భారత క్రికెట్లో సంక్షోభం.. కోచ్ను తొలగించాలంటూ అభిమానుల ఆగ్రహం!
ఆస్ట్రేలియాతో జరిగిన టెస్టు సిరీస్లో భారత్ ఘోర పరాజయం పాలవ్వడంతో (3-1 తేడాతో ఓటమి), భారత క్రికెట్లో ఒక్కసారిగా అలజడి మొదలైంది. హెడ్ కోచ్ గౌతమ్ గంభీర్, మోర్నీ మోర్కెల్తో పాటు సహాయక సిబ్బంది అభిషేక్ నాయర్, టి. దిలీప్ల పనితీరుపై తీవ్ర విమర్శలు వెల్లువెత్తుతున్నాయి. జట్టు పేలవ ప్రదర్శన, జట్టు నిర్వహణలో లోపాలే ఇందుకు కారణమని అభిమానులు, విశ్లేషకులు మండిపడుతున్నారు. వారిని వెంటనే తొలగించాలనే డిమాండ్లు ఊపందుకున్నాయి. విమర్శలకు ప్రధాన కారణాలు ఏవో చూద్దాం
* ఆటగాళ్ల పేలవ ప్రదర్శన:
కెప్టెన్ రోహిత్ శర్మ, సీనియర్ బ్యాటర్ విరాట్ కోహ్లీ వంటి కీలక ఆటగాళ్లు సిరీస్లో ఆశించిన స్థాయిలో రాణించలేకపోయారు. ముఖ్యంగా చివరి టెస్టులో రోహిత్ శర్మ విశ్రాంతి తీసుకోవడం తీవ్ర విమర్శలకు దారితీసింది. కీలకమైన మ్యాచ్లో కెప్టెన్ లేకపోవడం జట్టుపై తీవ్ర ప్రభావం చూపింది.
* గాయాల నిర్వహణలో వైఫల్యం
ఫాస్ట్ బౌలర్ జస్ప్రీత్ బుమ్రా సిరీస్ సమయంలో వెన్ను గాయంతో బాధపడ్డాడు. ఆటగాళ్ల పనిభారాన్ని నిర్వహించడంలో కోచింగ్ స్టాఫ్ వ్యూహాలు సరిగా లేవని, దీనివల్లే బుమ్రా గాయపడ్డాడని విమర్శకులు ఆరోపిస్తున్నారు. ఫిట్నెస్పై సరైన శ్రద్ధ తీసుకోకపోవడం జట్టుకు నష్టం చేకూర్చిందని అంటున్నారు.
* కోచింగ్ విధానంలో లోపాలు
హెడ్ కోచ్ ఆటగాళ్లతో సరిగా కమ్యూనికేట్ చేయడం లేదని, ఇది జట్టు నైతిక స్థైర్యం, ఆటతీరును దెబ్బతీసే అవకాశం ఉందని నివేదికలు సూచిస్తున్నాయి. కోచ్, ఆటగాళ్ల మధ్య సమన్వయం లేకపోవడం జట్టు ప్రదర్శనపై ప్రభావం చూపుతోంది.
* జట్టు ఎంపికలో తప్పులు
కొన్ని మ్యాచ్లలో జట్టు ఎంపిక సరిగా లేదని, ఇది కూడా ఓటమికి ఒక కారణమని విశ్లేషకులు అభిప్రాయపడుతున్నారు. సరైన కాంబినేషన్లో ఆటగాళ్లను ఎంపిక చేయకపోవడం జట్టుకు ప్రతికూలంగా మారింది. బీసీసీఐ ఈ విషయంపై సీరియస్గా దృష్టి సారించింది. గంభీర్ పనితీరును సమీక్షించాలని నిర్ణయించింది. ముఖ్యంగా అతని సహాయక సిబ్బంది పనితీరును క్షుణ్ణంగా పరిశీలించనుంది.
ఛాంపియన్స్ ట్రోఫీ వంటి ముఖ్యమైన టోర్నమెంట్లు రాబోతున్నాయి. ఈ నేపథ్యంలో భారత జట్టు భవిష్యత్ ప్రదర్శనలను మెరుగుపరచడానికి కోచింగ్, ప్లేయర్ మేనేజ్మెంట్లో సమూల మార్పులు చేయాలని పెద్ద ఎత్తున డిమాండ్లు వినిపిస్తున్నాయి. ఈ సంక్షోభం భారత క్రికెట్కు ఎలాంటి మలుపు తిప్పుతుందో వేచి చూడాలి.