തകർപ്പൻ ഹിറ്റ് സമ്മാനിച്ച് ബോക്സോഫിസിൽ കുറുപ്പ് !
തകർപ്പൻ ഹിറ്റ് സമ്മാനിച്ച് ബോക്സോഫിസിൽ കുറുപ്പ് ! വലിയ സ്വീകരണമാണ് ചിത്രത്തിന് എല്ലായിടത്തും നിന്ന് ലഭിക്കുന്നത്. ഒരിടവേളയ്ക്ക് ശേഷം കേരളജനതയെ ഒട്ടാകെ തീയേറ്ററിലേക്ക് ആകർഷിക്കുകയാണ് ദുൽഖർ സൽമാൻ നായകനാകുന്ന കുറുപ്പ്. കുറുപ്പിൻ്റെ റിലീസ് പ്രഖ്യാപിച്ചതിന് തൊട്ടുപിന്നാലെ തീയേറ്ററുകളിൽ ബുക്കിംഗുകൾ ആരംഭിക്കുകയും ചൂടപ്പം പോലെ ടിക്കറ്റുകളെല്ലാം വിറ്റു പോകുകയും ചെയ്തത് വലിയ വാർത്താ പ്രാധാന്യം നേടിയിരുന്നു. ഓടിടിയിലേക്ക് പോകാനായി നിന്നിരുന്ന കുറുപ്പിനെ മമ്മൂട്ടിയുടെ നേരിട്ടുള്ള ഇടപെടൽ കൊണ്ടാണ് തീയേറ്ററുകളിലെത്തിച്ചത് എന്നും തീയേറ്ററുടമകൾ നേരത്തേ വ്യക്തമാക്കിയിരുന്നു.
ഇപ്പോഴിതാ സിനിമ ആദ്യ ദിനം നേടിയ കളക്ഷൻ തുക കേട്ട് അമ്പരക്കുകയാണ് സിനിമാപ്രേമികളെല്ലാം. 6 കോടി 30 ലക്ഷം ഗ്രോസ് തുകയാണ് ആദ്യ ദിനം തീയേറ്ററുകളിൽ നിന്ന് കുറുപ്പ് സ്വന്തമാക്കിയത്. 505 സ്ക്രീനിൽ 2600ലേറെ ഷോകളാണ് റിലീസ് ദിനത്തിലുണ്ടായിരുന്നത്. നവംബർ 12നായിരുന്നു റിലീസ്. റിലീസ് ദിനത്തിൽ തന്നെ വൈകിട്ടായപ്പോഴേക്കും പ്രദർശനം 550 സ്ക്രീനുകളിലേക്ക് ഉയർന്നു. അതും കൂടാതെ അതിൽ വളരെ കുറച്ച് ഷോകൾ ഒഴികെ ബാക്കിയെല്ലാം തന്നെ ഹൗസ്ഫുള്ളുമായിരുന്നു. കൂടാതെ എക്സ്ട്രാ ഷോകളും ആഡ് ചെയ്തു. രണ്ടാം ദിനമായ ഇന്നും വമ്പൻ തിരക്കാണ് അനുഭവപ്പെടുന്നത്.
ഒരു കാലഘട്ടം അടയാളപ്പെടുത്തുന്നതിൽ വിജയിച്ചു എന്നതിൽ ഒതുങ്ങുന്നതല്ല കുറുപ്പ് എന്ന ചിത്രത്തെ കുറിച്ചുള്ള വിവരണമെന്നും നന്നായി പഠനം നടത്തി തയ്യാറാക്കിയ ഒരു മികച്ച സിനിമയാണ് കുറുപ്പെന്നും സിനിമാസ്വാദകർ പറഞ്ഞിരുന്നു. തീയറ്റർ അനുഭവം സിനിമ പൂർണമായും അർഹിക്കുന്നുണ്ട് എന്നുമൊക്കെയാണ് പുറത്ത് വരുന്ന നിരൂപണങ്ങൾ. നിലവിൽ കേരളത്തിലെ ബോക്സ് ഓഫീസിലെ ഏറ്റവും കുടുതൽ ഇൻഡസ്ട്രി ഹിറ്റുകൾ ഉള്ള താരം, ഏറ്റവും ഉയർന്ന ഓപ്പണിംഗ് കളക്ഷൻ, ആദ്യ 50 കോടി ചിത്രം, ആദ്യ നൂറ് കോടി ചിത്രം, ആദ്യ 200 കോടി ചിത്രം, എന്നിങ്ങനെയുള്ള ഭൂരിപക്ഷം റെക്കോർഡുകളും മോഹൻലാലിന്റെ പേരിലാണുള്ളത്.
കുറുപ്പിൻ്റെ വരവോടെ ഈ റെക്കോർഡുകൾ തിരുത്തിക്കുറിക്കപ്പെടുമോ എന്നാണ് സിനിമാസ്വാദകർ ഉറ്റുനോക്കുന്നത്. ആദ്യദിനം തന്നെ കളക്ഷൻ റെക്കോർഡുകൾ തകർത്തെറിഞ്ഞ കുറുപ്പ് ലൂസിഫറിനെയും മറ്റ് പല ചിത്രങ്ങളെയും കളക്ഷൻ റെക്കോർഡിൽ പിന്നിലാക്കിയിരിക്കുകയാണെന്ന് അണിയറപ്രവർത്തകരും ചൂണ്ടിക്കാട്ടിയിട്ടുണ്ട്.