800 ఏళ్ల రాజసం అరుదైన చీరలో కంగనా రనౌత్ రాయల్ లుక్!
సెలబ్రిటీలు అంటే కేవలం గ్లామర్ మాత్రమే కాదు, మన సంస్కృతికి వారధులు కూడా అని నటి, ఎంపీ కంగనా రనౌత్ మరోసారి నిరూపించారు. ఆమె ధరించిన ఒక అరుదైన చీర ఇప్పుడు దేశవ్యాప్తంగా చర్చనీయాంశంగా మారింది. అది కేవలం వస్త్రం కాదు.. ఏకంగా ఎనిమిది వందల ఏళ్ల నాటి చరిత్ర కలిగిన రాజవంశీయుల ఆభరణం. ఒకప్పుడు తంజావూరు రాణుల కోసం మాత్రమే ప్రత్యేకంగా నేసే ‘కొడాలి కరుప్పూర్’ చీరను ఆమె ధరించడంతో, మన ప్రాచీన నేత కార్మికుల అద్భుత నైపుణ్యం ప్రపంచానికి మరోసారి తెలిసింది.
రాజవంశీయుల ప్రత్యేక పోషణలో..
కొడాలి కరుప్పూర్ చీరల చరిత్ర చాలా లోతైనది. 1787 నుండి 1832 మధ్య తంజావూరును పాలించిన మరాఠా పాలకుడు సర్ఫోజీ రాజా భోంస్లే చత్రపతి-II హయాంలో ఈ వస్త్ర కళ అత్యున్నత స్థాయికి చేరుకుంది. 19వ శతాబ్దం వరకు ఇవి కేవలం రాజకుటుంబీకుల కోసం మాత్రమే కుంభకోణం సమీపంలోని కొడాలి కరుప్పూర్ గ్రామంలో తయారయ్యేవి. వీటిని కేవలం వస్త్రాలుగా కాకుండా గౌరవ సూచికంగా ‘ఖిల్లాత్’ అని పిలిచేవారు. అప్పట్లో ఇవి దౌత్యపరమైన బహుమతులుగా కూడా ఉండేవంటే వీటి విలువేంటో అర్థం చేసుకోవచ్చు.
త్రీ-ఇన్-వన్ మ్యాజిక్: జందానీ, కలంకారి, వ్యాక్స్ డైయింగ్!
ఈ చీరను ప్రపంచంలోనే ప్రత్యేకంగా నిలిపేది దాని సంక్లిష్టమైన తయారీ విధానం. సాధారణంగా ఒక చీరలో నేత లేదా చిత్రలేఖనం మాత్రమే ఉంటుంది. కానీ కొడాలి కరుప్పూర్ చీరలో మూడు అద్భుత పద్ధతులు మిళితమై ఉంటాయి:
జందానీ నేత: మొదట బంగారం లేదా వెండి జరీతో సున్నితమైన నేతను పూర్తి చేస్తారు.
వ్యాక్స్ రెసిస్ట్ డైయింగ్: మైనపు నిరోధక రంగు అద్దకం ద్వారా రంగులు అద్దుతారు.
కలంకారి: చేతితో అద్భుతమైన చిత్రలేఖనం చేసి కళాత్మక నమూనాలను సృష్టిస్తారు.
వాస్తవానికి వీటిని స్వచ్ఛమైన పత్తితో రెండు వైపులా ఒకేలా కనిపించే ‘దొరుఖా’ శైలిలో నేసేవారు. కాంచీపురం పట్టుకు, చిత్రలేఖనంతో కూడిన కలంకారికి ఇది పూర్తి భిన్నమైన మరియు అత్యంత కష్టతరమైన ప్రక్రియ.
అంతరించిపోతున్న కళకు ఊపిరి!
ప్రస్తుతం అసలైన కొడాలి కరుప్పూర్ చీరలు కేవలం మ్యూజియాల్లో మాత్రమే దర్శనమిస్తున్నాయి. సంక్లిష్టమైన డైయింగ్ పద్ధతి కారణంగా ఈ కళను తెలిసిన హస్తకళాకారులు ఇప్పుడు చాలా తక్కువ మంది ఉన్నారు. కంగనా రనౌత్ ధరించిన చీరను కళాక్షేత్ర ఫౌండేషన్ వంటి సంస్థలు ఈ కళను పరిరక్షించడానికి చేస్తున్న ప్రయత్నాల్లో భాగంగా రూపొందించారు. సెలబ్రిటీలు ఇటువంటి అరుదైన చేనేత వస్త్రాలను ధరించడం వల్ల రానున్న తరాలు మన నేత కార్మికుల వైభవం గురించి తెలుసుకునే అవకాశం దక్కుతోంది.
వారసత్వానికి పట్టాభిషేకం!
చరిత్రను గుర్తు చేసే వస్త్రాలు మన వారసత్వానికి ప్రాణం పోస్తాయి. ప్రాచీన కళలు కనుమరుగవ్వకుండా ఉండాలంటే వాటి వెనుక ఉన్న కష్టాన్ని, చరిత్రను మనం గౌరవించాలి. కంగనా ధరించిన ఈ కొడాలి కరుప్పూర్ చీర మన దేశపు అద్భుతమైన నేత కళకు ఒక ఘనమైన నివాళి.