മരാവതിയൊരുക്കാൻ സിംഗപ്പൂർ; വിദേശകാര്യ മന്ത്രിയുമായി നിർണായക കൂടിക്കാഴ്ച!
മരാവതിയൊരുക്കാൻ സിംഗപ്പൂർ; വിദേശകാര്യ മന്ത്രിയുമായി നിർണായക കൂടിക്കാഴ്ച! അമരാവതി പദ്ധതിയിൽ നിർണായക പങ്കുവഹിക്കാൻ സിംഗപ്പൂരിൻ്റെ പങ്കാളിത്തം ഉറപ്പാക്കാൻ നായിഡു വിദേശകാര്യ മന്ത്രി എസ് ജയശങ്കറുമായി കൂടിക്കാഴ്ച നടത്തി. കേന്ദ്ര ധനമന്ത്രി നിർമല സീതാരാമനുമായും ആന്ധ്രാ മുഖ്യമന്ത്രി കൂടിക്കാഴ്ച നടത്തി. മുഖ്യമന്ത്രി എൻ ചന്ദ്രബാബു നായിഡുവിൻ്റെ നേതൃത്വത്തിലുള്ള ആന്ധ്രാ പ്രദേശ് സർക്കാർ തലസ്ഥാന നഗരിയായ അമരാവതി പുനരുജ്ജീവിപ്പിക്കാനുള്ള പദ്ധതികളുമായി മുന്നോട്ട്. ചന്ദ്രബാബു നായിഡുവിൻ്റെ നേതൃത്വത്തിലുള്ള 2018ലെ സർക്കാർ അമരാവതി പദ്ധതികളിൽ സിംഗപ്പൂർ കൺസോർഷ്യത്തെ നിയോഗിച്ചിരുന്നു. എന്നാൽ ജഗൻ മോഹൻ റെഡ്ഡിയുടെ നേതൃത്വത്തിലുള്ള് വൈഎസ്ആർ കോൺഗ്രസ് പിന്നീട് അധികാരത്തിലെത്തിയതോടെ പദ്ധതി പാതിവഴിയിലായി. ചന്ദ്രബാബു നായിഡുവിൻ്റെ നേതൃത്വത്തിലുള്ള സർക്കാർ വീണ്ടും അധികാരത്തിൽ എത്തിയതോടെ അമരാവതി പുനരുജ്ജീവിപ്പിക്കാനുള്ള പദ്ധതികൾ സജീവമായി.
ഇതോടെയാണ് അമരാവതി പദ്ധതികളിൽ സിംഗപ്പൂർ കൺസോർഷ്യത്തെ വീണ്ടും നിയോഗിക്കാനുള്ള നീക്കം ആരംഭിച്ചത്. ഇതിൻ്റെ ഭാഗമായാണ് വിദേശകാര്യ മന്ത്രി എസ് ജയശങ്കറുമായും ധനമന്ത്രി നിർമല സീതാരാമനുമായും ചന്ദ്രബാബു നായിഡു വെള്ളിയാഴ്ച കൂടിക്കാഴ്ച നടത്തിയത്. 6.84 ചതുരശ്ര കിലോമീറ്റർ വിസ്തൃതിയുള്ള വികസന ഭൂവിസ്തൃതിയാണ് സ്റ്റാർട്ടപ്പ് ഏരിയയിൽ ഉൾപ്പെടുന്നത്. 20 വർഷം കൊണ്ട് മൂന്ന് ഘട്ടങ്ങളിലായി പദ്ധതി നടപ്പാക്കാനായിരുന്നു ലക്ഷ്യം. എന്നാൽ സിംഗപ്പൂർ കൺസോർഷ്യം പദ്ധതി ആരംഭിക്കുന്നതിന് മുൻപ് 2019 മെയ് മാസത്തിൽ സംസ്ഥാനത്ത് ഭരണമാറ്റം ഉണ്ടായതോടെ സിംഗപ്പൂർ കൺസോർഷ്യവുമായുള്ള ബന്ധം മുറിയുകയായിരുന്നു. 2019ൽ അധികാരത്തിലെത്തിയ വൈഎസ് ജഗൻ മോഹൻ റെഡ്ഡിയുടെ നേതൃത്വത്തിലുള്ള വൈഎസ്ആർസിപി സർക്കാർ അമരാവതി തലസ്ഥാന നഗരി പദ്ധതിയിൽ നിന്ന് സിംഗപ്പൂർ കൺസോർഷ്യത്തെ ഒഴിവാക്കുകയും കരാർ റദ്ദാക്കുകയും ചെയ്തു.
