ഹേമ കമ്മിറ്റി റിപ്പോർട്ട്; വേട്ടക്കാരൻ്റെ പേരുകൾ ഒഴിവാക്കാൻ ആരും പറഞ്ഞിട്ടില്ല; നടൻ ജഗദീഷ്!
ഹേമ കമ്മിറ്റി റിപ്പോർട്ട്; വേട്ടക്കാരൻ്റെ പേരുകൾ ഒഴിവാക്കാൻ ആരും പറഞ്ഞിട്ടില്ല; നടൻ ജഗദീഷ്! റിപ്പോർട്ടിലെ നിർദേശങ്ങൾ സ്വാഗതം ചെയ്യുന്നതായും കമ്മിറ്റിയുടെ കണ്ടെത്തലുകളിൽ സമഗ്രമായ അന്വേഷണം നടത്തണമെന്നും താരസംഘടനയായ അമ്മയുടെ വൈസ് പ്രസിഡൻ്റ് കൂടിയായ ജഗദീഷ് മാധ്യമങ്ങളോട് പറഞ്ഞു. ഇക്കാര്യത്തിൽ ഏതുരീതിയിലാണ് അന്വേഷണം വേണ്ടതെന്ന് ഹൈക്കോടതി തീരുമാനിക്കും. ഹൈക്കോടതി അനുവദിക്കുമെങ്കിൽ കുറ്റക്കാരുടെ പേര് പുറത്തുവരട്ടെയെന്നും അതിലൂടെ ഗോസിപ്പിനുള്ള അവസരമാണ് കുറയുകയെന്നും ജഗദീഷ് പറഞ്ഞു. ഹേമ കമ്മിറ്റി റിപ്പോർട്ടിൽ പ്രതികരണവുമായി നടൻ ജഗദീഷ്. ഹേമ കമ്മിറ്റി റിപ്പോർട്ടിലെ കണ്ടെത്തലുകൾ നിഷേധിക്കുന്നില്ല. നടിമാരുടെ വാതിലിൽ മുട്ടിയെന്ന് കമ്മിറ്റി പറയുമ്പോൾ എവിടെ വാതിലിൽ മുട്ടിയെന്ന് ചോദിക്കേണ്ടതില്ല. വാതിലിൽ മുട്ടിയെന്ന് ഒരു നടി പറഞ്ഞിട്ടുണ്ടെങ്കിൽ അതിനെക്കുറിച്ച് അന്വേഷിക്കണം.
ആ കുട്ടിയുടെ പരാതി പരിഹരിക്കണം. ഒറ്റപ്പെട്ട സംഭവമാണെന്ന് പറഞ്ഞ് ഒഴിഞ്ഞുമാറുന്നത് ശരിയല്ല എന്നാണ് തൻ്റെ പക്ഷം. അമ്മയുടെ പക്ഷവും അതുതന്നെയാണ്. ഒറ്റപ്പെട്ട സംഭവങ്ങൾ പോലും അന്വേഷണത്തിൻ്റെ പരിധിയിൽ കൊണ്ടുവന്ന് കുറ്റക്കാരെ മാതൃകാപരമായി ശിക്ഷിക്കണമെന്നും ജഗദീഷ് ആവശ്യപ്പെട്ടു. ഹേമ കമ്മിറ്റിയുടെ കണ്ടെത്തലുകളിൽ ആരുടെയെങ്കിലും പേരെടുത്ത് പറഞ്ഞിട്ടുണ്ടെങ്കിലും ഇല്ലെങ്കിലും അതിനെക്കുറിച്ച് സമഗ്രമായ അന്വേഷണം നടത്തണം. അതിൽനിന്ന് അമ്മയ്ക്കോ പ്രൊഡ്യൂസേഴ്സ് അസോസിയേഷനോ ചേമ്പറിനോ ഒഴിഞ്ഞുമാറാൻ കഴിയില്ല. പക്ഷേ, മലയാള സിനിമ മേഖലയുടെ പൊതുസ്വഭാവം റിപ്പോർട്ടിൽ പരാമർശിച്ചിരിക്കുന്നതുപോലെയാണെന്ന് വ്യാഖ്യാനിക്കാൻ പാടില്ല. നടീനടന്മാർ വഴിവിട്ട പാതയിലൂടെ നടന്നാണ് വിജയം കൈവരിച്ചതെന്ന രീതിയിൽ കമ്മിറ്റി ഒരിടത്തും പറഞ്ഞിട്ടില്ല.
