ఆదిపురుష్: క్షమాపణలు కోరిన మూవీ టీం?
చాలా దారుణమైన నెగటివ్ టాక్ వచ్చినా కూడా 'ఆదిపురుష్' మూవీకి బాక్సాఫీస్ దగ్గర మాత్రం అద్భుతమైన కలెక్షన్స్ వస్తున్నాయి.అలానే వసూళ్ల కంటే రోజురోజుకీ వివాదాలు కూడా ఎక్కువవుతున్నాయి. సినిమా స్టోరీ దగ్గర నుంచి పాత్రల గెటప్స్ దాకా చాలా ట్రోల్స్ వస్తున్నాయి. ఇవన్నీ కాదన్నట్లు 'ఆదిపురుష్' మూవీలోని ఓ డైలాగ్ వల్ల నేపాల్ ప్రభుత్వం.. భారతీయ సినిమాలపై పూర్తిగా నిషేధం విధించింది. ప్రస్తుతం ఇదే ఇండస్ట్రీలో పెద్ద హాట్ టాపిక్. దీంతో 'ఆదిపురుష్' మూవీ టీమ్.. నేపాల్ ప్రభుత్వానికి క్షమాపణలు చెబుతూ ఓ లెటర్ ని రిలీజ్ చేసింది.'ఆదిపురుష్' సినిమాని మన భారత దేశ గొప్ప చరిత్రగా భావించే రామాయణం ఆధారంగా తీశారు.ఈ మూవీలో రాముడిగా ప్రభాస్, సీతగా కృతిసనన్ నటించారు. ఈ సినిమా రిజల్ట్, వసూళ్ల గురించి పక్కనబెడితే ఇందులో సీత.. భారతదేశంలో పుట్టింది అనే అర్థం వచ్చేలా ఓ డైలాగ్ అనేది ఉంది. మూవీ రిలీజ్ రోజే దీనిపై నేపాల్ ప్రభుత్వం అభ్యంతరం వ్యక్తం చేసింది. దాన్ని తొలిగిస్తేనే సినిమాని ప్రదర్శిస్తామని పట్టుబట్టింది. అలానే రామాయణాన్ని వక్రీకరించేలా ఈ సినిమాని తీశారని.. అక్కడ ప్రభుత్వ నేతలు భారతీయ సినిమాలపై పూర్తిగా నిషేధం విధించారు.అయితే నేపాల్ ప్రభుత్వం తీసుకున్న నిర్ణయం మరింత ముదరకముందే 'ఆదిపురుష్' మూవీ టీమ్ రాజీకి వచ్చింది. క్షమాపణలు చెబుతూ ఓ లెటర్ ని కూడా రిలీజ్ చేసింది.
భారతీయ సినిమాలపై నిషేధాన్ని ఎత్తివేయాలని ఖాట్మండు మేయర్ ని టీం అభ్యర్థించింది. ఇందుకు సంబంధించిన ఓ లేఖ ఇప్పుడు సోషల్ మీడియాలో బాగా వైరల్ గా మారిపోయింది.'నేపాల్ ప్రజల మనోభావాలనేవి ఏ విధంగానైనా దెబ్బతీసుంటే మమ్మల్ని క్షమించాలి. మేం కావాలని ఎవరి సామరస్యాన్ని కూడా దెబ్బతీయాలనుకోలేదు. ఈ సినిమాని క్రియేటివ్ కోణంలోనే చూడాలని కోరుకుంటున్నాం. చరిత్రపై ఆసక్తిని పెంచి ఇంకా పెద్ద సంఖ్యలో ప్రేక్షకులని అలరించాలనే మా ఉద్దేశానికి మద్దతు ఇవ్వాలని మేం అభ్యర్థిస్తున్నాం' అని టీ-సిరీస్ లేఖలో తెలిపింది.ఈ లేఖపై నేపాల్ ప్రభుత్వం ఇంకా స్పందించాల్సి ఉంది. ఇదిలా ఉండగా ఎన్ని విమర్శలు వస్తున్నా కానీ బాక్సాఫీస్ దగ్గర 'ఆదిపురుష్' కలెక్షన్స్ ప్రభంజనం అయితే ఆగట్లేదు. నాలుగు రోజుల్లో ప్రపంచవ్యాప్తంగా ఈ సినిమా రూ.375 కోట్ల గ్రాస్ వసూలు చేసింది. మొదటి మూడురోజులు బాగానే వసూళ్లు వచ్చినప్పటికీ, నాలుగో రోజు చాలా దారుణంగా తగ్గిపోయాయి. ఈ వారం కూడా 'ఆదిపురుష్' మూవీ నిలబడితేనే లాభాల్లోకి వెళ్తుంది. లేదంటే బయ్యర్లు, డిస్ట్రిబ్యూటర్లకు కష్టాలు మాత్రం తప్పవు.