോൺ 12 വാങ്ങാം.
49,999 രൂപയ്ക്ക് വിപണിയിൽ ലഭ്യമായ മികച്ച പ്രീമിയം സർട്ട്ഫോണുകളിൽ ഒന്നാണ് ഐഫോൺ 12. സെറാമിക് ഷീൽഡ് ഗ്ലാസ് കവറുള്ള സൂപ്പർ റെറ്റിന XDR ഓഎൽഇഡി ഡിസ്പ്ലെയുള്ള 6.1-ഇഞ്ച് സ്ക്രീൻ ആണ് ഐഫോൺ 12ന്. A14 ബയോണിക് ചിപ്പ് ആണ് ഐഫോൺ 12-ന്റെ ഹൃദയം. 4K വീഡിയോ എഡിറ്റിംഗ് വരെ പുഷ്പം പോലെ കൈകാര്യം ചെയ്യാൻ പറ്റുന്ന വിധമാണ് A14 ബയോണിക് ചിപ്പ് തയ്യാറാക്കിയിരിക്കുന്നത്.വൈഡ്-ആംഗിൾ, അൾട്രാ വൈഡ്-ആംഗിൾ ഷൂട്ടറുകളുള്ള 12-മെഗാപിക്സൽ ഡ്യുവൽ റിയർ ക്യാമെറയാണ് ഐഫോൺ 12-ൽ.
12-മെഗാപിക്സൽ സെൽഫി ക്യാമെറയാണ് ക്രമീകരിച്ചിരിക്കുന്നത്. 17 മണിക്കൂർ വരെ വീഡിയോ പ്ലേബാക്ക് നൽകുന്ന ബാറ്ററിയാണ് ഐഫോൺ 12ൽ ക്രമീകരിച്ചിരിക്കുന്നത്. 15W വരെ മാഗ് സേഫ് വയർലെസ് ചാർജിംഗിനെയും 7.5W വരെ ക്യു വയർലെസ് ചാർജിംഗിനെയും ഐഫോൺ 12 പിന്തുണയ്ക്കും. കറുപ്പ്, നീല, പച്ച, പ്രോഡക്റ്റ് (റെഡ്), വെളുപ്പ് നിറങ്ങളിലാണ് ഐഫോൺ 12 വാങ്ങാവുന്നത്.