അത്തരത്തിലൊരു പരാമർശമുണ്ടെങ്കിൽ വേദനിപ്പിക്കുന്നതാണ്. പക്ഷേ, ഇവിടെ അങ്ങനെയില്ലെന്നും ജഗദീഷ് പറഞ്ഞു. ഹേമ കമ്മിറ്റി റിപ്പോർട്ടിലെ പേജുകൾ ഒഴിവാക്കിയതിൽ സർക്കാർ വിശദീകരണം നൽകേണ്ടിവരും. ഇരയുടെ പേര് ഒഴിവാക്കണമെന്നാണ് പൊതുനിയമം. പക്ഷേ വേട്ടക്കാരൻ്റെ പേരുകൾ ഒഴിവാക്കാൻ ആരും പറഞ്ഞിട്ടില്ല. കുറ്റക്കാർ ശിക്ഷിക്കപ്പെടണം. ഇത് സിനിമ വ്യവസായത്തിൻ്റെ മാത്രം പ്രശ്നമല്ല. പൊതുസമൂഹത്തിൻ്റെ പ്രശ്നമാണ്. സമൂഹത്തിൽ അവിഭാജ്യഘടകമാണ് സിനിമ. സമൂഹത്തിന് മാതൃകയാകേണ്ട ഈ മേഖലയിൽ പുഴുക്കുത്തുകൾ ഉണ്ടായിട്ടുണ്ടെങ്കിൽ അവരെ പുറത്തുകൊണ്ടുവരണം. അതിനുള്ള ഉത്തരവാദിത്തം അമ്മ ഏറ്റെടുക്കണമെന്നും ജഗദീഷ് ആവശ്യപ്പെട്ടു.
വർഷങ്ങൾക്ക് മുൻപ് നടന്ന സംഭവങ്ങൾ ഇനിയും ആവർത്തിക്കപ്പെടാതിരിക്കാൻ ഹേമ കമ്മിറ്റി റിപ്പോർട്ടിലെ നിർദേശങ്ങൾ സഹായകമാകട്ടെ എന്നാണ് അമ്മ ആഗ്രഹിക്കുന്നത്. അമ്മയിൽ പ്രവർത്തിക്കുമ്പോൾ മറ്റ് തൊഴിലിടങ്ങളിൽ സമാന രീതിയിൽ നടക്കുന്നില്ലേയെന്ന ചോദ്യം അപ്രസക്തമാണ്. അങ്ങനെ ചോദിക്കാൻ പാടില്ലെന്ന പക്ഷക്കാരനാണ് താൻ. മലയാള സിനിമ മേഖലയിൽ ഇങ്ങനെയൊക്കെ നടക്കുന്നുണ്ടെന്ന് പറയുമ്പോൾ അത് എല്ലായിടത്തും നടക്കുന്നില്ലേ എന്ന ചോദ്യം പരിഷ്കൃത സമൂഹത്തിന് ചേർന്നതല്ല. നമ്മുടെ സിനിമ വ്യവസായത്തിൽ ഇങ്ങനെയൊക്കെ നടക്കുന്നുണ്ടെന്ന് പറയുമ്പോൾ ഭാവിയിൽ ആവർത്തിക്കാതിരിക്കാൻ എന്തുചെയ്യാൻ കഴിയും എന്നാണ് ചിന്തിക്കേണ്ടതെന്നും ജഗദീഷ് ചൂണ്ടിക്കാട്ടി.