യോഗി ഗോരഖ്പുരിൻറെ ചുമതലകൾ ഏൽപ്പിച്ചിരിക്കുന്നത് മലയാളിയേയോ?
യോഗി ഗോരഖ്പുരിൻറെ ചുമതലകൾ ഏൽപ്പിച്ചിരിക്കുന്നത് മലയാളിയേയോ? ചലച്ചിത്ര താരവും ബിജെപി അംഗവുമായ കൃഷ്ണകുമാറാണ് ഇക്കാര്യം വ്യക്തമാക്കിയത്. തെരഞ്ഞെടുപ്പ് അടുത്ത സംസ്ഥാനത്ത് പ്രചാരണം നടത്തിയ വിശേഷങ്ങൾ പങ്കുവെച്ചുകൊണ്ടുള്ള ഫേസ്ബുക്ക് പോസ്റ്റിലാണ് കൃഷ്ണകുമാർ ഇക്കാര്യവും പറഞ്ഞത്. ചരിത്രം തിരുത്തിക്കുറിക്കുന്ന അതിഗംഭീര വിജയം നേടി യോഗി അധികാരത്തിൽ തിരിച്ചുവരുമെന്നും കൃഷ്ണകുമാർ പറയുന്നു. ഉത്തർപ്രദേശ് നിയമസഭ തെരഞ്ഞെടുപ്പിൽ മുഖ്യമന്ത്രി യോഗി ആദിത്യനാഥ് മത്സരിക്കുന്ന മണ്ഡലത്തിൻറെ ചുമതല മലയാളിക്ക്. മുഖ്യമന്ത്രി യോഗി ആദിത്യനാഥിൻറെ മണ്ഡലമായ ഗോരഖ്പുറാണ് താൻ ആദ്യം സന്ദർശിച്ചതെന്നും കൃഷ്ണകുമാർ വ്യക്തമാക്കി. 'ബിജെപി നാഷണൽ സെക്രട്ടറിയും ഉത്തർപ്രദേശ്, മദ്യപ്രദേശ്, വെസ്റ്റ് ബംഗാൾ സംസ്ഥാനങ്ങളിൽ പ്രവർത്തകരുടെ ഇടയിൽ വളരെ അധികം ആരാധകരുള്ള, മലയാളി കൂടിയായ അരവിന്ദ് മേനോനെയാണ് യോഗിജി ഗോരഖ്പുരിൻറെ ചുമതലകൾ ഏല്പിച്ചിരിക്കുന്നത്.- കൃഷ്ണകുമാർ പറയുന്നു.
കഴിഞ്ഞ മൂന്ന് ദിവസമായി ഉത്തർപ്രദേശിൻറെ വിവിധ ഭാഗങ്ങളിൽ തെരഞ്ഞെടുപ്പ് പ്രചാരണവുമായി ബന്ധപ്പെട്ട് സഞ്ചരിക്കുകയായിരുന്നെന്ന് പറഞ്ഞുകൊണ്ടാണ് കൃഷ്ണകുമാറിൻറെ ഫേസ്ബുക്ക് പോസ്റ്റ് ആരംഭിക്കുന്നത്. സന്ത്കബീർ നഗർ, ബനിഗഞ്ച്, ഖലീലബാദ്, ഗൻഗട്ടാ തുടങ്ങിയ മണ്ഡലങ്ങളിൽ സ്ഥാനാർഥികൾക്കു വേണ്ടി പ്രചാരണയോഗങ്ങളിലും, യോഗിയും അമിത് ഷായും പങ്കെടുത്ത റാലിയിലും, നാമനിർദേശപത്രിക സമർപ്പണ ചടങ്ങിലും താൻ പങ്കെടുത്തെന്നും കൃഷ്ണകുമാർ പറയുന്നു. അരവിന്ദ് മോനോനൊപ്പമായിരുന്നു താൻ എല്ലാ മണ്ഡലങ്ങളിലേക്കും യാത്ര ചെയ്തതെന്നും കൃഷ്ണകുമാർ ഫേസ്ബുക്ക് പോസ്റ്റിലൂടെ പറഞ്ഞു. മോദി-യോഗി "ഡബിൾ എഞ്ചിൻ" സർക്കാർ ഉത്തർപ്രദേശിനെ ഇന്ന് അതിവേഗ വികസനത്തിൻറെ പാതയിലെത്തിച്ചിരിക്കുന്നു.
ദശകങ്ങളായി നടമാടുന്ന കോൺഗ്രസ്, എസ്പി, ബിഎസ്പി എന്ന മൂന്ന് പ്രൈവറ്റ് ലിമിറ്റഡ് കൊള്ളയടി കമ്പിനികളിൽ നിന്നും ഉത്തർപ്രദേശിനെ മോചിപ്പിച്ച് അവിടുത്തെ സഹോദരങ്ങളെ നന്മയുള്ള ജീവിതത്തിലേക്ക് ഉയർത്തികൊണ്ടുവരുന്ന യോഗിജിക്കു എത്ര നന്ദി പറഞ്ഞാലും മതിയാവില്ല' അദ്ദേഹം പറയുന്നു. ഉത്തർ പ്രദേശിൽ ബിജെപി തുടർഭരണം ഉറപ്പിച്ചു കഴിഞ്ഞു. എത്ര സീറ്റുകൾ എന്നകാര്യത്തിൽ മാത്രമേ രണ്ടഭിപ്രായമുള്ളൂവെന്നും കൃഷ്ണകുമാർ പറയുന്നു "പാവപ്പെട്ട ജനങ്ങൾക്ക് ഫ്രീ ഗ്യാസ് കണക്ഷൻ, വീടില്ലാത്ത ലക്ഷകണക്കിന് ജനങ്ങൾക്ക് വീടുകൾ, വൈദ്യുതി, വെള്ളം, ആരോഗ്യ ഇൻഷുറൻസ്, പരമാവധി ആളുകൾക്ക് സൗജന്യ കൊവിഡ് വാക്സിൻ, കർഷകർക്ക് പെൻഷൻ, വളം, അങ്ങനെ പോകുന്നു യോഗിയുടെ പ്രവർത്തികൾ.
ഏറ്റവും വലിയ ഫിലിം സിറ്റി, എയിംസ്, എല്ലാ ഗ്രാമങ്ങളും നഗരങ്ങളുമായി ബന്ധിപ്പിക്കുന്ന റെയിൽവേ ട്രാക്കുകൾ, എയർപോർട്ടുകൾ, എക്സ്പ്രെസ് ഹൈവേകൾ. വികസനത്തിൻറെ പര്യായമായി മാറുന്ന ഉത്തർപ്രദേശാണ് കഴിഞ്ഞ ദിവസങ്ങളിൽ കണ്ടത്. മാർച്ച് പത്തിന് ഇലക്ഷൻ റിസൾട്ട് വരും. വികസനത്തിൻറെ തുടർച്ചക്ക്, ചരിത്രം തിരുത്തിക്കുറിക്കുന്ന അതിഗംഭീര വിജയവും, യോഗിയുടെ നേതൃത്വത്തിൽ ഉത്തർപ്രദേശിലെ നല്ലവരായ സഹോദരങ്ങൾക്ക് സുന്ദരമായ ജീവിതവുമുണ്ടാവട്ടെ എന്ന് പ്രാർത്ഥിച്ചു കൊണ്ട് നിർത്തുന്നു" എന്ന് പറഞ്ഞാണ് കൃഷ്ണകുമാർ ഫേസ്ബുക്ക് പോസ്റ്റ് അവസാനിപ്പിക്കുന്നത്.