ആരാണ് ആ തമിഴ് പ്രധാനമന്ത്രിയെന്ന് സ്റ്റാലിൻ!
ആരാണ് ആ തമിഴ് പ്രധാനമന്ത്രിയെന്ന് സ്റ്റാലിൻ! 2024 തിരഞ്ഞെടുപ്പിനു ശേഷം തമിഴർ പ്രധാനമന്ത്രിയെ നിയമിക്കുമെന്ന അമിത് ഷായുടെ പ്രസ്താവനയെ സ്വാഗതം ചെയ്യുന്നുവെന്ന് വ്യക്തമാക്കിയ സ്റ്റാലിൻ അത് ആരായിരിക്കുമെന്നും ചോദിച്ചു. സംസ്ഥാനത്തെ മുൻ ബിജെപി അദ്ധ്യക്ഷയും നിലവിലെ തെലങ്കാന ഗവർണറുമായ തമിഴിസൈ സൗന്ദരരാജൻ, മുൻ ബിജെപി അദ്ധ്യക്ഷനും നിലവിൽ കേന്ദ്ര സഹമന്ത്രിയുമായ എൽ മുരുകൻ എന്നിവരുടെ പേര് സ്റ്റാലിൻ നിർദ്ദേശിക്കുകയും ചെയ്തു. ഇതോടെ, സ്റ്റാലിന്റെ പ്രസ്താവന അമിത് ഷായുടെ പ്രസ്താവനയെ ദുർവ്യാഖ്യാനം ചെയ്യുന്നതാണെന്ന് ആരോപിച്ച് ബിജെപി രംഗത്തുവന്നു. ഷായുടെ വാക്കുകൾ സന്ദർഭത്തിൽ നിന്ന് അടർത്തിയെടുത്ത് ദുർവ്യാഖ്യാനം ചെയ്യുകയാണ് സ്റ്റാലിനെന്ന് ബിജെപി പറഞ്ഞു. 2024 തിരഞ്ഞെടുപ്പിൽ തമിഴ്നാട്ടിൽ നിന്ന് 25 എൻഡിഎ എംപിമാരുണ്ടാകണമെന്നും, രാജ്യം ആദ്യത്തെ തമിഴ്നാട്ടുകാരനായ പ്രധാനമന്ത്രിയെ കാണുമെന്നും പ്രസ്താവിച്ച അമിത് ഷായെ വെട്ടിലാക്കി സ്റ്റാലിന്റെ തിരിച്ചടി.
"ഒരു തമിഴനെ പ്രധാനമന്ത്രിയാക്കണമെന്ന അമിത് ഷായുടെ ആഗ്രഹത്തിൽ എനിക്ക് ആഹ്ലാദമുണ്ട്. പക്ഷെ, എന്തുകൊണ്ടാണ് ഷായ്ക്ക് പ്രധാനമന്ത്രി മോദിയോട് ഇത്ര ദേഷ്യമെന്ന് എനിക്ക് മനസ്സിലാകുന്നില്ല. 2024ൽ തമിഴർ പ്രധാനമന്ത്രിയെ വേണമെന്നുണ്ടെങ്കിൽ അവർക്ക് തമിഴിസൈ സൗന്ദരരാജനെയോ എൽ മുരുകനെയോ ആക്കാവുന്നതാണ്," സ്റ്റാലിൻ പറഞ്ഞു. തമിഴ്നാട്ടിൽ ബിജെപി കാര്യകർത്താ യോഗത്തിൽ സംസാരിക്കുമ്പോഴാണ് അമിത് ഷാ തമിഴർ പ്രധാനമന്ത്രിയായിരിക്കും ഇനി രാജ്യം ഭരിക്കുക എന്ന് സൂചിപ്പിക്കുന്ന പ്രസ്താവന നടത്തിയത്. കോവിലമ്പാക്കത്താണ് കാര്യകർത്തായോഗം നടന്നത്. എന്നാൽ സംസ്ഥാനത്തു നിന്നുള്ള മുതിർന്ന നേതാക്കളെ പ്രധാനമന്ത്രിമാരാകുന്നത് തടഞ്ഞത് ഡിഎംകെയാണെന്ന അമിത് ഷായുടെ പ്രസ്താവനയെ സ്റ്റാലിൻ തള്ളിക്കളഞ്ഞു.
ഈ പ്രസ്താവന പരസ്യമായി നടത്താൻ തയ്യാറാണോയെന്നും അദ്ദേഹം ചോദിച്ചു. അതിന് തയ്യാറായാൽ തന്റെ പാർട്ടി വിഷയത്തിൽ വിശദമായ പ്രസ്താവന നടത്തും. ഈ യോഗത്തിൽ സംസ്ഥാനത്തു നിന്നുള്ള രണ്ട് നേതാക്കൾക്ക് പ്രധാനമന്ത്രിസ്ഥാനത്തെത്താൻ യോഗ്യതയുണ്ടായിട്ടും അതിന് സാധിച്ചില്ലെന്ന് അമിത് ഷാ സൂചിപ്പിച്ചു. കാമരാജരും ജികെ മൂപ്പനാരും പ്രധാനമന്ത്രിസ്ഥാനത്തിന് യോഗ്യരായിരുന്നു. ഇവർക്ക് പദവി ലഭിക്കാതിരിക്കാൻ പരിശ്രമിച്ചത് ഡിഎംകെയാണെന്നും അദ്ദേഹം ആരോപിച്ചു.
ഭാവിയിൽ തമിഴ്നാട്ടിൽ നിന്ന് ഒരു പ്രധാനമന്ത്രിയുണ്ടാകും. അതിന് മികച്ച വിജയം കരസ്ഥമാക്കണം: അദ്ദേഹം പറഞ്ഞു. 2024ൽ 300ലധികം സീറ്റുകൾ നേടി വീണ്ടും എൻഡിഎ അധികാരത്തിൽ വരുമെന്നും ഷാ പ്രസ്താവിച്ചു. എന്നാൽ ഷായുടേത് ഒരു പൊതുപ്രസ്താവന മാത്രമാണെന്ന് ബിജെപി സംസ്ഥാന പ്രസിഡണ്ട് കെ അണ്ണാമലൈ പറഞ്ഞു. മികച്ച പ്രകടനം നടത്തുന്നവർക്ക് അതിനൊത്ത പദവികൾ ലഭിക്കുന്ന ഏക പാർട്ടി ബിജെപി മാത്രമാണെന്ന് സൂചിപ്പിക്കാൻ ഷാ നടത്തിയ ഒരു പ്രസ്താവന മാത്രമായിരുന്നു അത്.