മോഹൻലാൽ 'ചാന്തുപൊട്ട്' ചെയ്യും, മമ്മൂട്ടി ചെയ്യുമോയെന്നു ഡൗട്ടാണ്; ജീജ സുരേന്ദ്രൻ!
മോഹൻലാൽ 'ചാന്തുപൊട്ട്' ചെയ്യും, മമ്മൂട്ടി ചെയ്യുമോയെന്നു ഡൗട്ടാണ്; ജീജ സുരേന്ദ്രൻ! സിനിമാ സീരിയൽ മേഖലയിൽ വ്യക്തമായ അഭിപ്രായങ്ങൾ നടത്തിയിട്ടുള്ള ഒരു വ്യക്തിയെന്ന നിലയിൽ നിരവധി വിവാദങ്ങളുടെ ഭാഗമായി ജീജ മാറിയിരുന്നു. അഭിപ്രായ പ്രകടനങ്ങളുടെ പേരിൽ ഒരുപാട് തവണ വാർത്തകളിൽ ഇടംപിടിക്കുകയും ചെയ്തിരുന്നു. ജീജയുടെ അഭിപ്രായ പ്രകടനങ്ങൾ കൂടുതലും സഹതാരങ്ങളെ കുറിച്ചായിരുന്നു. സീരിയൽ താരങ്ങളായ അമ്പിളി ദേവിയുടെയും ആദിത്യന്റെയും വിവാഹം കഴിഞ്ഞപ്പോൾ മുതൽ ജീജ അവരെ കുറിച്ച് നടത്തിയ അഭിപ്രായങ്ങൾ ഏറെ ശ്രദ്ധേയമായിരുന്നു. മഞ്ജു വാര്യർ, ദിലീപ്, കാവ്യ തുടങ്ങിയവരെക്കുറിച്ചും മുൻപ് ജീജ സംസാരിച്ചിട്ടുണ്ട്. ഇപ്പോഴിതാ ഒരു അഭിമുഖത്തിനിടയിൽ മോഹൻലാലിനെയും ദിലീപിനെയും താരതമ്യം ചെയ്ത് കൊണ്ട് താരം പറഞ്ഞ വാക്കുകളാണ് ശ്രദ്ധ നേടുന്നത്. മലയാളി പ്രേക്ഷകർക്ക് സുപരിചിതയായ നടിയാണ് ജീജ സുരേന്ദ്രൻ. നിരവധി ഹാസ്യവേഷങ്ങളിലൂടെയും ക്യാരക്ടർ റോളുകളിലൂടെയും സീരിയലുകളിലും സിനിമകളിലും ജീജ സാനിധ്യം അറിയിച്ചിട്ടുണ്ട്.
മോഹൻലാൽ ഒക്കെ പോയിക്കഴിഞ്ഞാൽ അതിന് പകരക്കാരൻ എന്ന രീതിയിൽ ചിന്തിക്കാൻ ഇപ്പോൾ ജീവിച്ചിരിക്കുന്ന ഒരാളെയും കഴിയില്ല. ഓരോരുത്തരും വേറെ ഓരോ ലെവൽ ആണ്. പക്ഷേ ഞാനൊരു കാര്യം പറയാം അഭിനയം എന്ന് പറയുന്നിടത്ത് മോഹൻലാലിനെയാണ് എനിക്കിഷ്ടം. അതൊരു വല്ലാത്ത കഴിവ് തന്നെയാണ്. അതൊരു അസാധ്യ കഴിവാണ്, ആ കഴിവൊന്നു ഇപ്പോൾ ആർക്കുമില്ല. ഇനി മകൻ വരുമോ അതൊന്നും എനിക്കറിയത്തില്ല. നമ്മുടെയൊക്കെ പ്രായം കഴിഞ്ഞ് നമ്മളൊക്കെ മരിച്ചു കഴിയുമ്പോൾ ചിലപ്പോ ആ കുട്ടികളൊക്കെ അങ്ങിനെയൊക്കെ വരുമായിരിക്കും. നിലവിൽ ആ കഴിവ് ആർക്കുമില്ല. ദിലീപ് ചെയ്യുന്ന വേഷം എന്ന് പറയുമ്പോൾ, ഇപ്പോൾ 'കുഞ്ഞിക്കൂനൻ' എന്ന സിനിമ ദിലീപ് ചെയ്തിട്ടില്ലായിരുന്നുവെങ്കിൽ മോഹൻലാൽ അത് ചെയ്യുമായിരുന്നു.
ദിലീപ് ചെയ്ത മിക്ക വേഷങ്ങളും മോഹൻലാലിനും അഭിനയിച്ച് ഫലിപ്പിക്കാൻ സാധിക്കുമെന്ന് ജീജ സുരേന്ദ്രൻ അഭിപ്രായപ്പെട്ടു. വലിയൊരു ഫാൻ ഫൈറ്റ് തന്നെയാണ് ജീജയുടെ വീഡിയോയുടെ താഴെ ആരാധകർ നടത്തിക്കൊണ്ടിരിക്കുന്നത്. ദിലീപിന്റെ നിരവധി സിനിമകൾ മറുഭാഷകളിലേക്ക് റീമേക്ക് ചെയ്തെങ്കിലും ചാന്തുപൊട്ട് ഇതുവരെ റീമേക്ക് ചെയ്തിട്ടില്ല എന്നും സ്ത്രൈണതയുള്ള ചാന്തുപൊട്ടിലെ ദിലീപിന്റെ കഥാപാത്രം ചെയ്യാൻ മറ്റ് ഭാഷകളിൽ ഒരു നടനും തയ്യാറായില്ല എന്നും ആരാധകർ പറയുന്നു. ചാന്തുപൊട്ട്, കുഞ്ഞിക്കൂനൻ, മായാമോഹിനി, സൗണ്ട് തോമ തുടങ്ങിയ സിനിമകളിൽ തീർത്തും വ്യത്യസ്തമായ വേഷങ്ങളാണ് ദിലീപ് ചെയ്തിട്ടുള്ളത് എന്നും ദിലീപ് ഫാൻസ്‌ അഭിപ്രായപ്പെടുന്നു.
'ചാന്തുപൊട്ടും' മോഹൻലാൽ ചെയ്യും. ചാന്തുപൊട്ട് പോലെയൊരു സിനിമ മമ്മൂട്ടി ചെയ്യുമോ എന്ന് ചോദിച്ചാൽ എനിക്ക് ഡൗട്ട് ആണെന്നേ ഞാൻ പറയൂ. മോഹൻലാലിന് എന്തും ചെയ്യാൻ പറ്റും. മോഹൻലാൽ ചെയ്ത ഏതേലും വേഷം ദിലീപിനെ കൊണ്ട് ചെയ്യാൻ പറ്റുമോ എന്ന് ചോദിച്ചാൽ ഇല്ലാ എന്ന് തന്നെ ഞാൻ പറയും" - ജീജ പറഞ്ഞു. ജീജയുടെ വീഡിയോയ്ക്ക് താഴെ നിരവധി ആരാധകരാണ് താരത്തെ പിന്തുണച്ചും വിമർശിച്ചും എത്തിയിരിക്കുന്നത്.