പരസ്പരം അംഗീകരിച്ച നിബന്ധനകളോടെ പദ്ധതിയിൽ നിന്ന് സിംഗപ്പൂർ കൺസോർഷ്യം സ്വമേധയാ പിന്മാറുകയും ചെയ്തു. ചന്ദ്രബാബു നായിഡു സർക്കാർ വീണ്ടും അധികാരത്തിൽ എത്തിയതോടെ സീഡ് ക്യാപിറ്റൽ ഏരിയ വികസന പദ്ധതി പുനരുജ്ജീവിപ്പിക്കാൻ സിംഗപ്പൂർ സർക്കാർ താൽപ്പര്യം പ്രകടിപ്പിച്ച് രംഗത്ത് എത്തുകയായിരുന്നു. എന്നാൽ ടെൻഡർ നടപടികളിലൂടെ മാത്രമേ വീണ്ടും സിംഗപ്പൂർ കൺസോർഷ്യത്തിന് പദ്ധതിയുടെ ഭാഗമാകാനാകൂ. അതിനുള്ള ടെണ്ടറുകൾ ഡിസംബറിൽ വിളിക്കും. ഈ സാഹചര്യത്തിലാണ് നായിഡു വിദേശകാര്യ മന്ത്രി ഉൾപ്പെടെയുള്ളവരുമായി കൂടിക്കാഴ്ച നടത്തിയത്.
2018ൽ ടിഡിപി സർക്കാരിന് കീഴിലുള്ള എപിസിആർഡിഎ അമരാവതി സ്റ്റാർട്ട് അപ് എന്ന പേരിൽ അമരാവതിയിലെ സീഡ് ക്യാപിറ്റൽ ഏരിയ വികസിപ്പിക്കുന്നതിന് അസെൻഡാസ് സിങ്ബ്രിഡ്ജ് പ്രൈവറ്റ് ലിമിറ്റഡും സെംബ്കോർപ്പ് ഡെവലപ്‌മെൻ്റ് ലിമിറ്റഡും ഉൾപ്പെടുന്ന സിംഗപ്പൂർ കൺസോർഷ്യവുമായി കരാർ ഒപ്പുവച്ചിരുന്നു. അമരാവതി പദ്ധതികളിൽ സിംഗപ്പൂരിൻ്റെ പങ്കാളിത്തം പുനരുജ്ജീവിപ്പിക്കുന്നതിന് ആവശ്യമായ സഹായം നൽകണമെന്ന് നായിഡു ജയശങ്കറിനോട് ആവശ്യപ്പെട്ടു. അമരാവതിയുടെ പ്രവൃത്തികളുടെ ടെൻഡറിൽ സിംഗപ്പൂരിന് പങ്കെടുക്കാൻ അനുമതി നൽകാൻ കേന്ദ്രം തത്വത്തിൽ സമ്മതിച്ചിട്ടുണ്ടെന്ന് നരസറോപേട്ടിൽ നിന്നുള്ള ടിഡിപി എംപി ലവു കൃഷ്ണദേവരായുലു പറഞ്ഞു. കഴിഞ്ഞ ഓഗസ്റ്റിൽ ആന്ധ്രാ പ്രദേശ് ഗവൺമെൻ്റിൻ്റെ ക്യാപിറ്റൽ റീജിയൻ ഡെവലപ്‌മെൻ്റ് അതോറിറ്റി സിംഗപ്പൂർ സർക്കാരുമായി പ്രാഥമിക ചർച്ചകൾക്ക് തുടക്കം കുറിച്ചിരുന്നു.