సీనియర్ రాజకీయ నాయకుడు, ఒంగోలు మాజీ ఎమ్మెల్యే, మాజీ మంత్రి బాలినేని శ్రీనివాసరెడ్డి పేరు వినిపిస్తేనే రాజకీయాల్లో ఒక ప్రత్యేక బరువు కనిపిస్తుంది. వైసీపీలో కీలక స్థానాల్లో పని చేసిన అనుభవం, మంత్రిగా వ్యవహరించిన ట్రాక్ రికార్డు ఉన్న నాయకుడు కావడంతో ఆయన ప్రతి అడుగు రాజకీయంగా ఆసక్తికరంగానే మారుతోంది. అయితే ప్రస్తుతం జనసేనలో ఉన్న బాలినేనికి తగిన స్థాయిలో ప్రాధాన్యం దక్కడం లేదన్న మాట పార్టీ వర్గాల్లోనూ, ప్రత్యర్థుల్లోనూ బలంగా వినిపిస్తోంది. గత ఎన్నికలకు ముందు వైసీపీ తరఫున పోటీ చేసిన బాలినేని… ఆ పార్టీతో విభేదాలు తలెత్తిన తర్వాత బయటకు వచ్చారు. అనంతరం పవన్ కళ్యాణ్ నాయకత్వంపై నమ్మకంతో జనసేన కండువా కప్పుకున్నారు. అయితే జనసేనలో చేరినప్పటి నుంచి ఆయనకు ఆశించిన స్థాయిలో రాజకీయ స్థానం, నిర్ణయాధికారం దక్కడం లేదని సన్నిహితులు వ్యాఖ్యానిస్తున్నారు. ముఖ్యంగా ఒంగోలు రాజకీయాల్లో ఆయనకు ఉన్న బలాన్ని దృష్టిలో పెట్టుకుంటే, ఈ పరిస్థితి మరింత చర్చనీయాంశంగా మారింది.

ఇక మరోవైపు, జనసేనతో కలిసి ఉన్న టీడీపీ శ్రేణుల్లో కూడా బాలినేనిపై వ్యతిరేకత ఉందన్న ప్రచారం జరుగుతోంది. గత వైసీపీ నేపథ్యం కారణంగా కొందరు నేతలు ఆయనను పూర్తిగా అంగీకరించలేకపోతున్నారనే వాదన వినిపిస్తోంది. ఈ వ్యతిరేకతను తగ్గించేందుకు బాలినేని ఇటీవల కాలంగా మౌనంగానే రాజకీయంగా అడుగులు వేస్తున్నారు. అయినా సరే, తనకు పార్టీ లోపల సరైన గుర్తింపు రావడం లేదన్న అసంతృప్తి మాత్రం ఆయనలో ఉందని తెలుస్తోంది. ఈ నేపథ్యంలోనే తాజాగా జనసేన అధినేత, డిప్యూటీ సీఎం పవన్ కళ్యాణ్‌తో బాలినేని కీలక భేటీ అయ్యారు. ఈ సమావేశంలో పార్టీలో తన పాత్రను పెంచడం, తనకు తగిన గౌరవం కల్పించడంతో పాటు ఎమ్మెల్సీ పదవిపై కూడా చర్చ జరిగినట్లు రాజకీయ వర్గాల్లో హాట్ టాక్ నడుస్తోంది. వాస్తవానికి గతంలోనే బాలినేనికి ఎమ్మెల్సీ ఆఫర్ వచ్చిందని, అయితే “అది నా స్థాయికి సరిపోదు” అంటూ ఆయన తిరస్కరించినట్టు అప్పట్లో వార్తలు వచ్చాయి. కానీ ఇప్పుడు పదవి లేకపోవడం వల్ల పార్టీలోనూ, వ్యక్తిగతంగానూ ఇబ్బందులు ఎదురవుతున్నాయని ఆయన భావిస్తున్నట్టు సమాచారం.

ప్రస్తుతం ఎమ్మెల్సీ పదవుల కోసం జనసేనలో చాలామంది సీనియర్ నేతలు లైన్‌లో ఉన్నారు. పైగా ఇప్పటికిప్పుడు ఖాళీలు కూడా లేని పరిస్థితి. అయితే ఇటీవల రాజీనామా చేసిన వైసీపీ ఎమ్మెల్సీల సీట్లు ఖాళీ అయితే, వాటిలో ఒకటి బాలినేనికి కేటాయించే అవకాశాన్ని పార్టీ పరిశీలిస్తోందన్న కథనాలు ఆసక్తిని రేపుతున్నాయి. అనుభవం, సామాజిక సమీకరణలు, ఒంగోలు రాజకీయాలపై పట్టును దృష్టిలో పెట్టుకుంటే బాలినేనికి అవకాశం దక్కే ఛాన్స్ ఉందని కూడా కొందరు విశ్లేషిస్తున్నారు. మొత్తానికి జనసేనలో బాలినేని శ్రీనివాసరెడ్డి భవిష్యత్ ఇప్పుడు ఎమ్మెల్సీ పదవి చుట్టూనే తిరుగుతోంది. పవన్ కళ్యాణ్ తీసుకునే నిర్ణయం ఆయన రాజకీయ జీవితంలో కొత్త మలుపు తిప్పుతుందా? లేక వెయిటింగ్ గేమ్ ఇంకా కొనసాగుతుందా? అన్నది రాబోయే రోజుల్లో తేలాల్సిందే. ఇప్పటికి మాత్రం “బాలినేని – ఎమ్మెల్సీ” అంశం జనసేన రాజకీయాల్లో హాట్ టాపిక్‌గా మారిందన్నది వాస్తవం.