സംസ്ഥാന ബിജെപിയുടെ പുതിയ അധ്യക്ഷ സ്ഥാനത്തേക്ക് രാജീവ് ചന്ദ്രശേഖർ: സ്വാഗതം ചെയ്ത് ശോഭാ സുരേന്ദ്രനും, എംടി രമേശും! രാജീവ് ചന്ദ്രശേഖറിൻ്റെ അനുഭവ സമ്പത്ത് കേരളത്തിന് പ്രയോജനപ്പെടുമെന്ന് എംടി രമേശ് പറഞ്ഞപ്പോൾ രാജീവ് ചന്ദ്രശേഖർ പ്രസ്ഥാനത്തെ നല്ല രീതിയിൽ മുന്നോട്ടു നയിക്കുമെന്ന് ഉറപ്പുണ്ടെന്ന് ശോഭാ സുരേന്ദ്രൻ പ്രതികരിച്ചു. സംസ്ഥാന അധ്യക്ഷ സ്ഥാനത്തേക്ക് എംടി രമേശിനെയും ശോഭാ സുരേന്ദ്രനെയും ഉൾപ്പെടെ കേന്ദ്രനേതൃത്വം പരിഗണിച്ചിരുന്നു. ഒടുവിലാണ് രാജീവ് ചന്ദ്രശേഖറിലേക്ക് നേതൃത്വം എത്തിയത്.സംസ്ഥാന ബിജെപിയുടെ പുതിയ അധ്യക്ഷനായി രാജീവ് ചന്ദ്രശേഖറിനെ നിയമിക്കാനുള്ള കേന്ദ്ര തീരുമാനത്തെ സ്വാഗതം ചെയ്ത് മുതിർന്ന നേതാക്കളായ എംടി രമേശും ശോഭാ സുരേന്ദ്രനും. രാജീവ് ചന്ദ്രശേഖർ പുതിയ ആളല്ലെന്നും കേന്ദ്രമന്ത്രിയായി ഇരുന്ന് പ്രവർത്തനങ്ങൾ തെളിയിച്ചിട്ടുണ്ടെന്നും ശോഭാ സുരേന്ദ്രൻ പറഞ്ഞു.
തിരുവനന്തപുരത്ത് എല്ലാവർക്കും ഇടയിൽ പ്രവർത്തിച്ച അദ്ദേഹം വളരെ കുറഞ്ഞ വോട്ടിനാണ് പരാജയപ്പെട്ടത്. വളരെ കൃത്യതയോടെ അദ്ദേഹം ബിജെപിയെ ശക്തമായി മുന്നോട്ടു നയിക്കും. ബിജെപി അതിശക്തമായി മുന്നോട്ടുപോകും. എല്ലാതലത്തിലും പാർട്ടിക്ക് വേരോട്ടമുണ്ടാക്കുകയാണ് ലക്ഷ്യം. സന്തോഷത്തോടെയാണ് പുതിയ പ്രസിഡൻ്റിനെ നോക്കിക്കാണുന്നത്. എല്ലാവരും ചേരുന്ന സംഘടനാ സംവിധാനത്തിൽ രാജീവ് ചന്ദ്രശേഖർ പ്രസ്ഥാനത്തെ നല്ല രീതിയിൽ മുന്നോട്ടു നയിക്കുമെന്ന് ഉറപ്പമുണ്ടെന്നും ശോഭാ സുരേന്ദ്രൻ വ്യക്തമാക്കി. ജൂനിയറാണോ സീനിയറാണോ എന്ന് നോക്കിയല്ല പാർട്ടിയിൽ ഒരു ചുമതല നൽകുക. എല്ലാ വശങ്ങളും പരിഗണിച്ചുകൊണ്ടാണ് കേന്ദ്ര നേതൃത്വം ചുമതല ഏൽപ്പിക്കുക. രാജീവ് ചന്ദ്രശേഖറിൻ്റെ അനുഭവ സമ്പത്ത് ഏറ്റവും പ്രധാനപ്പെട്ടതാണ്. കേന്ദ്രമന്ത്രിയായും അഖിലേന്ത്യ വക്താവായും പ്രവർത്തിച്ചിട്ടുണ്ട്.
കഴിഞ്ഞ പാർലമെൻ്റ് തെരഞ്ഞെടുപ്പിൽ സ്ഥാനാർഥിയായി. വരുന്ന മൂന്ന് വർഷക്കാലം പാർട്ടിയെ നയിക്കാൻ അദ്ദേഹത്തിൻ്റെ നേതൃത്വത്തിന് സാധിക്കുമെന്ന വിശ്വാസമാണ് കേന്ദ്രനേതൃത്വത്തിനുള്ളത്. കേരളത്തിൻ്റെ പാർട്ടിഘടകം ഒന്നാകെ കേന്ദ്രനേതൃത്വത്തിൻ്റെ തീരുമാനത്തെ സ്വാഗതം ചെയ്യും. രാജീവ് ചന്ദ്രശേഖറിൻ്റെ നേതൃത്വത്തിൽ കേരളത്തിലെ പാർട്ടിക്ക് മുന്നോട്ടുപോകാൻ കഴിയുമെന്ന വിശ്വാസം തങ്ങൾക്കുണ്ടെന്നും എംടി രമേശ് കൂട്ടിച്ചേർത്തു. രാജീവ് ചന്ദ്രശേഖറിൻ്റെ അനുഭവ സമ്പത്ത് കേരളത്തിന് പ്രയോജനപ്പെടുമെന്നു തന്നെയാണ് വിശ്വാസമെന്ന് എംടി രമേശ് പറഞ്ഞു.
കഴിഞ്ഞ ലോക്സഭാ തെരഞ്ഞെടുപ്പിൽ തിരുവനന്തപുരത്ത് മത്സരിച്ച അദ്ദേഹം എല്ലാവരെയും അത്ഭുതപ്പെടുത്തി വലിയ മുന്നേറ്റം കാഴ്ചവെച്ചു. അത് അദ്ദേഹത്തിനുള്ള ജനകീയ പിന്തുണയുടെ കൂടി തെളിവാണ്. രാജീവ് ചന്ദ്രശേഖറിൻ്റെ നേതൃത്വത്തിൽ കേരളത്തിൽ ബിജെപിക്ക് വലിയ വിജയങ്ങൾ കൈവരിക്കാൻ സാധിക്കുമെന്ന ശുഭാപ്തിവിശ്വാസമാണ് പാർട്ടി പ്രവർത്തകർക്കും നേതാക്കന്മാർക്കും ഉള്ളതെന്നും എംടി രമേശ് പറഞ്ഞു.