മോഹൻലാൽ - ലിജോ ജോസ് പെല്ലിശേരി സിനിമയുടെ പേര് "മലൈക്കോട്ടൈ വാലിബൻ"!
മോഹൻലാൽ - ലിജോ ജോസ് പെല്ലിശേരി സിനിമയുടെ പേര് "മലൈക്കോട്ടൈ വാലിബൻ"! മോഹൻലാലും ലിജോ ജോസ് പെല്ലിശേരിയും സോഷ്യൽ മീഡിയ പേജുകളിലൂടെയാണ് ടൈറ്റിൽ പോസ്റ്റർ അനൗൺസ് ചെയ്തത്. ചിത്രത്തിൻ്റെ പോസ്റ്ററിലേക്കുള്ള ആകാംഷ ജനിപ്പിച്ച് കഴിഞ്ഞ രണ്ടു ദിവസമായി സമൂഹ മാധ്യമങ്ങളിൽ ചർച്ച സജീവമായിരുന്നു. ചിത്രത്തിൻ്റെ അണിയറ പ്രവർത്തകരുടെ പേരുകളും പോസ്റ്ററിൽ കൊടുത്തിട്ടുണ്ട്. ചിത്രത്തിലെ മോഹൻലാലിൻ്റെ ലുക്ക് എങ്ങനെയാണെന്നുള്ള ആകാഷയാണ് ഇപ്പോൾ ആരാധകർക്കുള്ളത്.മോഹൻലാലിനെ നായകനാക്കി ലിജോ ജോസ് പെല്ലിശേരി ഒരുക്കുന്ന പുതിയ ചിത്രത്തിൻ്റെ പേരിനായുള്ള കാത്തിരിപ്പ് അവസാനിച്ചു. 'മലൈക്കോട്ടൈ വാലിബൻ' എന്നാണ് ചിത്രത്തിൻ്റെ പേര്.
ബോളിവുഡ് താരം രാധിക ആപ്തെയാണ് ചിത്രത്തിൽ മോഹൻലാലിനു നായികയായി എത്തുന്നത്. 2015 ൽ ഹരം എന്ന ചിത്രത്തിലൂടെയാണ് രാധിക ആപ്തെ ആദ്യമായി മലയാള സിനിമയിലെത്തുന്നത്. ഇടവേളയ്ക്കു ശേഷം രാധിക ആപ്തെ വീണ്ടും മലയാളത്തിലേക്ക് എത്തുന്ന ചിത്രത്തിൽ മോഹൻലാലിൻ്റെ കരിയറിൽ ഏറെ ശ്രദ്ധ നേടുന്ന കഥാപാത്രമായിരിക്കും ലിജോ ജോസ് പെല്ലിശേരി ഒരുക്കുന്നതെന്നാണ് പ്രഥമിക വിവരം. ചെമ്പോത്ത് സൈമൺ എന്ന കഥാപാത്രത്തെയാകും മോഹൻലാൽ അവതരിപ്പിക്കുകയെന്നും മിത്ത് പ്രമേയമാക്കി ഒരുങ്ങുന്ന പീരിയഡ് ഡ്രാമയാണ് ചിത്രമെന്നും മോഹൻലാൽ ഒരു ഗുസ്തിക്കാരനായാണ് എത്തുകയെന്നും സൂചനയുണ്ട്.
