సుహాస్ జర్నీ వైవిధ్యంగా సాగుతోంది. ఫ్యామిలీ డ్రామా, కలర్ ఫోటో, అంబాజీపేట.. ఇలా తన విలక్షణమైన చిత్రలతో ప్రేక్షకులకి దగ్గరౌయ్యాడు. ఇప్పుడు తన నుంచి ప్రసన్న వదనం సినిమా ప్రేక్షకుల ముందుకు వచ్చింది. సుకుమార్ వద్ద పని చేసిన అర్జున్ ఈ సినిమాతో దర్శకుడిగా పరిచయమయ్యారు.  ట్రైలర్ లో చూపించిన ఫేస్ బ్లైండ్ నెస్ కాన్సెప్ట్ సినిమాపై మంచి బజ్ క్రియేట్ చేసింది. మరి ఈ కాన్సెప్ట్ వర్క్ అవుట్ అయ్యిందా? కొత్త దర్శకుడు కొత్త కాన్సెప్ట్ ని ఎలా ప్రజెంట్ చేశాడు ? సుహాస్ ఖాతలో మరో హిట్ పడిందా? తెలుసుకోవాలంటే రివ్యూలోకి వెళ్ళాల్సిందే.  

ఓ యాక్సిడెంట్ లో తల్లితండ్రులని కోల్పోతాడు సూర్య(సుహాస్). బోనస్ గా తనకో వింత డిజార్డర్ కూడా వస్తుంది. యాక్సిడెంట్ బలంగా తలకి గాయం అవ్వడంతో ఫేస్ బ్లైండ్ నెస్ డిజార్డర్ వస్తుంది. అంటే .. తను మొహాలని గుర్తుంచలేడు. ఓ ఎఫ్ఎం స్టేషన్ లో ఆర్జే గా పని చేస్తున్న సూర్య ఓ అర్ధరాత్రి దారుణమైన ఘటన చూస్తాడు. అమృత( సాయి శ్వేత)అనే అమ్మాయిని ఎవరో లారీ కింద తోసేస్తారు. ఈ ఘటనని ప్రత్యక్షంగా చూస్తాడు సూర్య. అయితే  తనకి ఫేస్ బ్లైండ్ నెస్ వుండటం కారణంగా ఆ తోసిన వ్యక్తి ఎవరని గుర్తుపట్టలేడు. మరుసటి రోజు అది ఓ యాక్సిడెంట్ ని  వార్తల్లో వస్తుంది. దీంతో బాదితురాలికి న్యాయం జరగాలని భావించిన సూర్య.. పోలీస్ స్టేషన్ కి ఫోన్ చేసి జరిగిన అసలు సంగతి చెబుతాడు. ఈ కేసుని ఎసిపీ వైదేహి( రాశి సింగ్) ఎస్ఐ( నితిన్ ప్రసన్న) చాలా సీరియస్ గా తీసుకుంటారు. మరి వారి  విచారణలో ఎలాంటి నిజాలు రాబట్టారు? ఫేస్ బ్లైండ్ నెస్ కారణంగా సూర్య ఎలాంటి కష్టాలు ఎదుర్కున్నాడు ? అసలు అమృతని చంపాల్సిన అవసరం ఎవరికి వుంది ?  ఇవన్నీ తెరపై చూడాలి.
 
ఫేస్ బ్లైండ్ నెస్ కాన్సెప్ట్ తో తెలుగులో ఇప్పటివరకూ సినిమా రాలేదు. ఇలాంటి కొత్త పాయింట్ ని తీసుకున్న దర్శకుడు అర్జున్ ఆ పాయింట్ అంతే కొత్తగా తెరపై చూపించి థ్రిల్ చేశాడు. సూర్య తల్లితండ్రులు యాక్సిడెంట్ లో చనిపోవడం, సూర్యకి ఫేస్ బ్లైండ్ నెస్ రావడం, దాంతో అతను పడే ఇక్కట్లు, అధ్య( పాయల్ రాధకృష్ణ) రూపంలో ఓ క్యూట్ లవ్ స్టొరీ.. ఇవన్నీ ఆసక్తికరంగా ముందుకు సాగుతాయి. కథలో క్రైమ్ ఎలిమెంట్ వచ్చిన  తరవాత కథనం మరింత వేగంగా ముందుకు సాగుతుంది.

ఇంటర్వెల్ లో వచ్చే ట్విస్ట్ బావుంటుంది. నిజమైన థ్రిల్ ఎక్స్ పీరియన్స్ ఇస్తుంది. సెకండ్ హాఫ్ ని మరింత గ్రిప్పింగ్ గా నడిపాడు దర్శకుడు. ఫ్లాష్ బ్యాక్ లో వచ్చే ఎపిసోడ్ చాలా ఆసక్తికరంగా ఉంటుంది. ఆ ట్విస్ట్ ని బలంగా రాసుకున్నాడు దర్శకుడు. క్లైమాక్స్ ఈ సినిమాకి మరో ఆకర్షణ. అప్పటివరకూ కొంత నిదానంగా అనిపించినప్పటికీ ఈ కథకు ఇచ్చిన ముగింపు బావుంది.

సూర్య పాత్రలో సహజంగా ఒదిగిపోయాడు సుహాస్. ఎమోషనల్ సీన్స్ లో తన నటన  కట్టిపడేస్తుంది. యాక్షన్ ని చాలా రియల్ గా డిజైన్ చేశారు. పాయల్ లవ్ ట్రాక్ బావుంది. ఆ పాత్రని క్లైమాక్స్ లో వాడుకున్న తీరు ఇంకా బావుంది. రాశి సింగ్ పాత్ర గురించి ఎక్కువ చెప్పకూడదు. అది థియేటర్స్ లోనే చూడాలి. నితిన్ మరోసారి సహజత్వంతో ఆకట్టుకున్నాడు. హర్ష కొన్ని సీన్స్ లో నవ్విస్తాడు. రెండు సీన్స్ లో కనిపించిన సత్య కూడా తనవంతుగా నవ్వులు పూయిస్తాడు. నందుతో పాటు మిగతా నటీనటులు  పరిధిమేరకు వున్నారు.

విజయ్ బుల్గానిన్ నేపధ్య సంగీతం కథని ఎలివేట్ చేసింది. కెమరాపనితనం  నీట్ గా వుంది. ప్రొడక్షన్ డిజైన్ లావిష్ గా వుంది. నిర్మాతలు కథకు కావాల్సిన బడ్జెట్ సమకూర్చారు. తొలి సినిమాతోనే మంచి మార్కులు కొట్టాడు దర్శకుడు అర్జున్.
ప్లస్ పాయింట్స్
-సుహాస్, కాన్సెప్ట్,
స్క్రీన్ ప్లే, ట్విస్ట్ లు
మైనస్ పాయింట్స్
-అక్కడక్కడా నెమ్మది