సింగపూర్: భారత మహిళకు 30 ఏళ్లు జైలుశిక్ష..?
సింగపూర్ లో నివసిస్తున్న గాయత్రి మురుగయన్ అనే 41 ఏళ్ల భారత మహిళకు అక్కడి కోర్టు 30 ఏళ్ల జైలు శిక్ష విధించింది. పూర్తి వివరాలు తెలుసుకుంటే.. 2015 మే నెలలో గాయత్రి మయన్మార్కు చెందిన పియాంగ్ న్గైహ్ డాన్ (24) అనే ఒక యువతిని తన ఇంట్లో పనిమనిషిగా చేర్చుకుంది. అయితే గాయత్రి తన పనిమనిషిని ఆ రోజు నుంచే వేధించడం ప్రారంభించింది. ఏకంగా 14 నెలల పాటు ఈ యువతిని గాయత్రి దారుణంగా హింసించింది. చీపురు కట్ట, లోహపు గరిటెతో పియాంగ్ ని ఆమె చితకబాదిన సందర్భాలు కోకొల్లలు ఉన్నాయని పోలీసుల విచారణలో తేలింది. గాయత్రి తన పనిమనిషిని జుట్టు పట్టుకొని లాగారని, పిడిగుద్దులు గుద్దుతూ బలంగా తన్నారని కూడా సింగపూర్ పోలీసులు వెల్లడించారు. గాయత్రి తన పనిమనిషికి వాతలు కూడా పెట్టారని తెలిసింది. ఆహారం అందించకుండా పనిమనిషి కడుపు మాడ్చిందని కూడా పోలీసులు వెల్లడించారు.