జగన్ పర్యటనలో నిబంధనల ఉల్లంఘన.. వైసీపీ నేతలపై కేసులు!
కృష్ణా జిల్లా రాజకీయంగా మళ్లీ హీటెక్కింది. మాజీ ముఖ్యమంత్రి వైఎస్ జగన్మోహన్రెడ్డి ఇటీవల చేసిన పర్యటన వివాదాస్పదంగా మారింది. పోలీసు నిబంధనలు ఉల్లంఘించారనే ఆరోపణలతో వైసీపీ నేతలు, కార్యకర్తలపై కేసులు నమోదవడం జిల్లాలో చర్చనీయాంశంగా మారింది. ముఖ్యంగా మాజీ ఎమ్మెల్యే కైలే అనిల్కుమార్ పై చర్యలకు రంగం సిద్ధమవుతున్నట్లు సమాచారం. మంగళవారం పెనమలూరు, పామర్రు, పెడన నియోజకవర్గాల్లో తుఫాన్ ప్రభావిత ప్రాంతాలను సందర్శించిన జగన్ పర్యటనలో తీవ్ర గందరగోళం నెలకొంది. పర్యటనకు పోలీసు శాఖ పది కార్లు, 500 మందికి మాత్రమే అనుమతి ఇచ్చినా, వాస్తవానికి వేలాదిగా వైసీపీ శ్రేణులు తరలివచ్చి రోడ్డుపై బీభత్సం సృష్టించారు. ఎక్కడికక్కడ రోడ్ షోలు, నినాదాలు, బహిరంగ వేదికలపై గుంపులు పోలీసులు కట్టడి చేయలేని పరిస్థితి సృష్టించాయి.
పోలీసుల హెచ్చరికలను పట్టించుకోకుండా, జగన్ కాన్వాయ్లో దాదాపు 70 నుండి 80 కార్లు చేరడంతో ట్రాఫిక్ పూర్తిగా స్తంభించింది. గండిగుంట గ్రామంలో వాహనాలు ఢీకొని పలువురు గాయపడిన ఘటన కూడా చోటుచేసుకుంది. దీంతో పోలీసు విధినిర్వహణకు ఆటంకం కలిగించడం, ట్రాఫిక్ నిబంధనలు ఉల్లంఘించడం వంటి ఆరోపణలతో కేసులు నమోదు చేశారు. జగన్ పర్యటన మొత్తం డ్రోన్ కెమెరాల ద్వారా రికార్డు చేసిన పోలీసులు, ఆ వీడియో ఆధారంగా నిబంధనలు ఉల్లంఘించిన వారిని గుర్తిస్తున్నారు. తాడేపల్లి నుంచి పామర్రు, గూడూరు, ఉయ్యూరు మీదుగా సాగిన ఈ పర్యటనలో విజయవాడ-బందరు జాతీయ రహదారిపై భారీ ట్రాఫిక్ జామ్ ఏర్పడింది. డ్రోన్ ఫుటేజీ ఆధారంగా తప్పిదం చేసిన వారిపై చర్యలు తప్పవని పోలీసులు స్పష్టం చేశారు.
అంతేకాదు, పామర్రు మాజీ ఎమ్మెల్యే కైలే అనిల్కుమార్పై ఇప్పటికే కేసు నమోదు చేశారు. గోపువానిపాలెం వద్ద ట్రాఫిక్ జామ్ నివారించాలంటూ సీఐ చిట్టిబాబు వారించగా, ఆయనతో వాగ్వాదానికి దిగిన ఘటనపై పోలీసులు ఫిర్యాదు నమోదు చేశారు. ఇక ఈ ఘటనపై ప్రభుత్వం, టీడీపీ నేతలు తీవ్రంగా స్పందించారు. వైసీపీ అధికారంలో ఉన్నప్పుడు రైతులకు నష్టం కలిగించి, ఇప్పుడు సానుభూతి నాటకం ఆడుతున్నారని మంత్రి లోకేశ్ తీవ్ర విమర్శలు గుప్పించారు. తుఫాన్ వెళ్లి వారం గడిచిన తర్వాత పర్యటనకు రావడం జగన్ నిర్లక్ష్యానికి నిదర్శనమని వ్యాఖ్యానించారు. “జగన్ ఒక వేళ ఎత్తి మాపై చూపుతున్నారు, కానీ ఆయన వైపు ఉన్న నాలుగు వేళ్లు మరచిపోయారు,” అంటూ లోకేశ్ వ్యంగ్యంగా ఎద్దేవా చేశారు. మొత్తం మీద, తుఫాన్ బాధితులను పరామర్శించడానికి చేసిన పర్యటన ఇప్పుడు రాజకీయ తుఫాన్గా మారింది. పోలీసు కేసులు, రాజకీయ ఆరోపణలతో జగన్ పర్యటన ప్రభావం ఇంకా కొనసాగుతూనే ఉంది.