అమరావతికి :కేంద్ర-రాష్ట్రాల్లో ఒకే ప్రభుత్వం ఉన్నా ... రాజధాని బిల్లుకు లీగల్ చిక్కులు!
ఆంధ్రప్రదేశ్ రాజధానిగా అమరావతికి శాశ్వత హోదా కల్పించేందుకు కేంద్ర ప్రభుత్వం పార్లమెంట్లో తీర్మానం చేయాల్సిన తరుణం ఆసన్నమైంది. కేంద్రం ఆమోద ముద్ర, రాష్ట్రపతి గెజిట్ నోటిఫికేషన్తో దేశ పటంలో అమరావతికి అధికారికంగా చోటు దక్కుతుంది. కేంద్రంలో, రాష్ట్రంలో ఎన్డీయే కూటమే అధికారంలో ఉంది కాబట్టి, ఇది చిటికెలో జరగాల్సిన పని అని అంతా అనుకుంటున్నారు. కానీ, అనుకున్నంత సులువు కాదు! ఈ ప్రక్రియలో కొన్ని కీలకమైన రాజ్యాంగపరమైన, న్యాయపరమైన చిక్కుముడులు ఎదురవుతున్నాయని తెలుస్తోంది. ఏపీ విభజన చట్టంలో సవరణే పెద్ద సవాల్!.. అమరావతికి రాజధాని హోదా కల్పించాలంటే, కేంద్ర న్యాయ శాఖ మంత్రి ముందుగా ఉభయ సభలలో ఒక సవరణ తీర్మానాన్ని ప్రవేశపెట్టాలి. ఆ సవరణలు ప్రధానంగా రెండు అంశాలపై ఉండాలి:
రాజధాని గుర్తింపు: ఏపీకి రాజధానిగా అమరావతిని అధికారికంగా గుర్తించాలి. ఉమ్మడి రాజధాని గడువు: ఉమ్మడి రాజధానిగా ఉన్న హైదరాబాద్ గడువు 2024, జూన్ 2తో ముగిసింది కాబట్టి, దానిని కొనసాగించడం లేదని స్పష్టం చేయాలి. ఇక్కడే అసలు చిక్కు వచ్చి పడింది. విభజన చట్టం ప్రకారం, హైదరాబాద్ ఉమ్మడి రాజధానిగా 2024 జూన్ 2 వరకు మాత్రమే ఉంది. మరి ఇప్పుడు అమరావతిని రాజధానిగా గుర్తించే బిల్లును 2014 నుంచే అమలులోకి వచ్చేలా రూపొందించాలా? లేక 2024 జూన్ 2 తర్వాత నుంచి వర్తించేలా చేస్తారా? అనే అంశంపైనే న్యాయపరమైన చర్చ జరుగుతోంది. పాత తేదీల్లో బిల్లు ఎందుకు?..2014లోనే ఏపీ అసెంబ్లీలో అమరావతిని రాజధానిగా తీర్మానించారు. 2015లో ప్రధాని నరేంద్ర మోదీ శంకుస్థాపన చేశారు. కేంద్రం అప్పుడే అమరావతికి నిధులు కేటాయించింది.
ఈ పనులన్నీ అధికారికంగా చెల్లుబాటు కావాలంటే, బిల్లు పాత తేదీ నుంచే అమలయ్యేలా ఉండాలని న్యాయ నిపుణులు సూచిస్తున్నారు. ఈ లీగల్ ఇబ్బందులు లేకుండా చూసుకోవాలని కేంద్రం ఏపీ ప్రభుత్వాన్ని కోరినట్లు ప్రచారం జరుగుతోంది. రాజధాని విస్తీర్ణం ఎంత? సరిహద్దులు ఎక్కడ నుంచి ఎక్కడ వరకు? అనే అంశాలపై పూర్తి స్పష్టతతో కూడిన ప్రతిపాదనలను ఏపీ ప్రభుత్వం కేంద్రానికి పంపించాల్సి ఉంది. ఈ ప్రక్రియ పూర్తయితే, రాబోయే బడ్జెట్ సెషన్ సందర్భంగా పార్లమెంట్లో బిల్లు ఆమోదం పొందే అవకాశం ఉందని అంటున్నారు. అమరావతికి చట్టపరమైన హోదా దక్కితే, ఔటర్ రింగ్ రోడ్ వంటి నిర్మాణ పనులు ఊపందుకోవడంతో పాటు, ఉద్యోగాలు, పెట్టుబడులు, అభివృద్ధి కార్యక్రమాలు వేగవంతమవుతాయి.