ബജ്‌രംഗ് ദൾ പ്രവർത്തകർ ക്രിസ്ത്യൻ പള്ളി കയ്യേറി ഭജന നടത്തി; മതപരിവർത്തനമെന്ന് ആരോപണം!
ബജ്‌രംഗ് ദൾ പ്രവർത്തകർ ക്രിസ്ത്യൻ പള്ളി കയ്യേറി ഭജന നടത്തി; മതപരിവർത്തനമെന്ന് ആരോപണം! ഒക്ടോബർ 17 ഞായറാഴ്ച രാവിലെ പതിനൊന്ന് മണിയോടെ ഹുബ്ബാലിയിലെ ബൈരിദേവർകോപ്പ പള്ളിയിലാണ് ഒരു വിഭാഗമാളുകൾ ബലം പ്രയോഗിച്ച് ഉള്ളിൽ കയറിയതെന്ന് എൻഡിടിവി റിപ്പോർട്ട് ചെയ്തു. മതപരിവർത്തനം ആരോപിച്ച് ബജ്‌രംഗ് ദൾ - വിശ്വഹിന്ദു പരിഷത്ത് പ്രവർത്തകർ കർണാടകയിലെ താൽക്കാലിക ക്രിസ്ത്യൻ പള്ളി കയ്യേറി ഭജന നടത്തി. പള്ളി കേന്ദ്രീകരിച്ച് മതപരിവർത്തനം നടക്കുന്നുണ്ടെന്ന് ആരോപിച്ചാണ് ഇവർ പള്ളി കയ്യേറിയതെന്നാണ് റിപ്പോർട്ട്. പള്ളിയുടെ ചുമതലയുള്ള പാസ്റ്റർ സോമു അവരധിയെ അറസ്റ്റ് ചെയ്യണമെന്ന ആവശ്യവുമായി ബിജെപി എംഎൽഎ അരവിന്ദ് ബെല്ലാഡ് രംഗത്തുവന്നു.
അറസ്റ്റ് നടപടി ആവശ്യപ്പെട്ട് എംഎൽഎയുടെ നേതൃത്വത്തിൽ ഹൈവേ ഉപരോധിച്ചു. പള്ളിയിൽ പ്രവേശിച്ച ഒരു വിഭാഗമാളുകൾ ഉച്ചഭാഷിണി ഉപയോഗിച്ച് ഭജനകളും പ്രാർഥനകളും നടത്തി. മതപരിവർത്തനത്തിനായി പള്ളിയിൽ എത്തിച്ച വിശ്വനാഥ് എന്നയാൾ പോലീസ് സ്റ്റേഷനിലെത്തി പരാതി നൽകിയിരുന്നുവെന്ന് ബജ്റംഗ് ദൾ സംസ്ഥാന കൺവീനർ രഘു സക്ലേഷ്പോര ആരോപിച്ചു. സോമുവിനെതിരെയും അദ്ദേഹത്തിനൊപ്പം ഉള്ളവർക്കെതിരെയുമാണ് ഇയാൾ പരാതി നൽകിയത്. ഇതിന് ശേഷം ഞങ്ങൾ പള്ളിയിൽ എത്തുകയും ഉള്ളിൽ പ്രവേശിച്ച് പ്രാർഥനയും ഭജനയും നടത്തുകയായിരുന്നുവെന്നും അദ്ദേഹം പറഞ്ഞു. ഇതിനിടെ പാസ്റ്ററുടെ നേതൃത്വത്തിൽ തങ്ങൾക്കെതിരെ മർദ്ദനം ഉണ്ടായെന്നും രഘു സക്ലേഷ്പോര പറഞ്ഞു.
