जागतिक बॅडमिंटन स्पर्धेत सिंधू अंतिम फेरीत
भारतीय बॅडमिंटनपटू पीव्ही सिंधूने जागतिक बॅडमिंटन स्पर्धेच्या अंतिम फेरीत धडक दिली आहे. सिंधूने शनिवारी झालेल्या सामन्यात चिनी प्रतिस्पर्धी शेन युफेईला 39 मिनिटांच्या खेळातच नमवले. तिने युफेईला 21-7, 21-14 असे दोन सरळ सेटमध्ये पराभूत केले. त्यामुळे सलग तिसऱ्यांदा अंतिम फेरीत धडक देण्याचा विक्रम सिंधूने आपल्या नावे केला आहे.
सामन्याला सुरुवात झाल्यापासूनच सिंधूने वर्चस्व राखले. त्यामुळे पहिला सेट तिने 21-7 अशा मोठ्या फरकाने जिंकला. दुसऱ्या सेटमध्येही तिने कामगिरीत सातत्य राखले. तिने आक्रमक खेळत दुसरा सेटही 21-14 ने आपल्या नावावर करून अंतिम फेरी गाठली.
दरम्यान, सिंधूने ताई त्झू यिंगचा 12-21, 23-21 आणि 21-19 असा पराभव करून उपांत्य फेरीत प्रवेश केला होता. आता उपांत्य फेरीत एकहाती विजय मिळवलेल्या सिंधूपासून जागतिक विजेतेपद केवळ एक पाऊल दूर आहे.