‘సప్తగిరి ఎల్.ఎల్.బి’కామెడీ బాగుంది..!
టాలీవుడ్ లో కామెడియన్ గా ఎంట్రీ ఇచ్చి తర్వాత హీరోలుగా మారిన వారు చాలా మంది ఉన్నారు. అలాంటి వారిలో రీసెంట్ గా సప్తగిరి ఒకరు. హీరో సునీల్ తర్వాత సప్తగిరి మంచి కమెడియన్ గా గుర్తింపు తెచ్చుకొని హీరోగా మారారు. అయితే సునీల్ మాత్రం కామెడీ పాత్రలు వేయడం లేదు..సప్తగిరి ఓ వైపు కమెడియన్ గా నటిస్తు..హీరోగా కూడా చేస్తున్నారు. ‘సప్తగిరి ఎక్స్‌ప్రెస్‌’ వంటి కామెడీ ఎంటర్టైనర్‌ను నిర్మించిన సాయి సెల్యులాయిడ్‌ సినిమాటిక్‌ క్రియేషన్స్‌ ప్రై లిమిటెడ్‌ అధినేత డా.రవికిరణ్‌ మళ్లీ సప్తగిరి హీరోగా 'సప్తగిరి ఎల్.ఎల్.బి' చిత్రాన్ని నిర్మిస్తున్న విషయం తెలిసిందే.
హిందీలో సూపర్‌డూపర్‌ హిట్‌ అయిన 'జాలీ ఎల్.ఎల్.బి' పార్ట్‌-1ని 'సప్తగిరి ఎల్‌ఎల్‌బి'గా తెలుగులో రీమేక్‌ చేస్తున్నారు. ఈ చిత్రానికి సంబంధించిన పాటల చిత్రీకరణ ఇటీవల స్విట్జర్లాండ్‌లో పూర్తి కాగా తాజాగా ఈ మూవీ టీజర్‌ను విడుదల చేసింది చిత్రయూనిట్.‘నీ పేరేమన్నావు’ అని అడిగితే ‘సప్తగిరి ఎల్.ఎల్.బి’ అంటూ సమాధానం ఇవ్వగా, ‘అప్పీల్‌ను యాపిల్‌ అని రాశావ్‌.. ప్రాసిక్యూషన్‌ని ప్రాస్టిట్యూషన్‌ అని రాశావ్‌’ అంటూ సీనియర్ నటుడు శివప్రసాద్ పేల్చే డైలాగ్‌లు అదిరిపోయాయి.
లాయర్‌గా సప్తగిరి ఏ రేంజ్ లో నవ్వించనున్నాడో కొత్తగా చెప్పాల్సిన అవసరం లేదు. సప్తగిరి సరసన కశిష్‌ వోరా హీరోయిన్‌గా నటిస్తున్న ఈ చిత్రానికి పరుచూరి బ్రదర్స్‌ డైలాగ్స్ అందిస్తున్నారు. చరణ్‌ లక్కాకుల దర్శకత్వం వహించిన ‘సప్తగిరి ఎల్.ఎల్.బి’ త్వరలో థియేటర్స్‌లో ప్రేక్షకులకు నవ్వుల విందు ఇచ్చేందుకు రెడీ అవుతోంది.