కల్తీ బెల్లాన్ని కనిపెట్టాలని అనుకుంటున్నారా.. ఈ విషయాలు తెలుసుకోండి!
మన వంటింట్లో విరివిగా వాడే పదార్థాల్లో బెల్లం ఒకటి. చక్కెర కంటే బెల్లం ఆరోగ్యానికి ఎంతో మేలని చాలామంది దీనికి ప్రాధాన్యత ఇస్తుంటారు. అయితే, మార్కెట్లో లభించే బెల్లం అంతా స్వచ్ఛమైనది అనుకుంటే పొరపాటే. ప్రస్తుతం అధిక లాభాల కోసం వ్యాపారులు బెల్లంలో రంగులు, రసాయనాలు కలిపి కల్తీ చేస్తున్నారు. మరి మనం కొనే బెల్లం స్వచ్ఛమైనదా కాదా అనేది కొన్ని చిన్న చిట్కాలతో సులభంగా తెలుసుకోవచ్చు.
ముందుగా బెల్లం రంగును గమనించాలి. మార్కెట్లో చూడగానే ఆకర్షణీయంగా కనిపించే తెల్లటి లేదా లేత పసుపు రంగు బెల్లాన్ని చూసి మోసపోకండి. నిజానికి రసాయనాలు కలిపినప్పుడు మాత్రమే బెల్లం ఆ రంగులోకి మారుతుంది. స్వచ్ఛమైన బెల్లం ఎప్పుడూ ముదురు గోధుమ రంగులో లేదా కాస్త నలుపు రంగులో ఉంటుంది. బెల్లం ఎంత నల్లగా ఉంటే అది అంత స్వచ్ఛమైనదని గుర్తుంచుకోవాలి. అలాగే బెల్లం రుచి చూసినప్పుడు అది కేవలం తీపిగా మాత్రమే ఉండాలి. ఒకవేళ అది కాస్త ఉప్పగా లేదా చేదుగా అనిపిస్తే అందులో సోడా వంటి రసాయనాలు కలిశాయని అర్థం.
మరో ముఖ్యమైన పరీక్ష నీటితో చేయడం. ఒక గ్లాసు నీటిలో చిన్న బెల్లం ముక్కను వేయండి. అది కల్తీ లేనిదైతే నీటి అడుగున పూర్తిగా కరిగిపోతుంది. ఒకవేళ ఆ ముక్క అడుగున రంగు పేరుకుపోయినా లేదా ఇతర పదార్థాలు తేలినా అది కల్తీ బెల్లమే. సాధారణంగా బెల్లం తయారీలో కాల్షియం కార్బోనేట్ లేదా సోడియం బైకార్బోనేట్ వాడుతుంటారు. దీనివల్ల బెల్లం బరువు పెరుగుతుంది. బెల్లం కొనేటప్పుడు దాన్ని గట్టిగా నొక్కి చూడండి. అది మరీ గట్టిగా ఉంటే అందులో పిండి లేదా ఇతర పదార్థాలు కలిసే అవకాశం ఉంది. స్వచ్ఛమైన బెల్లం సాధారణంగా కొద్దిగా మెత్తగా ఉండి, విరిచినప్పుడు లోపల చిన్న చిన్న స్పటికాలు కనిపిస్తాయి. ఈ జాగ్రత్తలు పాటిస్తే ఆరోగ్యకరమైన, స్వచ్ఛమైన బెల్లాన్ని ఎంచుకోవడం సులభమవుతుంది.