പള്ളി കയ്യേറിയ സംഭവം വിവാദമായതോടെ ഇരു വിഭാഗവും പോലീസിൽ പരാതി നൽകി. പള്ളി കേന്ദ്രീകരിച്ച് മതപരിവർത്തനം നടക്കുന്നുണ്ടെന്ന ആരോപണം പള്ളി അധികൃതർ തള്ളി. പട്ടികജാതി - വർഗ വിഭാഗങ്ങൾക്കെതിരായ ആക്രമണം, മതവികാരത്തെ വ്രണപ്പെടുത്താനുള്ള കരുതിക്കൂട്ടിയുള്ള ദുരുദ്ദേശത്തോടെയുള്ള ശ്രമം എന്നീ വകുപ്പുകൾ ചുമത്തണമെന്നാവശ്യപ്പെട്ട് പാസ്റ്റർ പോലീസിൽ പരാതി നൽകി. പാസ്റ്ററിൽ നിന്നും പരാതി ലഭിച്ചതായും വിശദമായ അന്വേഷണം ആരംഭിച്ചതായും ഹുബ്ലി - ധദ്വാദ് പോലീസ് കമ്മീഷണർ ലാബു റാം വ്യക്തമാക്കി. സംഘത്തിൽ നിന്നും മർദ്ദനം ഏൽക്കേണ്ടിവന്നുവെന്ന് വിശ്വനാഥ് വ്യക്തമാക്കിയിട്ടുണ്ട്. ഇതിനിടെ പാസ്റ്റർ സോമുവും അദ്ദേഹത്തിനൊപ്പം ഉണ്ടായിരുന്നവരും ആശുപത്രിയിൽ ചികിത്സ തേടി. പള്ളിക്കുള്ളിൽ പ്രവേശിച്ചവരിൽ നിന്നും മർദ്ദനം ഏൽക്കേണ്ടിവന്നുവെന്നും പരിക്കുകൾ സംഭവിച്ചെന്നുമാണ് ഇവരുടെ ആരോപണം.
പള്ളി കേന്ദ്രീകരിച്ച് മതപരിവർത്തനം നടക്കുന്നുവെന്ന ആരോപണം അധികൃതർ തള്ളി. "പള്ളി കയ്യേറി ഒരു വിഭാഗമാളുകൾ ഭജന ചൊല്ലാൻ ആരംഭിച്ചതോടെയാണ് പാസ്റ്റർ സോമു ഇടപെട്ടത്. അദ്ദേഹത്തെ കയ്യേറ്റം ചെയ്യാൻ ശ്രമം ഉണ്ടാകുകയും ചെയ്തു. ഈ സമയം സ്ത്രീകൾ അടക്കമുള്ളവർ അവിടെ ഉണ്ടായിരുന്നു" - എന്ന് സഭയിലെ മുതിർന്ന അംഗമായ സെഡ്രിക് ജേക്കബ് പറഞ്ഞു. സംസ്ഥാനത്ത് അനധികൃതമായി പ്രവർത്തിക്കുന്ന പള്ളികളുടെ കണക്കെടുക്കാനാണ് സർവേ നടത്തുന്നതെന്ന് അധികൃതർ പറഞ്ഞു. ജില്ലാ ഡെപ്യൂട്ടി കമ്മീഷണർമാരോടും വിവിധ സർക്കാർ വകുപ്പുകൾക്കുമാണ് സർവേ നടത്താൻ നിർദേശം നൽകിയിരിക്കുന്നത്. കർണാടകയിൽ മതപരിവർത്തനം രൂക്ഷമാണെന്ന പരാതി നിലനിൽക്കുന്നതിലാണ് പള്ളികളുടെ കണക്കെടുക്കാൻ തീരുമാനിച്ചതെന്ന് സമിതി ചെയർമാനും ഹൊസദുർഗയിൽ നിന്നുള്ള ബിജെപി എംഎൽഎയുമായ ഗൂലിഹട്ടി ശേഖർ ടൈംസ് ഓഫ് ഇന്ത്യയോട് പറഞ്ഞു.
കർണാടകയിലെ ചില ഭാഗങ്ങളിൽ നിർബന്ധിത മതപരിവർത്തനം വ്യാപകമാണെന്ന പരാതി പരിശോധിക്കാനാണ് സർവേ നടത്തുന്നത്. തൻ്റെ സ്വന്തം ജില്ലയായ ചിത്രദുർഗയിൽ ഉൾപ്പെടെ കർണാടകയിൽ ഏകദേശം 1790 പള്ളികളുണ്ടെന്നും അദ്ദേഹം കൂട്ടിച്ചേർത്തു. ക്രിസ്ത്യൻ മിഷണറിമാരുടെ നേതൃത്വത്തിൽ മതപരിവർത്തനം രൂക്ഷമാണെന്ന ആരോപണം ഉയർന്നതോടെ ക്രിസ്ത്യൻ പള്ളികളുടെ എണ്ണമെടുക്കാൻ കർണാടക സർക്കാർ തീരുമാനിച്ചിരുന്നു. പിന്നാക്ക വിഭാഗം - ന്യൂനപക്ഷ ക്ഷേമ വകുപ്പിൻ്റെ നിയമസഭാ സമിതിയാണ് പരാതിയെത്തുടർന്ന് ക്രിസ്ത്യൻ ദേവാലയങ്ങളുടെ കണക്കെടുക്കുന്നത്.