ആന്ധ്രാപ്രദേശിൻ്റെ പശ്ചാത്തലത്തിലാണ് ചിത്രം ഒരുങ്ങുന്നത്. മലയാളത്തിൽ നവതരംഗ സിനിമകളിലെ പ്രഗത്ഭനായ ലിജോ ജോസ് പെല്ലിശേരി ഒരുക്കുന്ന ചിത്രത്തിൻ്റെ പ്രീ പ്രൊഡക്ഷ്ഷൻ ജോലികൾ പുരോഗമിക്കുകയാണ്. ജനുവരി 10 ന് രാജസ്ഥാനിൽ ചിത്രീകരണം ആരംഭിക്കും. ജോൺ ആൻഡ് മേരി ക്രിയേറ്റീവിൻറെ ബാനറിൽ ഷിബു ബേബി ജോണാണ് ചിത്രത്തിൻറെ നിർമാണം. ഈ പ്രൊഡക്ഷൻ കമ്പനിയുടെ ആദ്യ പ്രോജക്റ്റാണിത്. മോഹൻലാലും ലിജോ ജോസ് പെല്ലിശേരിയും ആദ്യമായി ഒന്നിക്കുന്ന ചിത്രത്തിൻ്റെ അനൗൺസ്മെൻ്റ് മുതൽ ആവേശത്തോടെയാണ് ആരാധകർ ഏറ്റെടുത്തത്. ചിത്രത്തിൻ്റെ പേര് മലൈക്കോട്ടൈ വാലിബൻ എന്നാകാമെന്നുള്ള രീതിയിലുള്ള പ്രചരണം മുമ്പു തന്നെ നടന്നിരുന്നു. കഴിഞ്ഞ ദിവസം ചിത്രത്തിൻ്റെ പേര് രൂപകല്പന ചെയ്യുന്നതിൻ്റെ വീഡിയോ സോഷ്യൽ മീഡിയയിൽ മോഹൻലാൽ റിലീസ് ചെയ്തിരുന്നു.
ഇതിനു പിന്നാലെ ചിത്രത്തിൻ്റെ പേരിനെക്കുറിച്ച് പല രീതിയിലുള്ള പ്രചരണവും ആരംഭിച്ചു. പേര് അനൗൺസ് ചെയ്തതിനു പിന്നാലെ ചിത്രത്തിൻ്റെ ഷൂട്ടിംഗ് ഉടൻ ആരംഭിക്കുന്നതിനുള്ള താറെടുപ്പിലാണ് അണിയറ പ്രവർത്തകർ.നായിക എന്ന ഇമേജിനപ്പുറം മികച്ച കഥാപാത്രങ്ങളെ തെരഞ്ഞെടുക്കുന്നതിൽ രാധിക വളരെ ശ്രദ്ധ കൊടുക്കാറുണ്ട്. രാധികയ്ക്ക് ഒപ്പം ബോളിവുഡിൽ നിന്നും വിദ്യുത് ജംവാലും ചിത്രത്തിൽ പ്രധാന കഥാപാത്രമാകുന്നുണ്ട്. ബോളിവുഡിൽ ആക്ഷൻ താരമായി തിളങ്ങുന്ന വിദ്യുത് ജംവാലും മലൈക്കോട്ടൈ വാലിബനിൽ എത്തുന്നതോടെ ചിത്രം ആക്ഷൻ ചേരുവകളോടെ വാണിജ്യ സിനിമയായിട്ടാകും ഒരുക്കുന്നതെന്നു സൂചനയുണ്ട്. വിജയ് നായകനായ തുപ്പാക്കി, സൂര്യയുടെ അഞ്ചാൻ എന്നീ തമിഴ് ചിത്രങ്ങളിലൂടെ സൗത്ത് ഇന്ത്യൻ പ്രേക്ഷകർക്ക് പരിചിതനാണ് വിദ്യുത് ജംവാൽ.ബോളിവുഡിൽ മികച്ച കഥാപാത്രങ്ങളെ അവതരിപ്പിച്ച് ശ്രദ്ധ നേടിയ താരമാണ് രാധിക ആപ്തെ. കൊമേഴ്സ്യൽ സിനിമകൾക്കപ്പുറത്ത് മികച്ച സിനിമകൾ തെരഞ്ഞെടുക്കുന്ന നായിക ലിജോ ജോസ് പെല്ലിശേരിയ്ക്കൊപ്പം എത്തുന്നതോടെ വീണ്ടും പ്രതീക്ഷ ഉയരുകയാണ്.