తెలంగాణ రాజకీయ క్షేత్రంలో భారత్ రాష్ట్ర సమితి (బిఆర్ఎస్) అనుసరిస్తున్న సరికొత్త వ్యూహాలు ఇప్పుడు సర్వత్రా చర్చనీయాంశంగా మారాయి. ముఖ్యంగా ‘లీక్ రాజకీయాలు’ చేయడంలో ఈ పార్టీని మించిన వారు లేరని రాజకీయ విశ్లేషకులు అభిప్రాయపడుతున్నారు. ఒక సమాచారాన్ని అధికారికంగా ప్రకటించకుండా, ముందే లీకుల రూపంలో బయటకు వదలడం ద్వారా ప్రజల స్పందన తెలుసుకోవడం ఈ పార్టీకి వెన్నతో పెట్టిన విద్య. గత పదేళ్ల పాలనలో కూడా కేసీఆర్ నేతృత్వంలోని బృందం ఇలాంటి ఎన్నో ఎత్తుగడలతో ప్రత్యర్థులను ఆత్మరక్షణలో పడేసింది. ప్రస్తుతం అధికారంలో లేకపోయినా, కీలకమైన అంశాలపై లీకులు ఇస్తూ ప్రభుత్వ వ్యతిరేకతను మూటగట్టడంలో బీఆర్ఎస్ నేతలు సిద్ధహస్తులుగా కనిపిస్తున్నారు. ఈ రకమైన వ్యూహం వల్ల పార్టీ క్యాడర్ ఎప్పుడూ అలర్ట్‌గా ఉండటమే కాకుండా, మీడియాలో నిరంతరం ఆ పార్టీ పేరే వినిపించేలా జాగ్రత్త పడుతున్నారు.


ముఖ్యంగా పార్టీ అంతర్గత నిర్ణయాలు, అభ్యర్థుల ఎంపిక, భవిష్యత్తు కార్యాచరణ వంటి విషయాల్లో ఈ లీకుల ప్రభావం ఎక్కువగా కనిపిస్తోంది. బిఆర్ఎస్ తన సోషల్ మీడియా విభాగాన్ని, అనుకూల మీడియా వర్గాలను వాడుకుని వ్యూహాత్మక సమాచారాన్ని ప్రజల్లోకి పంపిస్తోంది. ఒక కొత్త పథకం గురించి కానీ, ప్రభుత్వ నిర్ణయంపై చేయబోయే పోరాటం గురించి కానీ ముందే లీక్ ఇవ్వడం ద్వారా ప్రజల్లో ఒక రకమైన చర్చను మొదలుపెడుతున్నారు. దీనివల్ల ప్రత్యర్థి పార్టీలు ఆ సమాచారంపై స్పందించే లోపే, బిఆర్ఎస్ తన తదుపరి అడుగు వేస్తోంది. ఈ ‘ లీక్ పాలిటిక్స్ ’ వల్ల కేవలం రాజకీయ ప్రయోజనాలే కాకుండా, ప్రజల నాడిని పట్టుకోవడంలో కూడా ఆ పార్టీ సక్సెస్ అవుతోంది. గతంలో రుణమాఫీ, రైతుబంధు వంటి పథకాల విషయంలో కూడా ఇదే తరహా వ్యూహాన్ని అమలు చేసి సత్ఫలితాలను సాధించింద‌నే చెప్పాలి.


ప్రస్తుత కాంగ్రెస్ ప్రభుత్వ హయాంలో కూడా బీఆర్ఎస్ తన లీకుల అస్త్రాన్ని వదలడం లేదు. ప్రభుత్వంలో జరుగుతున్న చిన్న చిన్న పరిణామాలను కూడా లీకుల రూపంలో బయటపెడుతూ అధికార పక్షాన్ని ఇరుకున పెడుతోంది. కొన్నిసార్లు తమ పార్టీ నేతలు పార్టీ మారుతున్నారనే ప్రచారం కూడా వారే స్వయంగా లీక్ చేసి, చివరకు అది అబద్ధమని నిరూపించడం ద్వారా నమ్మకాన్ని పెంచుకునే ప్రయత్నం చేస్తున్నారు. ఈ లీకుల వెనుక ఒక పక్కా ప్లానింగ్ ఉంటుందని, ఏ సమయంలో ఏ వార్తను బయటకు వదలాలో పార్టీ అధిష్టానం నిర్ణయిస్తుందని తెలుస్తోంది. దీనివల్ల అధికార పార్టీ డిఫెన్స్‌లో పడటమే కాకుండా, ప్రజల దృష్టిని మళ్ళించడంలో కూడా బిఆర్ఎస్ విజయం సాధిస్తోంది. రాజకీయాల్లో సమాచారమే శక్తి అని నమ్మే ఈ పార్టీ, ఆ సమాచారాన్ని లీకుల రూపంలో ఎంతో సమర్థవంతంగా వాడుకుంటోంది.


ఈ లీక్ రాజకీయాల్లో బిఆర్ఎస్ ఒక అగ్రగామిగా నిలిచింది. పాత తరం రాజకీయాలకు భిన్నంగా ఆధునిక సాంకేతికతను, మీడియాను వాడుకుంటూ తమ ఉనికిని చాటుకుంటోంది. ఈ వ్యూహం వల్ల కొన్నిసార్లు విమర్శలు ఎదురైనా, పార్టీ ప్రయోజనాల దృష్ట్యా ఇది ఎంతో మేలు చేస్తుందని నేతలు భావిస్తున్నారు. భవిష్యత్తులో కూడా ఇలాంటి వ్యూహాలతోనే ముందుకు సాగి, కోల్పోయిన వైభవాన్ని తిరిగి పొందాలని బిఆర్ఎస్ పట్టుదలతో ఉంది. ప్రత్యర్థి పార్టీలు ఈ లీకుల వెనుక ఉన్న మర్మాన్ని గ్రహించే లోపే మరో కొత్త లీక్ తో సిద్ధంగా ఉండటం వీరి ప్రత్యేకత. తెలంగాణ రాజకీయాల్లో ఈ ‘మాస్టర్ ఇన్ లీక్ పాలిటిక్స్’ అధ్యాయం ఇంకా ఎన్ని మలుపులు తిరుగుతుందో చూడాలి. కేవలం లీకులతోనే కాకుండా క్షేత్రస్థాయి పోరాటాలతో కూడా ముందుకు వెళ్తేనే పార్టీకి పూర్వవైభవం దక్కుతుందని విశ్లేషకులు సూచిస్తున్నారు.